ރާއްޖޭގެ ނަން މަޝްހޫރު ދެކޮލެޖް ކަމަށްވާ އެވިޑް ކޮލެޖް އާއި ކްލިކް ކޮލެޖުން ގަވައިދާއި ހިލާފަށް ކޯސްތައް ހިންގަމުން ގެންދާތީ މޯލްޑިވްސް ކޮލިފިކޭޝަންސް އޮތޯރިޓީން އެދެކޮލެޖަށް ފިޔަވަޅު އަޅައިފިއެވެ.
އެމްކިއުއޫއިން ގެޒެޓް ކޮށްފައިވާ އިއުލާނެއްގައި ބުނީ އެވިޑް ކޮލެޖްގައި ހިންގަމުން އަންނަ ގިނަ ޕްރޮގްރާމްތަކެއްގެ ޝަކުވާ އެ އޮތޯރިޓީއަށް ވަނީ ލިބިފައި ކަމަށެވެ. މިގޮތުން ލެކްޗަރަރ އިންނަށް ދޭން ޖެހޭ މުސާރަ ދީފައިނުވާތީ، ދަރިވަރުންގެ އިމްތިޚާން ކަރުދާސްތައް ބައެއް ލެކްޗަރަރއިން މާރކް ނުކުރުމުގެ ސަބަބުން ޕްރޮގްރާމްގެ މުއްދަތު އިތުރުވެ، އެ މުއްދަތަށް ދަރިވަރުން އިތުރަށް ފައިސާ ދައްކަން ޖެހިފައިވާކަން އެމްކިއުއޭއަށް ހުށަހަޅާފައިވާ ޝަކުވާތަކުގެ ތެރޭގައި ފާހަގަކޮށްފައިވެއެވެ. މި ޝަކުވާތަކާ ގުޅިގެން އެމްކިއުއޭއިން ވަނީ އެވިޑް ކޮލެޖްގެ 7 ޕްރޮގްރާމެއްގެ 'ރެންޑަމް ބެޗް އޮޑިޓް' ކުރިއަށް ގެންގޮސްފައެވެ. މި އޮޑިޓްގައި ޕްރޮގްރާމް އެކްރެޑިޓޭޝަން ގަވާއިދާއި ޕްރޮގްރާމް އެކްރެޑިޓޭޝަން ގައިޑްލައިނާ ޚިލާފަށް ގިނަ ކަންތައްތަކެއް އެވިޑް ކޮލެޖުން ކޮށްފައިވާކަން ފާހަގަ ކުރެވިފައިވެއެވެ.
އޭގެތެރޭގައި ޕްރޮގްރާމްތައް ހިންގަނީ ދީފައިވާ ޕްރޮގްރާމް އެކްރެޑިޓޭޝަނާ އެއްގޮތަށް ނޫންކަމާއި ޕްރޮގްރާމް އެކްރެޑިޓޭޝަން ދީފައިވާ ޕްރޮގްރާމްތަކުގެ ކޮންޓެކްޓް އަވަރސް ހަމަނުކޮށް، ދަރިވަރުން ކޮލެޖަށް ޓިއުޓޯރިއަލް ހުށަހެޅުމުން ލެކްޗަރަރ އިން ޓިއުޓޯރިއަލްތައް ނުބަލާ ދަރިވަރުންނަށް ހާޒިރީ ދީފައިވާކަން ފާހަގަކުރެވިފައި ވެއެވެ. އަދި ކޮންޓެކްޓް އަވަރސް ހަމަނުކޮށް ދަރިވަރުންގެ ނަތީޖާ ދީފައިވާކަންވެސް ވަނީ ފާހަގަވެފައެވެ.
ޕްރޮގްރާމްތަކުގެ ކޮންޓެކްޓް އަވަރސް ހަމަކޮށްފައިވޭތޯ ބެލުމަށްޓަކައި ކޮލެޖްގެ ޕާރޓްޓައިމް ލެކްޗަރަރއިންގެ ހާޒިރީ ޝީޓްތަކާއި މުސާރަ ޝީޓްތައް ބެލުމަށް 5 ޖޫން 2024 ގައި އެދުމުން މިއަދާ ހަމައަށް މުސާރަ ޝީޓްތައް ދައްކާފައި ނުވާކަން ވެސް އެމްކިއުއޭ އިން ވަނީ ފާހަގަ ކޮށްފައެވެ.
"ރެންޑަމް ބެޗް އޮޑިޓް" ކުރިއަށް ގެންދެވުނު އިރު ފާހަގަކުރެވިފައިވާ މައިގަނޑު 7 ކަމަކީ ޕްރޮގްރާމް އެކްރެޑިޓޭޝަން ގަވާއިދާއި ޕްރޮގްރާމް އެކްރެޑިޓޭޝަން ގައިޑްލައިނާ ޚިލާފް ކަންތައްތަކެއްކަމަށް ވުމާއި އަދި 2017 އިން ފެށިގެން އެކި އަހަރު މަތިން ކޮލެޖަށް އެކި ކަންކަން ރަނގަޅުކުރުމަށް އެމްކިއުއޭއިން ލިޔުމުން އެންގުމުން ވެސް ކަންކަން ރަނގަޅު ކޮށްފައި ނުވުމުން އެވިޑް ކޮލެޖަށް ފިޔަވަޅު އަޅަން ނިންމީ ކަމަށް އެމްކިއުއޭއިން ބުނެއެވެ.
އެވިޑް ކޮލެޖަށް އަޅަން ނިންމި ފިޔަވަޅުތަކަކީ ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑާ ޚިލާފަށް އަދި ޕްރޮގްރާމް އެކްރެޑިޓޭޝަނާ ޚިލާފަށް ހިންގާ ކަންކަން ރަނގަޅު ކުރުމަށް އެންގުމާއި އިތުރު ޕްރޮގްރާމަކަށް އެކްރެޑިޓޭޝަނާއި ހިންގުމުގެ ހުއްދަ ދޫނުކުރުމާއި އެ ޕްރޮގްރާމެއް ހިންގަނީ ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑާ އެއްގޮތަށް ނޫންކަމާއި، ޕްރޮގްރާމް އެކްރެޑިޓޭޝަންގެ މިންގަނޑުތަކާ ޚިލާފަށްކަން އާންމުކޮށް އިޢުލާނުކުރުމެވެ.
އެވިޑް ކޮލެޖަށް ފިވަޅު އެޅި ނަމަވެސް، މިހާރު އެވިޑް ކޮލެޖުން ކުރިއަށްދާ ބެޗްތައް ކުރިއަށް ގެންދެވޭނެކަމާއި މިފިޔަވަޅުތަކުގެ ސަބަބުން ކިޔަވަމުންދާ ދަރިވަރުންނަށް އެއްވެސް އަސަރެއް ނުކުރާނެ ކަމަށް ވެސް އިއުލާންގައި ވެއެވެ.
ކްލިކް ކޮލެޖާއި ގުޅޭ ގޮތުން އެމްކިއުއޭއިން ކުރި އިއުލާނުގައި ބުނީ ކްލިކް ކޮލެޖަށް އީ-ލަރނިންގ ޑެލިވަރީ މޮޑަލިޓީގެ ދަށުން އެއްވެސް ޕްރޮގްރާމެއް ހިންގުމުގެ ހުއްދަ އެމްކިއުއޭއިން ދީފައިނުވާ ކަމަށާއި އެހެން ނަމަވެސް، ކޮވިޑް-19 ގެ ވަބާ އާ ގުޅިގެން، ދިވެހިރާއްޖޭގެ ހުރިހާ މަތީ ތަޢުލީމުދޭ މަރުކަޒުތަކަށް އީ-ލަރނިންގ ޑެލިވަރީ މޮޑަލިޓީގައި، އެ މަރުކަޒުތަކުން އެޕްރޫވް ކޮށްފައިވާ ޕްރޮގްރާމްތައް ހިންގުމުގެ އާއްމު ހުއްދަ 28 އެޕްރީލް 2022 ގައި ވާނީ ބާޠިލުކުރިކަން ޢާއްމުކޮށް އަންގާ އިޢުލާންކުރުމަށް ފަހު މަތީ ތަޢުލީމުދޭ މަރުކަޒުތަކަށް ވެސް އަންގާފައިކަން އެމްކިއުއޭގެ އިއުލާންގައި ފާހަގަ ކޮށްފައި ވެއެވެ.
މި އިޢުލާނާއެކު ކޮވިޑް-19 ގެ ހާލަތުގައި ދިން ހުއްދަ ބާޠިލުވުމާއެކު ކްލިކް ކޮލެޖުން ކޮވިޑް-19 ގެ ކުރިން އީ-ލަރނިންގ ޑެލިވަރީ މޮޑެލިޓީގެ ދަށުން އެއްވެސް ޕްރޮގްރާމަކަށް ހުއްދަ ނާގާފައިނުވުމާއެކު އިތުރަށް އީ-ލަރނިންގ މޮޑަލިޓީގެ ދަށުން ޕްރޮގްރާމްތަކަށް އިތުރު އިންޓޭކެއް ނަގައިގެން ކުރިއަށް ނުގެންދެވޭނެ ކަމަށާއި ނަމަވެސް، 28 އެޕްރީލް 2022 ގެ ކުރިއަށް ފަށާފައިވާ ޕްރޮގްރާމްތަކަށް ކޮވިޑް-19 ގެ ދަށުން ދީފައިވާ ހުއްދައާ އެކު އެ ޕްރޮގްރާމްތައް އީ-ލަރނިންގ މޮޑަލިޓީގައި ކުރިއަށް ގެންދެވޭނެއެވެ.
ކްލިކް ކޮލެޖުން ހިންގަމުން އަންނަ 'ބެޗްލަރ އޮފް ބިޒްނަސް މެނޭޖްމަންޓް' ޕްރޮގްރާމަކީ އެމްކިއުއޭއިން 2019 ވަނަ އަހަރު 'ފޭސް-ޓު-ފޭސް' ކޮށް ހިންގަން ހުއްދަ ދީފައިވާ އަދި 10 ޖުލައި 2024 ގައި 'ފޭސް-ޓު-ފޭސް' ކޮށް ހިންގުމަށް އެކްރެޑިޓޭޝަން ދީފައިވާ ޕްރޮގްރާމެކެވެ. ނަމަވެސް، މިހާތަނަށް މި ޕްރޮގްރާމް ކްލިކް ކޮލެޖުން އިސްތިހާރުކޮށް ހިންގަމުން އަންނަނީ އީ-ލަރނިންގ ޑެލިވަރީ މޮޑަލިޓީންކަން އެމްކިއުއޭއަށް ދަރިވަރުން ހުށަހަޅާފައިވާ ޝަކުވާތަކުން ފާހަގަކުރެވޭ ކަމަށް އެމްކިއުއޭ އިން ބުނެއެވެ.
ފޭސް-ޓު-ފޭސް ކޮށް ހިންގުމަށް އެޕްރޫވަލް ދީފައިވާ އިތުރު ޕްރޮގްރާމްތައް އީ-ލަރނިންގ ޑެލިވަރީ މޮޑަލިޓީގެ ދަށުން ހިންގުމަށް އިސްތިހާރުކޮށްފައިވާކަން ކްލިކް ކޮލެޖްގެ އިންސްޓަގްރާމް ޕޭޖުންނާއި ކްލިކް ކޮލެޖްގެ ވެބްސައިޓުން އެމްކިއުއޭއަށް ވަނީ އެނގިފައި ކަމަށާއި އަދި 18 ޖުލައި 2024 ވަނަ ދުވަހު ކޮލެޖުގެ އިސްވެރިންނާއެކު ބޭއްވުނު ބައްދަލުވުމުގައި މިކަންކަން ވަނީ އެމްކިއުއޭއިން ކަށަވަރުކޮށްފައި ކަމށް ވެސް އިއުލާންގައި ވެއެވެ.
އެއީ ޕްރޮގްރާމް އެކްރެޑިޓޭޝަން ގަވާއިދާއި ޕްރޮގްރާމް އެކްރެޑިޓޭޝަން ގައިޑްލައިނާ ޚިލާފް ކަންތައްތަކެއްކަމަށް ވުމާއެކު، އެކޮލެޖަށް ފިޔަވަޅު އަޅަން ނިންމީ ކަމަށް އިއުލާންގައި ވެއެވެ.
ޕްރޮގްރާމް ހުއްޓުމަށް އެންގުމާއި ސަނަދު ދިނުމުގެ ހުއްދަ ދޫނުކުރުމާއި އަދި އެ ޕްރޮގްރާމެއް ހިންގަނީ ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑާ އެއްގޮތަށް ނޫންކަމާއި، ޕްރޮގްރާމް އެކްރެޑިޓޭޝަންގެ މިންގަނޑުތަކާ ޚިލާފަށްކަން އާންމުކޮށް އިޢުލާނުކުރުމެވެ.
މިއަދުގެ ދެވަނަ އެކްސިޑެންޓު: ދެ މީހަކަށް ފަރުވާ ދެނީ
އިންޑިއާއިން ހިތަދޫ ޕޯޓަށް 300 މެޓްރިކް ޓަނުގެ ކާގޯ
ގާނޫނު މުގުރަން މި ސަރުކާރުން ފުރުސަތެއް ނުދޭނެ: ނައިބު ރައީސް
އެމެރިކާގެ ޖޯޖިއާގެ ސްކޫލެއްގައި ދިން ބަޑީގެ ހަމަލާގައި ޝައްކުކުރެވޭ ކުއްޖާގެ ބައްޕަ ހައްޔަރުކޮށްފި
