މި އަހަރުގެ ދެވަނަ ކުއާޓަރުގައި އެސްޓީއޯއަށް ފައިދާގެ ގޮތުގައި 148 މިލިއަން ރުފިޔާ

މިހިނގާ 2024 ވަނަ އަހަރުގެ ދެވަނަ ކުއާޓަރުގައި އެސްޓީއޯއަށް ސާފު ފައިދާގެ ގޮތުގައި 148 މިލިއަން ރުފިޔާ ލިބިފައިވާ ކަމަށް އެ ކުންފުނީގެ މާލީ ހިސާބުތަކުން ދައްކައިފިއެވެ.

އެކުންފުނިން މާލީ ހިސާބު މިއަދު އާންމުކޮށްފައިވާ އިރު އެކުންފުންޏަށް ސާފު ފައިދާގެ ގޮތުގައި 148 މިލިއަން ލިބިފައިވާ ކަމަށާއި އަދި ސާފު ފައިދާގެ ގޮތުގައި ޓެކްސް ނުކަނޑައި 177 މިލިއަން ރުފިޔާ ލިބިފައިވާ ކަމަށް ވެސް ދައްކައެވެ.

އޭގެ އިތުރުން އެ ކުންފުނީގެ މާލީ ހިސާބުތައް ދައްކާގޮތުގައި އެ ކުންފުނީގެ ހިންގުމުގެ ފައިދާގެ ގޮތުގައި ދެވަނަ ކުއާޓާރގައި ވަނީ 203 މިލިއަން ރުފިޔާ ލިބިފައެވެ.

އެ ކުންފުނިން ބުނާ ގޮތުގައި އެ ކުންފުނީގެ ޖުމްލަ އާމްދަނީ ދަށް ވެފައިވަނީ އެ ކުންފުނީގެ މައިގަނޑު ވިޔަފާރިކަމުގައިވާ ތެލުގެ ވިޔަފާރީގެ އަގުތަކަށް ދުނިޔޭގެ ބާޒާރުގައި އައި ބަދަލާއި ގުޅިގެން، ރާއްޖޭގެ މާކެޓްގައި ތެޔޮ ވިއްކާ އަގުތަކަށް ބަދަލުތަކެއް ގެނެވުމާއި ގުޅިގެންނެވެ. އެގޮތުން ތެލުގެ އަގުތައް ދަށްކުރުމާއެކު ޖުމްލަ ފައިދާ މިއަހަރުގެ ފުރަތަމަ ކުއާޓަރާއި އަޅާ ބަލާއިރު 16 އިންސައްތައިން ދަށްވެ، ޖުމްލަ ފައިދާގެ ގޮތުގައި ލިބިފައިވަނީ 515 މިލިއަން ރުފިޔާ ކަމަށް އެ ކުންފުނިން ބުނެއެވެ.