22 ކުއްޖަކަށް ރައްކާތެރި އާއިލީ ދިރިއުޅުމެއް ހޯދައިދެވިފައިވޭ: މިނިސްޓަރު

22 ކުއްޖަކަށް ރައްކާތެރި އާއިލީ ދިރިއުޅުމެއް ހޯދައިދެވިފައިވާ ކަމަށް ސޯޝަލް އެންޑް ފެމިލީ ޑެވެލޮޕްމަންޓް މިނިސްޓަރު ޢާއިޝަތު ޝިހާމް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ދައުލަތުގެ މީޑިޔާ ޕީއެސްއެމް ގެ ޕްރޮގްރާމެއްގައެވެ. މި ޕްރޮގްރާމްގައި މިނިސްޓަރު ވިދާޅުވީ ކޮންމެ ކުއްޖަކަށް ޢާއިލާއެއް ހޯދުމަށް ކުރެވޭ މަސައްކަތްތަކުގެ ތެރެއިން މިހާތަނަށް 22 ކުއްޖަކަށް ރައްކާތެރި އާއިލީ ދިރިއުޅުމެއް ހޯދައިދެވިފައިވާ ކަމަށާއި ފިޔަވަތީގައި ކުދިން މަދު ކަމަށާއި، މިއީ ކުދިން އާއިލާކަށް ހަވާލުކުރެވޭ އަދަދު ގިނަވުމާއެކު، އެކި ސަބަބުތަކާ ހުރެ ދައުލަތުގެ ބެލުމުގެ ދަށަށް ކުދިން ނެގޭ މިންވަރު މަދުވުމުގެ ނަތީޖާއެއް ކަމަށެވެ.

އަދި މީގެ އިތުރުން މިނިސްޓަރު ވިދާޅުވީ ފިޔަވައްޗަށް ކުއްޖެއް ގެންނަ ހިސާބުން އެކުއްޖަކަށް ކޭސް ވޯކަރެއް ހަމަޖައްސާ، އާއިލާއާ އަނބުރާ ހަވާލުކުރެވޭނީ ނުވަތަ ފޯސްޓަރ ކުރެވޭނީ ކިހިނެއްތޯ ދެނެގަތުމަށް ގިނަ މަސައްކަތްތަކެއް ކުރަމުންދާ ކަމަށާއި ، މިހާރު ފިޔަވައްޗަށް ކުދިން ގެންނަ ހިސާބުން ސަމާލުކަން ދެވެނީ އެތާ ގިނަ ދުވަހު ބެހެއްޓުމުގެ ބަދަލުގައި، އާއިލާއަކާ އަނބުރާ ހަވާލުކޮށް، އާއިލީ ވެއްޓެއްގައި ލޯތްބާއި ކުލުނާއެކު ބޮޑުވުމުގެ ފުރުސަތު ކުދިންނަށް ފަހިކޮށްދިނުމަށް ކަމަށެވެ.

ކުރިއާ ހިލާފަށް، މިހާރު އުމުރުން ބޮޑެތި ކުދިންވެސް ފޯސްޓަރ ކުރުމަށް އާއިލާތަކުން އަންނަކަމަށް މިނިސްޓަރު ޝިހާމް ވިދާޅުވިއެވެ.