ދަރަނި ނުދެއްކި އޮތުމަކީ ފާފަ ފުއްސެވުމަށް ހުރަސް އެޅިދާނެ ކަމެއް: ޚުތުބާ

ދަރަނި ނުދެއްކި އޮއްވާ މަރުވުމަކީ އެމީހެއްގެ ފާފަ ފުއްސެވުމަށް ހުރަސް އެޅިދާނެ ކަމެއްކަމަށް މިއަދުގެ ހުކުރު ޚުތުބާގައި ބުނެފިއެވެ.

މިއަދުގެ ހުކުރު ޚުތުބާގެ މައުޟޫއުއަކީ "ޙަޔާތުގެ ހުޅުކޮޅު ނިވުމުގެ ކުރިން ދަރަނި އަދާކުރާށެވެ!"މިއެވެ.

ޚުތުބާގައި ބުނެފައިވަނީ ދަރަނި ދިނުމާއި ދަރަނި ނެގުމަކީ އިސްލާމް ދީން ހުއްދަކުރާ ކަމެއްކަމަށާއި ނަމަވެސް ދަރަނި ނަގަން ވާނީ އެ ދަރަނި އަދާކުރުމުގެ ނިޔަތުގައިކަމަށެވެ.

އަދި ދަރަނި ނަގަން ވާނީ އެ ދަރަނި ދޫކުރި ފަރާތަށް ގެއްލުމެއް ދިނުމުގެ ނިޔަތުގައި ނޫންކަމަށާއި އެގޮތުން ދަރަނި އަދާކުރަން އަވަސްވެގަތުމަކީ ދަރަނި ނެގި ފަރާތަށާއި ދަރަނި ދޫކުރި ފަރާތަށްވެސް އެންމެ ފައިދާ ހުރި ގޮތްކަމަށްވެސް ޚުތުބާގައި ބުނެފައިވެއެވެ.

ޚުތުބާގައިވާގޮތުން ބޮޑެތި ދަރަނިތައް ނަގަންވާނީ އެފަދަ ދަރަނި އަދާކުރާނެ ގޮތުގެ ހިކުމަތްތެރި ރޭވުމެއް އޮވެގެންނެވެ.

އެގޮތުން ދަރަނި ނުދެއްކި ޝަރީއަތަށް މައްސަލަ ހުށަހެޅި ތިމާ ކުށްވެރިވެ އެކަމުގެ ސަބަބުން ދުނިޔެ އާއި އާޚިރަތް ނަގައިލެވޭ ކަމަކަށް އެކަން ވެގެންނެއް ނުވާނެކަމަށް ބަޔާންކޮށްފައިވެއެވެ.

"އެފަދަ ދަރަންޏެއް ނެގުމަށްވުރެ އައުލާކަށް ބޮޑީ ލިބޭ އާމްދަނީއަކާއި އެއްވަރަށް ޚަރަދުތައް ކުޑަކޮށް އިގްތިޞާދު ކުރުމެވެ. ދަރަނި އަދާކުރުމުގެ ނިޔަތުގައި ދަރަނި ނަގާ މީހުންނަށް ދަރަނި ދެއްކޭނެ ގޮތް މާތް ﷲ މިންވަރުކޮށްދެއްވާނެއެވެ." ހުކުރު ޚުތުބާގައި ބުނެފައިވެއެވެ.

ޚުތުބާގައި ބުނެފައިވަނީ ދަރަނި ނުދައްކާ ލަސްކުރުމަކީ ދޭދޭ ފަރުދުންގެ މެދުގައި އޮންނަ ލޯތްބާއި ކުލުނު ނެތިދާ ކަމެއްކަމަށާއި ދަރަނި ދެއްކުން ފަސްކުރުމަކީ ދަރަނި ދޫކުރި މީހާއަށް ނުހަނު ގެއްލުންވާނެ ކަމެއްކަމަށެވެ.

އަދި ދަރަނި ނަގަނީ ބައިތުލްމާލުންކަމުގައި ވާނަމަ އެއީ އެންމެހައި ރައްޔިތުންގެ ހައްގުތައް އޭގައި ހިމެނޭ ދަރަންޏެއްކަމަށާއި އެހެންވެ އެފަދަ ބޮޑެތި ދަރަނިތައް ނުދައްކައި ލަސްކުރުމަކީ އެކަމުގެ ފާފަ އެހެނިހެން ދަރަނިތަކަށްވުރެ ބޮޑުވެދާނެ ކަމެއްކަމަށްވެސް ބަޔާންކޮށްފައިވެއެވެ.

"ކިތަންމެ ކުޑަ ދަރަންޏެއްކަމުގައި ވިޔަސް އަދާނުކުރެވި އޮއްވައި ދުނިޔެ ދޫކޮށް ދާން ޖެހުމަކީ ނުރައްކާތެރިކަމެކެވެ.، އެއީ ފާފަ ފުއްސެވުމަށް ހުރަސް އެޅިދާނެ ކަމެކެވެ." ޚުތުބާގައި ބުނެފައިވެއެވެ.

ޚުތުބާގައި އިތުރަށް ބުނެފައިވަނީ ދަރަނިވެރިޔާ ނިޔާވުމަށްފަހު އޭނާގެ ދަރަނި އަދާކުރެއްވުމަށް ދާންދެން އޭނާގެ ފުރާނަވަހުށީ އެލުވިގެންކަމަށެވެ.