އަހަރަކު ދެފަހަރު ބައި-އިލެކްޝަންތައް ބާއްވަން ގާނޫނަށް އިސްލާހު ގެންނަނީ

އަހަރަކު ދެފަހަރު ކައުންސިލްތަކުގެ ބައި-އިލެކްޝަންތައް ބާއްވާ ގޮތަށް ގާނޫނަށް އިސްލާހު ގެނައުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައިފިއެވެ.

މި ބިލު ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވަނީ އިސްދޫ ދާއިރާގެ ޕީއެންސީ މެންބަރު އިސްމާއިލް ޝަފީއުއެވެ. މި ބިލަށް އިސްލާހު ގެންނަ ސަބަބެއް ކަމުގައި ބުނެފައިވަނީ ކައުސިލަރެއްގެ މަގާމު ހުސްވާތާ ދެ މަސް ތެރޭ އިންތިހާބު ބާއްވަން ޖެހުމުން، ކައުންސިލްތަކުގެ އުމުރު ތެރޭގައި މެންބަރުންގެ ގޮނޑި ހުސްވާ ހާލަތްތައް އިތުރުވުމުގެ ސަބަބުން ތަކުރާރުކޮށް ގިނަ އަދަދަށް ބައި-އިލެކްޝަންތައް ބާއްވަން ޖެހުމާއި އޭގެ ސަބަބުން އެކަމަށް ކުރަން ޖެހޭ ހަރަދުތައް އިތުރުވުމެވެ.

މެންބަރު އިސްމާއީލް ސަރުކާރުގެ ފަރާތުން މި ބިލަށް ގެނައުމަށް ހުށަހެޅި އިސްލާހުގެ ތެރޭގައި ކައުންސިލެއްގެ ގޮނޑި ހުސްވާތާ ގިނަވެގެން 183 ދުވަސް ނުވަތަ ހަ މަސް ތެރޭ އިންތިހާބު ބޭއްވުމަށާއި ނަމަވެސް ގާނޫނީ އަދަދު ހަމަވާ މިންވަރަށް މެންބަރުން ނެތް ހާލަތެއްގައި ގިނަ ވެގެން ދެ މަސް ތެރޭ އިންތިހާބު ބޭއްވުން ހިމެނެއެވެ.

އަދި އިތުރަށް އެ އިސްލާހުގައި ބުނެފައިވަނީ އެއްވެސް ސަބަބަކާ ހުރެ އަތޮޅު ކައުންސިލްގެ ނައިބު ރައީސް، ރަށު ކައުންސިލްގެ ނައިބު ރައީސް އަދި ސިޓީ ކައުންސިލްގެ ޑެޕިއުޓީ މޭޔަރުގެ މަގާމު ހުސްވެއްޖެނަމަ، އެ މަގާމު ހުސްވާތާ 30 ދުވަހުގެ ތެރޭގައި އެ މަގާމަށް އަލުން މެންބަރަކު އިންތިޚާބުކުރަންޖެހޭ ކަމަށާއި ނަމަވެސް އެ ތިން މަގާމު ހުސްވާއިރު، އެ ތިން ކައުންސިލްގެ ރައީސްކަމުގެ މަގާމު ވެސް ހުސްވެފައިވާނަމަ، އެ ތިން ކައުންސިލުގެ ނައިބުރައީސްގެ މަގާމު ހުސްވާތާ ގިނަވެގެން ހަތް ދުވަހުގެ ތެރޭގައި އެ މަގާމަށް އަލުން މެންބަރަކު އިންތިޚާބުކުރަންވާނެ ކަމަށެވެ.

އޭގެ އިތުރުން ކައުންސިލް އިންތިހާބުގެ ގާނޫނަށް އިސްލާހު ގެނައުމުގެ ބިލަށް ގެންނަ އިސްލާހުގައި ދެ ބައި-އިލެކްޝަން ދެމެދު އެންމެ ކުރު މުދައްތަކީ 120 ދުވަސް ނުވަތަ ހަތަރު މަސްދުވަސް ކަމަށް ވެސް މި އިސްލާހުގައި ބުނެފައިވެއެވެ.

މިހާރު ޤާނޫނު އޮންނަ ގޮތުން ކައުންސިލަރަކު ނުވަތަ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރަކު މަގާމުން އިސްތިއުފާ ދެއްވައިފިނަމަ، ނުވަތަ އެނޫންވެސް ގޮތަކުން ގޮނޑި ހުސްވެއްޖެނަމަ، ގޮނޑިއަށް މެންބަރުން އިންތިޚާބުކުރުމަށް ބާއްވަންޖެހޭ ބައި-އިލެކްޝަންތައް، 60 ދުވަހުގެ ތެރޭގައި ބާއްވަންޖެހޭއިރު ކޮންމެ ދާއިރާއެއްގެ ބައި-އިލެކްޝަނަކަށް އެވްރެޖުކޮށް ދައުލަތުން 200،000 ރުފިޔާ ޚަރަދުކުރާ ކަމަށް އިލެކްޝަން ކޮމިޝަނުން ބުނެއެވެ.

ގާނޫނަށް މި ހުށަހެޅި އިސްލާހާއެކު ބައި އިލެކްޝަންތަކަށް ދައުލަތުން ކުރާ ހަރަދުތައް ކުޑަވާނެއެވެ.