ރާއްޖޭގައި ހުރި އިންވެސްޓްމަންޓްތަކުގެ މައުލޫމާތު މިނިސްޓަރ ފައިސަލް އިންޑިއާއާއި ހިއްސާކޮށްފި

ރާއްޖޭގެ ޓްއަރިޒަމް މިނިސްޓަރ އިބްރާހިމް ފައިސަލް މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި އިންޑިއާގެ ޗެމްބާ އޮފް ކޮމާސް އެންޑް އިންޑަސްޓްރީގެ އިސް ބޭފުޅުންނާއި ބައްދަލުކުރައްވާ ރާއްޖޭގައި އިންޑިއާގެ އިންވެސްޓަރުންނަށް ހުރި ފުރުސަތުތަކުގެ މައުލޫމާތު ދެއްވައިފިއެވެ.

ފައިސަލް މިހާރު އިންޑިއާއަށް ކުރައްވަމުން ގެންދަވާ ދަތުރުފުޅަކީ އިންޑިއާ އިން ރާއްޖެއަށް އަންނަ ފަތުރުވެރިންގެ އަދަދު އިތުރު ކުރުމަށް ކުރިއަށް ގެންދާ "ވެލްކަމް އިންޑިއާ" ރޯޑް ޝޯގައި ބައިވެރިވެ ވަޑައިގަތުމަށް ކުރައްވާ ދަތުރުފުޅެކެވެ.

ފައިސަލް ވަނީ އިންޑިއާގެ ފަތުރުވެރިކަމާ ބެހޭ ވަޒީރު ޝްރީ ގަޖެންދްރާ ސިންގ ޝެކާވަތު އަދި މަދަނީ އުދުހުންތަކާއި ބެހޭ ވަޒީރު ޝްރީ ކިންޖަރަޕޫ ރަމަމޯހަން ނައިޑޫއާ ވެސް ބައްދަލުކުރައްވާފައެވެ.

ފައިޞަލް ވިދާޅުވީ އިންޑިއާ ފަތުރުވެރިންގެ ޢަދަދު އިތުރުކުރުމަށް ކުރެވިދާނެ މަސައްކަތްތަކާއި ގުޅޭގޮތުން އިންޑިއާގެ ދެވަޒީރުންނާއި ވެސް މަޝްވަރާ ކުރެއްވިކަމަށެވެ. ފަތުރުވެރިކަމުގެ ދާއިރާއިން އިންވެސްޓުމަންޓުތައް ގެނައުމާއި ގުޅޭގޮތުންވެސް މަޝްވަރާކުރެވިފައިވާ ކަމަށް ވަޒީރު ވިދާޅުވިއެވެ

"އެރައިވަލްސް އިތުރުކުރުން، އިންވެސްޓުމަންޓު ގެނައުން، އަދި ފަތުރުވެރިކަމުގެ ދާއިރާއިން ސްކޮލަރޝިޕްތަކާއި ތަމްރީންތައް ކުރިއަށްގެންދިޔުމާއި ގުޅޭގޮތުން ވަނީ މަޝްވަރާކުރެވިފައި، މި ކަންތައްތައް ހިމެނޭ ޕްރޮޕޯސަލް ހުށަހެޅުމަށް ވަޒީރު ވަނީ އެދިވަޑައިގެންފައި." ފައިސަލް ވިދާޅުވިއެވެ.

ފައިސަލް ވިދާޅުވީ އިންޑިއާގެ މަދަނީ އުދުހުންތަކާއި ބެހޭ ވަޒީރާއެކު ބޭއްވި ބައްދަލުވުމުގައި މައިގަނޑުގޮތެއްގައި މަޝްވަރާކުރެއްވީ އެޤައުމުގެ އިތުރު އެއާލައިންތަކުގެ ދަތުރުތައް ރާއްޖެއަށް ފެށުމާއި، މިހާރުވެސް ދަތުރުތައް ބާއްވާ އެއަާލައިންތަކުން ރާއްޖެއަށް ބާއްވާ ދަތުރުތަކުގެ ޢަދަދު އިތުރުކުރުމަށް ކަމަށެވެ.

އެމްއެމްޕީއާރުސީން ވިދާޅުވީ، ރޯޑްޝޯ ކޮންސެޕްޓަށް ބާއްވާ މި ހަރަކާތުގެ މަޤްޞަދަކީ އިންޑިއާގެ ބޮޑު ތިން ސިޓީއެއްގައި ރާއްޖޭގެ ފަތުރުވެރިކަން އިޝްތިހާރުކުރުން ކަމަށެވެ. މި ރޯޑްޝޯގެ ހަރަކާތްތައް ނިއުދިއްލީގައި ބާއްވާފައިވާއިރު، ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 24 ފަރާތަކުން ބައިވެރިވެފައިވެއެވެ. އަދި އިންޑިއާގެ ފަތުރުވެރިކަމުގެ ދާއިރާގެ 150 އަށްވުރެ ގިނަ ފަރާތުން ނިއުދިއްލީގައި ބޭއްވި ރޯޑްޝޯއަށް ޒިޔާރަތްކޮށްފައިވެއެވެ.

ރޯޑް ޝޯގެ ދެވަނަ މަންޒިލަކީ މުމްބާއީއެވެ. އޮގަސްޓު ފުރަތަމަ ދުވަހު މުމްބާއީގައި ރޯޑް ޝޯ ބޭއްވުމަށްފަހު 03 އޮގަސްޓުގައި ބެންގަލޫރުގައިވެސް ރޯޑް ޝޯ ބޭއްވުމަށް ވަނީ ނިންމާފައެވެ.

ފައިސަލް ވިދާޅުވީ މިހާރު މިކުރެވޭ މަސައްކަތްތަކާއެކު އިންޑިއާއިން އަންނަ ފަތުރުވެރިންގެ ޢަދަދުތަކަށް ބޮޑެތި ކުރިއެރުންތަކެއް ލިބިގެންދާނެކަމަށެވެ. އަމާޒަކީ އަހަރު ނިމޭއިރު ރާއްޖޭގެ ފަތުރުވެރިކަމުގެ ގަދަ ތިން ޤައުމު ލިސްޓަށް އިންޑިއާ ގެނައުންކަމަށްވެސް ފައިސަލް ވިދާޅުވިއެވެ.

އަހަރުގެ މިހާތަނަށް އިންޑިއާއިން ރާއްޖެއަށް 70000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، އެޤައުމަކީ ރާއްޖެއަށް 6 ވަނައަށް އެންމެ ގިނައިން ފަތުރުވެރިން އަންނަ ޤައުމެވެ.