މެލޭޝިޔާގެ ގައުމީ އެއާލައިންގެ ދަތުރުތައް އަނެއްކާވެސް ރާއްޖެއަށް

މެލޭޝިޔާގެ ގައުމީ އެއާލައިންގެ ދަތުރުތައް ރާއްޖެއަށް އަލުން ފެށުމަށް ނިންމާފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.

އެމްއޭސީއެލް އިން މިފަދައިން ބުނެފައިވަނީ އެ ކުންފުނިން ނެރުނު ނޫސް ބަޔާނެއްގައެވެ. އެ ބަޔާނުގައި ބުނެފައިވަނީ މެލޭޝިއާގެ ޤައުމީ އެއާލައިން މެލޭޝިއާ އެއާލައިންސްގެ ދަތުރުތައް އަލުން ދިވެހިރާއްޖެއަށް ފެށުމަށް ނިންމާފައިވާ ކަމަށާއި އެ އެއާލައިންސް އިން ފަށާ ދަތުރުތަކުގެ ފުރަތަމަ ފުލައިޓް ވެލާނާ އިންޓަރނޭޝަނަލް އެއާޕޯޓު(ވީއައިއޭ) އަށް 1 އޮގަސްޓް 2024 ވާ ބުރާސްފަތި ދުވަހުގެ ހެނދުނު ޖެއްސުމަށް ހަމަޖެހިފައިވާ ކަމަށެވެ.

މި އެއާލައިންގެ ދަތުރުތައް ހަފްތާގެ 7 ދުވަހު ކުރުމަށް ހަމަޖެހިފައިވާ ކަމަށާއި މި ދަތުރުކުރުމަށް ބޭނުންކުރާނީ ބޮއިން 737 ޑޭޝް 8 މަރުކާގެ 174 ސީޓުގެ ފްލައިޓެއް ކަމަށް ވެސް އެމްއޭސީއެލުން ބުނެއެވެ.

އޭގެ އިތުރުން އެމްއޭސީއެލުން ބުނީ މި އެއާލައިން އިން މެލޭޝިއާގެ ކުއަލަލަމްޕޫރް އިން ވެލާނާ އިންޓަނޭޝަނަލް އެއާޕޯޓަށް ދަތުރުކުރާ ފުރަތަމަ ފްލައިޓަށް މަރުހަބާ ކިޔުމަށްޓަކައި ހާއްސަ ރަސްމިއްޔާތެއް ބޭއްވުމަށް ހަމަޖެހިފައިވާ ކަމަށާއި މި ރަސްމިއްޔާތުގައި ޓޫރިޒަމް މިނިސްޓްރީ، އެމްއޭސީއެލް، އެމްއެމްޕީއާރްސީގެ އިތުރުން މެލޭޝިއާ އެއާލައިންސްގެ އިސް ބޭފުޅުން ބައިވެރިވެވަޑައިގަތުމަށް ހަމަޖެހިފައިވާ ކަމަށެވެ.

މެލޭޝިޔާގެ ގައުމީ އެއާލައިނުން ރާއްޖެއަށް ދަތުރުތައް ފެށުމަށް މި ހަމަޖެހުނީ 7 އަހަރަށްފަހުއެވެ. އެ އެއާލައިނުން ރާއްޖެއަށް އެންމެ ފަހުން ދަތުރެއް ކޮށްފައިވަނީ 2017 ވަނަ އަހަރުގައެވެ.