މިމަހުގެ 94 އިންސައްތަ ކަރަންޓު ބިލް ކުޑަ: ފަހުމީ

ޖުމްލަ ބިލުތަކުގެ ތެރެއިން މިދިޔަ މަހައްވުރެ މިމަހު 94 އިންސައްތަ ކަރަންޓު ބިލް ކުޑަކަމަށް ސްޓެލްކޯގެ މެނޭޖިންގް ޑިރެކްޓަރު ހުސައިން ފަހުމީ ވިދާޅުވެއްޖެއެވެ. ފަހުމީ މިފަދައިން ވިދާޅުވީ ސްޓެލްކޯގައި މިއަދު ބޭއްވި ނޫސްވެރިންގެ ބައްދަލުވުމެއްގައި ކަރަންޓު ބިލާއި ބެހޭގޮތުން މައުލޫމާތު ހިއްސާކުރައްވަމުންނެވެ.

ފަހުމީ ވިދާޅުވީ، ޖުމްލަކޮށް ސްޓެލްކޯއިން އިޝޫކޮށްފައިވާ ކަރަންޓު ބިލުތަކުގެ ތެރެއިން މިމަހު އިޝޫކުރި ބިލުތަކަށް ބަލާއިރު 94 އިންސައްތަ ބިލު ކުޑަވެފައިވާކަމަށެވެ. އަދި މާލޭގައި ބޮޑުވެފައިވަނީ 6 އިންސައްތަ ބިލުކަމަށާއި ހުޅުމާލެއަށް ބަލައިފިނަމަ ބޮޑުކަމަށް ދައްކަނީ 15 އިންސައްތަ ބިލުކަމަށް އެބޭފުޅާ ވިދާޅުވިއެވެ.

އަދި، އެފަދަ ގެތަކުން ކަރަންޓު ބިލު ބޮޑުވެފައިވާ ސަބަބު ދެނެގަތުމަށް ސްޓެލްކޯއިން ހާއްސަ ޓީމެއް ގޮސް އެނާޖީ އޮޑިޓެއް ހަދަން ފަށާފައިވާކަމަށް ފަހުމީ ވިދާޅުވިއެވެ. އެހެންކަމުން, އެތަންތަނުގައި އުޅޭ ފަރާތްތަކަށް ކަރަންޓު ބިލު ބޮޑުވާ ސަބަބު އެނގި އެކަންކަން އިގްތިސާދުކުރުމަށް ފަސޭހަވެގެންދާނެކަމަށް ފަހުމީ ވިދާޅުވިއެވެ.

ފަހުމީ އިތުރަށް ވިދާޅުވީ، އާންމުކޮށް އެހެން މަސްތަކާއި އަޅާ ބަލާއިރު ކަރަންޓު ބިލާއި ބެހޭގޮތުން އަންނަ ޝަކުވާތައް މިހާރު އިންތިހާއަށް މަދުވެފައިވާކަމަށެވެ. އަދި ބިލު ނުދެއްކިގެން އެއްވެސް ގޭބިސީއަކުން ޝަކުވާ ހުށަހަޅާފައި ނުވާކަމަށެވެ. ނަމަވެސް އަމިއްލަ ކުންފުނިތަކާއި ގެސްޓް ހައުސްތަކުގައި ޕެންޑިންގް ބިލުތަކެއްވާކަމަށާއި، ބިލު ނުދެއްކޭ ފަރާތްތަކަށް ސްޓެލްކޯއިން ލުއި ދޭނެކަމަށްވެސް ފަހުމީ ވިދާޅުވިއެވެ.

އެބޭފުޅާ ވިދާޅުވީ ސްޓެލްކޯގެ ބިލިންގް ސިސްޓަމް ބަލައިލުމަށް ބޭނުންވާ އިދާރާތަކަށް އެ ފުރުސަތު ހުޅުވިފައިވާ ކަމަށެވެ. އެއީ އެއްވެސް ހާލެއްގައި ފޮރުވައިގެން ކުރާކަމެއް ނޫންކަމަށާއި، ބިލިންގް ސިސްޓެމް ބަލައިލުމުން ބިލު ހެދުމުގައި ސްޓެލްކޯއިން އެއްވެސް އޮޅުވާލުމެއް ނުގެންގުޅޭކަން އެނގިގެންދާނެކަމަށް ފަހުމީ ވިދާޅުވިއެވެ. އަދި މީސް މީޑިއާގައި ކަރަންޓު ބިލު ބޮޑުކުރަނީ ގަސްދުގައިކަމަށްބުނެ ދައްކާވާހަކަތައް ފަހުމީ ވަނީ ދޮގުކޮށްފައެވެ.

މިއަދުގެ ނޫސްވެރިންގެ ބައްދަލުވުމުގައި ކަރަންޓު ބިލާއި ބެހޭގޮތުން ވާހަކަފުޅުދައްކަވަމުން ސްޓެލްކޯގެ ޖެނެރަލް މެނޭޖަރ އިބްރާހީމް ނާޝިދު ވިދާޅުވީ ދުވާލެއްގެ މައްޗަށް ސްޓެލްކޯއިން ކަރަންޓު އުފައްދަންޖެހޭ މިންވަރު ދަނީ މަތިވަމުންކަމަށެވެ. އެގޮތުން އަވިދީފައި އޮންނަ ދުވަހެއް ނަމަ ދުވާލަކަށް ގާތްގަނޑަކަށް 105 މެގަވޮޓް ކަރަންޓު އުފައްދަން ޖެހޭއިރު އަންނަ އަހަރު އެ އަދަދު މިއަށްވުރެ މަތިވާނެކަމަށް އެބޭފުޅާވަނީ ލަފާކޮށްފައެވެ.

މީސްމިޑިއާގައި ކަރަންޓުބިލާއި ބެހޭގޮތުން އެކި ވާހަކަތައް ފަތުރަމުން ދިޔަ ނަމަވެސް، ސްޓެލްކޯއިން ބިލު ހަދަނީ މީޓަރުން ދައްކާ ވަރަށް ކަމަށާއި ސްޓެލްކޯ ޕަވަރ ޕްލާންޓުގެ ތެރެއިން އެއްވެސް އޮޅުވާލުމެއް ހިނގާފައި ނުވާނެކަމުގެ ޔަގީންކަން ނާޝިދު ވަނީ ދެއްވާފައެވެ. އަދި މީޓަރު އަނބުރާ، ބިލު ބޮޑުކުރުމަކީ ކުރެވޭ ކަމެއް ނޫންކަމަށާއި އެކަން ނުކުރާނެކަމަށްވެސް ނާޝިދު ވަނީ ވިދާޅުވެފައެވެ.