އިސްރާއީލުން ޣައްޒާގެ މެދުތެރެއަށް ވަރުގަދަ ހަމަލާތަކެއް ދޭން ފަށައިފި

އިސްރާއީލުން ޣައްޒާގެ މެދު ސަރަހައްދަށް ވަރުގަދަ ހަމަލާތަކެއް ދޭން ފަށައިފިކަމަށް އަލްޖަޒީރާގެ ނޫސްވެރިޔަކު ރިޕޯޓުކޮށްފިއެވެ. މި ހަމަލާތައް އަމާޒުކޮށްފައިވަނީ ގައްޒާގެ މެދުތެރެއާއި ދެކުނުގައިވާ ޚާން ޔޫނިސްގެ އިރުމަތީ ސަރަހައްދުތަކަށެވެ.

އިއްޔެ ރޭވެސް އިސްރާއީލުން ދިން ހަމަލާތަކުގައި އިތުރު 3 މީހުން މަރުވެ، 10 އަށްވުރެ ގިނަ މީހުން ޒަޚަމްވެފައިވެއެވެ. މި ހަމަލާތަކުގައި ޣައްޒާގެ މެދުތެރޭގައިވާ ދައިރުލް ބަލަހުގައި ދެ ގެއަކާއި ހިޔާވަހިކަން ހޯދައިގެން ތިބި މީހުން ދިރިއުޅެމުންދިޔަ ޓެންޓުތަކެއް ވަނީ ހަލާކުކޮށްލާފައެވެ.

އިސްރާއީލްގެ ހަމަލާތައް ވަރުގަދަ ކޮށްފައިވާއިރު، ހަމާސް އިން ވަނީ ޣައްޒާގެ އިސްވެރިޔާ ޔަހްޔާ ސިންވާރު، އެ ޖަމާޢަތުގެ އައު ސިޔާސީ އިސްވެރިޔާގެ ގޮތުގައި ހަމަޖައްސާފައެވެ. އޭނާ އެމަގާމަށް ހަމަޖައްސާފައިވަނީ އިސްމާޢީލް ހަނިއްޔާގެ ބަދަލުގައެވެ. އިސްމާޢީލް ހަނިއްޔާ އަވަހާރަވީ ތެހްރާންގައި ދިން ވައިގެ ހަމަލާއެއްގައެވެ.

އިސްރާއީލުގެ ސިފައިންގެ ތަރުޖަމާނު ޑެނިއަލް ހަގާރީ ވަނީ ސިންވާރު މެރުމަށް އިސްރާއީލުން ދެމިތިބޭނެ ކަމަށް ބުނެފައެވެ. މިއީ ސިންވާރު ހަމާސްގެ އައު ސިޔާސީ އިސްވެރިޔާގެ ގޮތުގައި ހޮވުނު ކަން އެނގުމަށްފަހު އިސްރާއީލުން ދިން ނުރައްކާތެރި އިންޒާރެއްކަމަށް ރިޕޯޓްތައް ބުނެއެވެ.

ޣައްޒާ ހަނގުރާމަ ފެށުނު ފަހުން މިހާތަނަށް 39،653 މީހުން ޝަހީދުވެ، 91،535 މީހުން ޒަޚަމްވެފައިވެއެވެ.

ހަނގުރާމައިގައި ޣައްޒާގެ ބޮޑުބައެއް ވީރާނާ ވެފައިވާއިރު، ދުނިޔޭ އަދުލުގެ ކޯޓުން އިސްރާއީލަށް އަމުރުކޮށްފައިވަނީ ވަގުތުން ހަނގުރާމަ ހުއްޓާލައި ޣައްޒާއިން އިސްރާއީލްގެ ސިފައިން ފޭބުމަށެވެ.