ޞަދަގާތްކުރުމަކީ މުދަލުގައި ބަރަކާތްލައްވާ މުދާ ރައްކާތެރިކޮށްދެއްވާނެކަމެއް: ޚުތުބާ

ޞަދަގާތްކުރުމަކީ މުދަލުގައި ބަރަކާތްލައްވައި މުދާ ރައްކާތެރިކޮށްދެއްވާނެކަމެއްކަމަށް މިއަދުގެ ހުކުރު ޚުތުބާގައި ބުނެފިއެވެ.

ޚުތުބާގައި ބުނެފައިވަނީ ރިޒްގް ހޯދުމަށްޓަކައި މަސައްކަތް ކުރުމަކީ الله ސުބުހާނަހޫ ވަތައާލާ އެކަލާނގެ މަހްލޫގުންގެ ކިބައިގައި ލައްވާފައިވާ ފިތުރީ ކަމެއްކަމަށާއި ދޫނި ސޫފާ ސޫފިވެސް ހެނދުނު އެ ސޮރުމެން ހާލިތަކުން އުދުހިގެން ދަނީ ރިޒްގެ ހޯދުމަށްކަމަށެވެ. އެގޮތުން ރިޒްގް ހޯދުމުގައި ކާމިޔާބު މީހަކީ މާތް الله އާ ވަކީލުކޮށް އެކަލާނގެ ހަޟްރަތުން ތައުފީގް ލިބުން އެދި މަސައްކަތް ކޮށްގެން އޭނާގެ ހަޔާތްް އާރާސްތުކުރާ މީހާކަމަށް ޚުތުބާގައި ބުނެފައިވެއެވެ.

ޚުތުބާގައިވާގޮތުން މިއަދު މިވަނީ ދިރިއުޅުމުގެ ވައްޓަފާޅި މުޅީން ބަދަލުވެފައެވެ. އެގޮތުން މީސްތަކުންގެ މުހުތާދުތައް ގިނަވެފައިވާކަމަށާއި އިއްޔެ ކޮންމެހެން ބޭނުން ނޫން ކަންތައްތައް މިއަދު މިވަނީ ޟަރޫރީ ކަންކަމަށް ބަދަލުވެފައިކަމަށް ހުކުރު ޚުތުބާގައި ބުނެފައިވެއެވެ.

ޚުތުބާގައިބާގޮތުން މީގެ އެއް މިސާލަކީ އެއާކޮންޑިޝަންއެވެ. އެގޮތުން މީގެ އަހަރުތަކެއް ކުރިން އެއީ ޟަރޫރީ ބޭނުމެއް ނޫންކަމަށާއި ނަމަވެސް މިއަދު އެއާ ނުލައި އުޅެވެން ނެތްކަން ފާހަގަކޮށް ޚުތުބާގައި ބުނެފައިވަނީ މޯބައިލް ފޯނާއި ކޮމްޕިއުޓަރު ފަދަ ވަސީލަތްތައްވެސް އެފަދަކަމަށެވެ.

މިކަމުގެ ސަބަބުން ކުރާންޖެހޭ ހޭދަތައްް ބޮޑުވެ އާމްދަނީ އިތުރުކުރަން ޖެހެޭކަން ފާހަގަކޮށް ޚުތުބާގައި ބުނެފައިވަނީ މުއުމިނުން ދަންނާން ޖެހޭނެ އެއް ކަމަކީ މާތް الله ކޮންމެ އެއްޗެއްވެސް ހައްދަވާއިރު އެ އެއްޗެއްގެ ރިޒްގް ކަނޑައަޅުއްވާކަމަށެވެ.

"ނަމަވެސް ލިބޭ މިންވަރަށް ބޭނުންތައް ބަހައިލައިގެން ހޭދަކުރުމުގައި އިގްތިޞާދުކުރުމަކީ އިންސާނާގެ މަސްއޫލިއްޔަތެކެވެ. اللهގެ ފޮތަށާއި ކީރިތި ރަސޫލާ ޞައްލަالله އަލައިހިވަޞައްލަމްގެ ސުންނަތަށް ބަލައިފިނަމަ ރިޒްގް ހޯދުމުގައި އޮތް ރަނގަޅު ގޮތް ފެންނާނެއެވެ. އެއީ މާތް اللهއަށް ބިރުވެތިވެ ތަޤްވާވެރިވުމާއި ވަކީލުކުރުމެވެ." ހުކުރު ޚުތުބާގައި ބުނެފައިވެއެވެ.

އަދި ރިޒްގް ތަނަވަސްކޮށްދެއްވައި ރިޒްގުގައި ބަރަކާތްލައްވާ ކަންތައްތަކުގެ ތެރޭގައި ރަހިމުގެ ގުޅުން ދެމެހެއްޓުމާއި ގާތްތިމާގެ މީހުންނަށް ހެޔޮ ފޯރުވުން ހިމެނޭކަން ފާހަގަކޮށް ޚުތުބާގައިވަނީ اللهގެ އަޅުންނާ ކުރިމަތިވެފައިވާ މާލީ ބުރަތަކުން އެމީހުން ސަލާމަތްކޮށްދޭން މަސައްކަތް ކުރުމށް ގޮވާލައްވާފައެވެ.

"އަދި ޞަދަގާތްތަކުން ޔަތީމުންނާއި މިސްކީނުންގެ ކަރުނަތައް ފުހެދޭށެވެ. ޞަދަގާތަކީ މުދަލުގައި ބަރަކާތްލައްވައި މުދާ ރައްކާތެރިކޮށްދެއްވާނެކަމެކެވެ." ޚުތުބާގައި ބުނެފައިވެއެވެ.

މީގެއިތުރުރުން ރިޒުގު ހޯދާން އެދޭ މީހާ ހީވާގިކަމާއެކު މަސައްކަތް ކުރާން ޖެހޭކަން ފާހަގަކޯށް ޚުތުބާގައި ބުނެފައިވަނި ހައްގުގޮތުގައި ރިޒްގް ހޯދާން މަސައްކަތްކުރާ މީހާ اللهގެ މަގުގައި ޖިހާދުކުރާ މީހެއް ފަދަކަމަށެވެ. އަދި އޭނާއަށް الله ރިޒްގް ތަނަވަސްކޮށްދެއްވާނެކަމަށްވެސް ބުނެފައިވެއެވެ.

ޚުތުބާގައި އިތުރަށް ބުނެފައިވަނީ އިސްލާމްދީނުގައި މަސައްކަތަކީވެސް އަޅުކަމެެއްކަމަށެވެ. އެގޮތުން މާތް اللهގެ ހަޟްރަތުގައިވެސް އަދި ދުނިޔޭގެ ނަޒަރުގައިވެސް މަސައްކަތްކުރާ މީހާއާއި މަސައްކަތް ނުކުރާ މީހާ ހަމަހަމަވެގެންނެއް ނުވާކަން ފާހަގަކޮށް ޚުތުބާގައި ބުނެފައިވަނީ މަސައްކަތް ކުރާ މީހާއަށް اللهގެ ރުހިވޮޑިގަތުން ލިބޭނެކަމަށާއި މީހުންގެ ލޯބްބާއި އިހްތިރާމް ވެސް ލިބޭނެކަމަށެވެ. އަދި މަސައްކަތް ނުކުރާ މީހާއީ الله ރުއްސަވާ މީހެއް ނޫންކަމަށްވެސް ބަޔާންކޮށްފައިވެއެވެ.

"އަދި އޭނާ ވާނީ އޭނާގެ އަމިއްްލަ ނަފްސަށާއި އަނބިދަރީންނަށް ޖެހިފައިވާ ބުރައަކަށެވެ. ދުންޔަވީ ހަޔާތް ބާއްޖަވެރިވެ އޭގެ ފޮނިކަމާއި މީރުކަން ފުރިހަމަވާނީ ތިމާއަށާއި އެހެން މީހުންނަށް ފައިދާ ހުރި ހަލާލު މަސައްކަތެއްކޮށް އާމްދަނީ ހޯދައިގެންނެވެ." ޚުތުބާގައި ބުނެފައިވެއެވެ.