މިހާތަނަށް މަސްވެރިންގެ ޤައުމީ ދަފްތަރުގައި 200 އުޅަނދު ރަޖިސްޓްރީ ކޮށްފި

މިހާތަނަށް މަސްވެރިންގެ ޤައުމީ ދަފްތަރުގައި 200 އުޅަނދު ރަޖިސްޓްރީ ކޮށްފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާގެ ސްޓޭޓް މިނިސްޓަރ ޑރ. ހުސައިން ޝިނާން ވިދާޅުވެއްޖެއެވެ.

ސްޓޭޓް މިނިސްޓަރު މިހެން ވިދާޅުވީ ދައުލަތުގެ މީޑިޔާ ޕީއެސްއެމްގެ ޕްރޮގްރާމެއްގައި ވާހަކަފުޅު ދައްކަވަމުންނެވެ. މި ޕްރޮގްރާމުގައި ސްޓޭޓް މިނިސްޓަރު ޝިނާން ވިދާޅުވީ 200 ވަރަކަށް އުޅަނދު މިހާރުވެސް އެ މިނިސްޓްރީގެ ދަފްތަރުގެ ތެރެއަށް ވަދެފައިވާ ކަމަށާއި އެ ސިސްޓަމްގެ ތެރެއިން ވީހާވެސް ގިނަ އުޅަނދު ފަހަރު ސިސްޓަމްގެ ތެރެއިން ރަޖިސްޓްރީވެގެން އެ މަސައްކަތް ކުރިއަށް ގެންދިއުމަށް މަސައްކަތްކުރާ ކަމަށެވެ.

ސްޓޭޓް މިނިސްޓަރު ޝިނާން ވިދާޅުވީ އެ މިނިސްޓްރީގެ އެންމެ ބޮޑު އަމާޒަކީ މަސްވެރިކަންކުރާ ހުރިހާ އުޅަނދެއް ދަފްތަރުގައި ރަޖިސްޓްރީވެގެން ދިއުންކަމަށާއި އަދި ބޭންކްތަކާއި ސަރުކާރު ހިއްސާވާ ކުންފުނިތަކުގައި ހުރި ސްކީމްތަކަށް ދަފްތަރުގައި ރަޖިސްޓްރީވާ އުޅަނދުތަކަށް އެކްސެސްވެވޭނެ ފަސޭހަ ނިޒާމެއް ހޯދުމުގެ މަސައްކަތް މިހާރު ކުރަމުންދާ ކަމަށެވެ.

ސަރުކާރުން ހުޅުވާލާ ލޯނުތަކަށް އެދި ހުށަހެޅޭނީވެސް ދަފްތަރުގައި ރަޖިސްޓްރީވާ ފަރާތްތަކަށްކަމަށާއި ދަފްތަރުގެ އެންމެ ބޮޑު ބޭނުމަކީ މަސްވެރިކަމުގެ ސިނާއަތައް ވަށާޖެހޭ ހައްލެއް ހޯދުން ކަމަށް ވެސް ޝިނާން ވިދާޅުވިއެވެ.

މަސްވެރިކަމާ ބެހޭ އިދާރާއިން ހާމަކުރާ ގޮތުގައި މަސްވެރިންގެ ދަފްތަރު އެކުލަވާލެއްވުމާއެކު އެ ސިނާޢަތުގައި ހަރަކާތްތެރިވާ ބިދޭސީންގެ ސަބަބުން ރާއްޖެއިން ބޭރުވަމުންދާ ފައިސާ ރާއްޖޭގެ އިޤްތިޞާދުގައި ހިފެހެއްޓޭނެކަމަށާއި މަސްވެރިންގެ ޤައުމީ ދަފުތަރުގެ އިތުރުން ފާނައިގެ މަސްވެރިކަން ފަދަ ފަރުމަސްވެރިކަމުގެ ބާވަތްތަކާއި ރެކްރިއޭޝަނަލް ފިޝިންގ އަދި ސްޕޯޓްސް ފިޝިންގ ފަދަ ހަރަކާތްތަކުގެ މަޢުލޫމާތުވެސް ފުރިހަމަ ގޮތެއްގައި ނެގޭނެ އިންތިޒާމު ވެސް ހަމަޖައްސާނެއެވެ.

މަސްވެރިކަމާ ބެހޭ ވުޒާރާއިން ހާމަކުރާ ގޮތުގައި މި ދަފުތަރު އެކުލަވާލުމުގެ މައިގަނޑު އެއް ބޭނުމަކީ މަސްވެރިކަމަކީ ޕްރޮފެޝަނަލް މަސައްކަތެއްގެ ގޮތުގައި ކަނޑައެޅި މަސްވެރިންނަކީވެސް އެހެނިހެން މަސައްކަތްތަކެކޭ އެއްފަދައިން ދަޢުލަތުން ބަލައިގަންނަ ޢާމްދަނީ ލިބޭ މަސައްކަތެއްކުރާ ބައެއްގެ ގޮތުގައި ކަނޑައެޅުމެވެ.

މަސްވެރިން ޤައުމީ ދަފްތަރު އެކުލަވާލެއްވުމަކީ ރައީސް ޑރ.މުހައްމަދު މުއިއްޒުގެ ރިޔާސީ ވައުދުފުޅެކެވެ. މި ދަފްތަރު އެކުލަވާލެއްވުމަށްފަހު އެ ދަފްތަރުގައި ބައިވެރިވުމަށް ހުޅުވާލާފައިވަނީ މިދިޔަ ފެބްރުއަރީމަހުގެ 16 ވަނަ ދުވަހުގައެވެ.