އައްޑޫ ސިޓީ އާއި ޗައިނާގެ ސިޝުއާން ޕްރޮވިންސް އާ ދެމެދު ސިސްޓާ ސިޓީ އެގްރީމެންޓެއް ހަދަނީ

އައްޑޫ ސިޓީ އާއި ޗައިނާގެ ސިޝުއާން ޕްރޮވިންސް އާ ދެމެދު ސިސްޓާ ސިޓީ އެގްރީމަންޓެއް ހަދަން ނިންމާފައިވާ ކަމަށް ޗައިނާއިން ބުނެފިއެވެ.

ސިޝުއާން ޕްރޮވިންޝިއަލް ޕީޕަލްސް ކޮންގްރެސް ގެ އިސް ބޭފުޅުން މިއަދު ވަނީ ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް އާ ބައްދަލު ކުރައްވާފައެވެ.

މި ބައްދަލުކުރެއްވުމުގައި ދެ ގައުމުގެ ދެމެދުގައި އެކި ދާއިރާތަކުން ގުޅުން ބަދަހިކުރުމާ ގުޅޭގޮތުން ވަނީ މަޝްވަރާކުރައްވާފައެވެ.

މި ބައްދަލުވުމުގައި ވާހަކަދައްކަވަމުން ސިޝުއާން ޕްރޮވިންޝިއަލް ޕީޕަލްސް ކޮންގްރެސް ގެ ސްޓޭންޑިން ކޮމިޓީގެ ވައިސް ޗެއާމަން ހަރ އެކްސެލެންސީ މިސް ޒޫ ޗުންޝިއު ވިދާޅުވީ އައްޑޫ ސިޓީ އާ ދެމެދު ސިސްޓާ ސިޓީ އެއްބަސްވުމެއް ގާއިމްކުރުމަށް ހުށަހަޅުއްވާފައިވާ ކަމަށެވެ. މި އެއްބަސްވުމުގެ ދަށުން އައްޑޫ ސިޓީއަށް އެކި ދާއިރާތަކުން އެހީތެރިކަން ފޯރުކޮށްދިނުމާ ގުޅޭގޮތުންވެސް ވަނީ ވާހަކަދައްކަވާފައެވެ. އޭގެތެރޭގައި ފަތުރުވެރިކަމާއި އެގްރިކަލްޗަރަލް ދާއިރާ ހިމެނެއެވެ.

ސިޝުއާން އެއާލައިންސް އިން މިދިޔަ އަހަރުގެ އޮގަސްޓްމަހުން ފެށިގެން ރާއްޖެއަށް ދަތުރުތައް ފަށާފައިވާއިރު، އެ ޕްރޮވިންސުން ގިނަ އަދަދެއްގެ ފަތުރުވެރިންވެސް ރާއްޖެ ޒިޔާރަތްކުރެއެވެ. އަދި ސިޝުއާން ޕްރޮވިންސް ދަނޑުވެރިކަމާއި ކާބޯތަކެތި އުފެއްދުމާއި، ޕްރޮސެސް ކުރުމާއި އެކްސްޕޯޓް އަދި ސަޕްލައިއާއި ބެހޭ ވިޔަފާރި އާއި ކޮންސިއުމާ ގުޑްސް އަދި ހޯލްސޭލް ވިޔަފާރީގައި ކުރިއަރާފައި ވާކަން ފާހަގަކޮށްލެވެއެވެ.

މި ބައްދަލު ކުރެއްވުމުގައި އައްޑޫ ހިތަދޫ މެދު ދާއިރާގެ މެންބަރު އަހުމަދު އަޒާން އާއި ފޭދޫ ދެކުނު ދާއިރާގެ މެންބަރު އިބްރާހީމް ދީދީގެ އިތުރުން ތިނަދޫ ދެކުނު ދާއިރާގެ މެންބަރު މުހައްމަދު އަލްސަން އަހުމަދު ވަނީ ބައިވެރިވެވަޑައިގެންފައެވެ.

ޗައިނާ އާއި ރާއްޖެއާ މެދު ގުޅުން އިތުރަށް ބަދަހި ކުރުމަށް ރައްޔިތުންގެ މަޖިލީހުގެ ޗައިނާ މޯލްޑިވްސް ފްރެންޑްޝިޕް ގްރޫޕެއް އެކުލަވާލާފައިވާއިރު އެ ގްރޫޕުގެ މުގައްރިރަކީ މަހިބަދޫ ދާއިރާގެ މެންބަރު އަހްމަދު ތާރިގު (ޓޮމް)އެވެ. އަދި ނައިބު މުގައްރިރަކީ ހިތަދޫ މެދު ދާއިރާގެ މެންބަރު އަހުމަދު އަޒާންއެވެ.

އިކޮނޮމިކް މިނިސްޓްރީ އާ ގުޅިގެން ރާއްޖެއާއި ޗައިނާގެ ސިޝުއާން ޕްރޮވިންސްއާ ދެމެދު ޓްރޭޑް އެންޑް އިންވެސްޓްމަންޓް ކޮންފަރަންސެއް ވެސް މިއަދު ވަނީ ކުރިއަށް ގެންގޮސްފައެވެ.