ތިނަދޫގައި ބަންގަލަދޭޝް މީހުން ބަންގްލަދޭޝް ސަރުކާރާ ދެކޮޅަށް މުޒާހަރާކުރަނީ

ބަންގްލްދޭޝްގައި ސަރުކާރު ވަޒީފާތަކަށް މީހުން ޢައްޔަން ކުރުމުގައި އަމަލު ކުރަމުންދާ ކޯޓާ ނިޒާމާ ދެކޮޅަށް ކުރަމުންދާ މުޒާހަރާތަކުގައި ބައިވެރިވުމުގެ ގޮތުން ގދ ތިނަދޫގައި ތިބި ބަންގަލަދޭޝް މީހުން މުޒާހަރާކޮށްފިއެވެ.

މި މުޒާހަރާ ކުރިއަށް ގެންދިޔައީ ސުލްހަވެރިކަމާއިއެކު އެވެ. މުޒާހަރާގައި އެއްވެސް ހަމަނުޖެހުމެއް ހިނގާފައެއް ނުވެއެވެ. މިއީ ބަންގްލަދޭޝްގެ އެކި ކަންކޮޅުތަކުގައި ހިންގަމުންދާ މުޒާހަރާތަކުގައި ބައިވެރިވުމުގެ ގޮތުން ބޭއްވި އެއްވުމެކެވެ.

ބަންގްލަދޭޝްގެ އެކި ކަންކޮޅުތަކުގައި ހިންގަމުންދާ ހަމަނުޖެހުންތައް ހުއްޓުވުމުގެ ގޮތުން އެ ޤައުމުގެ އަސްކަރިއްޔާއިން ވަނީ ކާފިއު އިޢުލާނު ކޮށްފައެވެ. މުޒާހަރާގެ ބައިވެރިންގެ ތެރޭގައި ގިނައީ އެ ޤައުމުގެ ކޮލެޖުތަކާއި ޔުނިވަރސިޓީތަކުގައި މަތީ ތަޢުލީމު ހާސިލު ކުރަމުންދާ ދަރިވަރުންނެވެ. މުޒާހަރާތައް ރޫޅައިލަން ފުލުހުންނާއި ސިފައިން ބާރުގެ ބޭނުން ކުރުމާ ގުޅިގެން މަރުވި މީހުންގެ ޢަދަދު މިހާރު ވަނީ 105 އަށް އުފުލިފައެވެ. ބަންގްލަދޭޝްގެ 64 ޑިސްޓްރިކްޓުގެ ތެރެއިން 47 ޑިސްޓްރިކްޓަކަށް މުޒާހަރާތައް ފެތުރިފައިވާއިރު, މުޒާހަރާގެ ބައިވެރިންނާއި ފުލުހުންނާ ދެމެދު ހިނގަމުންދާ ކުރިމަތިލުންތަކުގައި ޒަޚަމުވި މީހުންގެ ޢަދަދު 1,500 އަށް އުފުލިފައިވާ ކަމުގައި އެ ޤައުމުގެ ނޫހެއް ކަމުގައިވާ ޕްރޮތޯމް އާލޯން ރިޕޯޓު ކުރެއެވެ.

މުޒާހަރާތައް ހުއްޓުވުމުގެ ގޮތުން ބަންގްލަދޭޝް ސަރުކާރުން ވަނީ ކޮލެޖުތަކާއި ޔުނިވަރސިޓީތައް ވަކި މުއްދަތެއް ނެތް ގޮތަށް ބަންދު ކޮށްފައެވެ. އަދި, މޮބައިލް އިންޓަރނެޓުގެ ޚިދުމަތްތަކާއި މުވާސަލާތީ ޚިދުމަތްތައް ކަނޑައިލާފައެވެ. ހަމަނުޖެހުންތަކާ ގުޅިގެން ބަންގްލަދޭޝްގައި ޚަބަރުފަތުރާ ގިނަ ނޫސްތަކުގެ ވެބްސައިޓުންތައް ވެސް އަދާހަމަ ކުރުން ހުއްޓައިލާފައިވާ ކަން ފާހަގަ ކުރެވެއެވެ.