އެންމެ ދެރަވީ ޔޫރޯގައި ޓީމުން ބާކީވީމަ: ގްރީލިޝް

ކެރިއަރުގައި އެންމެ ހިތްދަތިވީ ޔޫރޯގައި ވާދަކުރި އިނގިރޭސި ޓީމުން ބާކީ ވުމުންކަމަށް މެންޗެސްޓާ ސިޓީގެ މިޑްފީލްޑަރު ޖެކް ގްރީލިޝް ބުނެފި އެވެ.

އުމުރުން 28 އަހަރުގެ ވިންގާ އަށް ޔޫރޯގައި ވާދަކުރި ފައިނަލް ސްކޮޑުން ގަރެތު ސައުތުގޭޓް ޖާގަދީފައެއްނުވެ އެވެ. އެކަމަކު ޔޫރޯ ފެށުމުގެ ހަފްތާއެއް ކުރިން އިންގްލެންޑުން ބޮޒްނިއާއާ ދެކޮޅަށް ކުޅުނު އެކުވެރިކަމުގެ މެޗުގައި ގްރީލިޝް ވަނީ ކުޅެފަ އެވެ. ގްރީލިޝް ޓީމުން ބާކީވީ އޭގެފަހުން ނެގި 26 ކުޅުންތެރިންގެ ލިސްޓުންނެވެ.

އިންގްލެންޑް ވަނީ ޔޫރޯ ފައިނަލަށް ދަތުރުކޮށް ސްޕެއިން އަތުން 1-2 އިން ބަލިވެފަ އެވެ.

"ޗުއްޓީގަ އުޅޭއިރު ފޯނު ނޫނީ ޓީވީ ހުޅުވާލާ ކޮންމެ ފަހަރަކު ފެންނަނީ މުބާރާތުގެ މަންޒަރުތައް. އަހަރެން ބުނާނީ ވަރަށް ތެދަށް. ފުޓްބޯޅައިގެ ހަޔާތުގައި އަދި އަހަރެންގެ އަމިއްލަ ކެރިއަރަށް ބަލާއިރު އެއީ ކުރިމަތިވި އެންމެ އުނދަގޫ ހާލަތަކީ އެއީ" ގްރީލިޝް ބުންޏެވެ.

ކުރިން އެސްޓަން ވިލާގައި މޮޅު ކުޅުމެއް ދެއްކި ގްރީލިޝް 2021 ވަނަ އަހަރު ސިޓީ އަށް ބަދަލުވީ އޭރު އިނގިރޭސި ވިލާތުގެ ރެކޯޑް ފީއެއް ކަމަށްވާ 100 މިލިއަން ޕައުންޑަށެވެ.

"އަހަރެންގެ ހިތްފަޅައިގެން ދިޔަ. އެކަމަކު މި ސީޒަނާ ކުރިމަތިލާނީ އެއީ މޯޓިވޭޝަނެއް ކަމަށް ބަލައިގެން" ސިޓިއާ އެކު ޕްރީ ސީޒަނުގައި ހަރަކާތްތެރިވަމުން އަންނަ ގްރީލިޝް ބުންޏެވެ.

ސިޓީ އަށް ބަދަލުވުމަށް ފަހު ފުރަތަމަ ސީޒަނުގައި ގްރީލިޝް ވަނީ މޮޅު ކުޅުމެއް ދައްކައިފަ އެވެ. އެ ސީޒަނުގައި ސިޓީ އިން ތާރީހީ ތިން ތަށި ހޯދިއިރު ގްރީލިޝް ފުރަތަމަ އެގާރައިގައި ހިމެނިގެން ގިނަ މެޗުތަކެއް ކުޅުނެވެ. އެކަމަކު މިދިޔަ ސީޒަނުގައި ސިޓީގެ ޓީމުން ގްރީލިޝް އަށް ފުރުސަތު ލިބުނީ ވަރަށް މަދުންނެވެ.