ވޯލްޑް ކަޕަށް ތައްޔާރުވާން ސައުދީގައި ލައްކައެއްހާ މީހުންނަށް ވަދެވޭ ސްޓޭޑިއަމެއް އަޅަނީ

ސައުދީ އަރަބިއާގައި 2034 ވަނަ އަހަރު ބާއްވާ ފީފާ ވޯލްޑް ކަޕްގެ މެޗުތައް ކުޅުމަށް ރިޔާދުގައި މުޅިން އާ ސްޓޭޑިއަމެއް ބިނާކުރަން އެގައުމުގެ ސަރުކާރުން ނިންމައިފި އެވެ.

ރިޔާދުގައި މުޅިން އަލަށް އިމާރާތްކުރާ ސްޓޭޑިއަމަށް 92000 ސަޕޯޓަރުންނަށް ދަނޑަށް ވަދެވޭނެ އެވެ. ސައުދީ އިން ބުނީ އާ ސްޓޭޑިއަމެއް އެޅުމުގެ ވިސްނުމަކީ އެ ސްޓޭޑިއަމްގައި ބައިނަލްއަގްވާމީ ބޮޑެތި އިވެންޓްތައް ބޭއްވުމެވެ.

ސައުދީގެ ސްޕޯޓްސް މިނިސްޓްރީ އިން މިހާރު ވަނީ އެ ސްޓޭޑިއަމް އެޅުމުގެ އެޕްރޫވަލް ދީފަ އެވެ. އެގައުމުން އަމާޒުހިފަނީ 2029 ވަނަ އަހަރުގެ ފަހުކޮޅަށް ސްޓޭޑިއަމްގެ މަސައްކަތް ނިންމާލާށެވެ.

އާ ސްޓޭޑިއަމް ވާނީ ސައުދީގެ ގައުމީ ފުޓްބޯޅަ ޓީމުގެ ރަސްމީ ސްޓޭޑިއަމް އަށެވެ. އަދި، ކުޅިވަރުގެ އިތުރު ވަސީލަތްތަކާ އެކު އެ ސްޓޭޑިއަމްގައި އެހެން ކުޅިވަރުތައް ވެސް ކުޅެވޭނެ އެވެ. ސްޓޭޑިއަމްގައި އިންޑޯ ސްޕޯޓްސް ހޯލަކާއި އޮލިމްޕިކް ސައިޒްގެ ސްވިމިން ޕޫލެއްގެ އިތުރުން އިތުރު ވަސީލަތްތައް ތަރައްގީކުރުމަށް ވަނީ ހަމަޖެހިފަ އެވެ.

އާ ސްޓޭޑިއަމަށް ނަން ދޭނީ ސައުދީ ކިންގް ސަލްމާންގެ ނަމުންނެވެ.

ސައުދީގައި އަޅާ އާ ސްޓޭޑިއަމަށް ބައިނަލްއަގްވާމީ ހަ ކުންފުންޏަކުން ވަނީ ޑިޒައިން ހޯދާފަ އެވެ.

ވޯލްޑް ކަޕް 2034 ބާއްވަން ބިޑް ކޮށްފައިވަނީ ހަމައެކަނި ސައުދީ އިންނެވެ. އެހެންވެ އެގައުމަށް ބިޑް ކާމިޔާބުވުމުގެ ފުރުސަތު ބޮޑެވެ. ސައުދީގައި މުބާރާތް ބޭއްވުމާ މެދު ގޮތް ނިންމާނީ ފީފާގެ ކޮންގްރެސްގަ އެވެ.

ސައުދީގައި ވޯލްޑް ކަޕް ބާއްވާނީ، ޔޫރަޕަށް ފިނި މޫސުމުގަ އެވެ. ގަތަރުގައި ބޭއްވި ވޯލްޑް ކަޕް ގޮތަށް ސައުދީ ވޯލްޑް ކަޕް ވެސް އޮންނާނީ އަހަރުގެ ފަހުކޮޅު އެވެ.