އެމެރިކާގެ ކުރީގެ ރައީސް އަދި ރިޕަބްލިކަން ޕާޓީގެ ރިޔާސީ ކެންޑިޑޭޓް ޑޮނަލްޑް ޓްރަމްޕް ޑިމޮކްރެޓިކް ޕާޓީގެ ކެންޑިޑޭޓް ކަމަށް ވާނެކަން ގާތްގަނޑަކަށް ކަށަވަރުވެފައިވާ ކަމަލާ ހެރިސްއާއެކު ލައިވްކޮށް ބަހުސްކުރުމަށް އެއްބަސްވެއްޖެއެވެ.
މި ބަހުސް ބޭއްވުމަށް ހަމަޖެހިފައިވަނީ ސެޕްޓެމްބަރު 4 ގައެވެ.
"އަހަރެން ވާނީ ފޮކްސް ނިއުސްއާއެކު ކަމަލާ ހެރިސްއާ ބަހުސްކުރުމަށް އެއްބަސްވެފައި،" ޓްރަމްޕް އޭނާގެ ޓްރޫތް ސޯޝަލް އެކައުންޓުގައި ކުރި ޕޯސްޓެއްގައި ބުންޏެވެ.
މި ބަހުސް ބޭއްވުމަށް ހުށަހަޅާފައިވަނީ ޓްރަމްޕަށް ތާއީދުކުރާ ކަމަށް ބެލެވޭ ފޮކްސް ނިއުސްއިންނެވެ. ނަމަވެސް މިހާތަނަށް މިކަމާއި ގުޅޭގޮތުން އެމެރިކާގެ ނައިބު ރައީސް ކަމަލާ ހެރިސްގެ ފަރާތުން އެއްވެސް ބަހެއް ބުނެފައެއް ނުވެއެވެ.
ހެރިސް ވަނީ ރައީސް ޖޯ ބައިޑެން ވޭތުވެދިޔަ މަހު އިންތިޚާބުގައި ވާދަނުކުރަން ނިންމުމާ ގުޅިގެން ޑިމޮކްރެޓިކް ޕާޓީގެ އެންމެ ވަރުގަދަ ކެންޑިޑޭޓަށް ވެފައެވެ. އޭނާ އިންތިޚާބަށް ކުރިމަތިލުމާ ގުޅިގެން ގިނަ އަދަދެއްގެ ފައިސާ ވަނީ ކެމްޕޭނަށް ލިބިފައެވެ. ހިޔާލު ހޯދުމުގެ ވޯޓްތަކުން ދައްކާގޮތުގައި އިންތިޚާބުގެ ވާދަ ވެރިކަން ވަނީ ދެކެންޑިޑޭޓުންގެ މެދުގައި ވަރަށް ކުޑަ ފަރަގެކެވެ.
މި ބަހުސް ބޭއްވުމަށް ހަމަޖެހިފައިވަނީ އެމެރިކާގެ އުތުރު-އިރުމަތީގައި އޮންނަ، އިންތިޚާބުގައި ވަރަށް މުހިންމު ސްޓޭޓެއް ކަމުގައިވާ ޕެންސިލްވޭނިއާ ސްޓޭޓުގައެވެ.
ބަހުސް މޮޑަރޭޓްކުރާނީ ފޮކްސް ނިއުސްގެ ޗީފް ޕޮލިޓިކަލް އެންކަރ ބްރެޓް ބެއަރ އަދި ނިއުސް އެންކަރ މާތާ މެކްކޯލަމްއެވެ.
މި ބަހުސް އަސްލު ރޭވިފައިވަނީ ސެޕްޓެމްބަރު 10 ގައި އޭބީސީ ނިއުސްގައި ބައިޑެންއާ ދެކޮޅަށް ބޭއްވުމަށެވެ. ނަމަވެސް ބައިޑެން އިންތިޚާބުން ތަނާޒުލުވުމާއި، ޓްރަމްޕް އޭބީސީ ނެޓްވަރކް އަދި ޖޯޖް ސްޓެފަނޮޕޮލޮސްގެ މައްޗަށް ދަޢުވާ އުފުލުމާ ގުޅިގެން އެ ބަހުސް ކެންސަލްކުރެވުނެވެ.
ތިލަފުށީ ލޭންޑް ފިލް ފުރި، ކުނި ގެންދަން އެހެން ސަރަހައްދެއް ހަމަޖައްސަނީ
މިއަދުގެ ދެވަނަ އެކްސިޑެންޓު: ދެ މީހަކަށް ފަރުވާ ދެނީ
އިންޑިއާއިން ހިތަދޫ ޕޯޓަށް 300 މެޓްރިކް ޓަނުގެ ކާގޯ
ގާނޫނު މުގުރަން މި ސަރުކާރުން ފުރުސަތެއް ނުދޭނެ: ނައިބު ރައީސް
