ދެކުނު އިތިޔޯޕިޔާގެ ބިންގަނޑު ކަޑައިގެން ދިއުމުގެ ހާދިސާގައި މަރުވި މީހުންގެ އަދަދު 229 އަށް

ދަކުނު އިތިޔޯޕިޔާގެ ގޯފާ ސަރަޙައްދުގައި ހޯމަ ދުވަހު ހިނގި ބިންގަނޑު ކަނޑައިގެން ދިއުމުގެ ހާދިސާގައި މަރުވި މީހުންގެ އަދަދު 229 އަށް އަރައިފިކަމަށް އެ ސަރަޙައްދުގެ ސަރުކާރުގެ އިސް އޮފިޝަލަކު އަންގާރަ ދުވަހު ކަށަވަރުކޮށްދީފިއެވެ.

ދަކުނު ސަރަޙައްދުގެ ސްޓޭޓް ރެޕްރެޒެންޓޭޓިވް އަލެމައެހު ބަވްދީ ނެރުނު ބަޔާނެއްގައި ބުނެފައިވަނީ މިހާތަނަށް މަރުވެފައިވާ މީހުންގެ އަދަދަކީ 229 ކަމަށާއި، އޭގެ ތެރޭގައި 148 ފިރިހެނުންނާއި 81 އަންހެނުން ހިމެނޭ ކަމަށެވެ. އަދި ސަލާމަތްކުރުމުގެ މަސައްކަތް ދަނީ ކުރިއަށް ކަމަށްވެސް އޭނާ ބުނެފައިވެއެވެ.

އަނަޑޯލު ނިއުސް އެޖެންސީން ހާމަކޮށްފައިވާ ގޮތުގައި ހާދިސާ ހިނގި ސަރަޙައްދަކީ މެޝިނަރީ ބޭނުންކޮށްގެން ވަދެނުކުމެވޭ ވަރަށް އުނދަގޫ ސަރަޙައްދަކަށްވާތީ، މަރުވާ މީހުންގެ އަދަދު އިތުރަށް އަރައިފާނެކަމަށް އޮތޯރިޓީތަކުން ބުނެފައިވެއެވެ. ސަލާމަތްކުރުމުގެ މަސައްކަތް ކުރިއަށްދަނީ އަތުން ކޮނެގެން ކަމަށް ނަން ހާމަނުކުރުމަށް އެދުނު ސަރަޙައްދުގެ އޮފިޝަލަކު ބުނެފައިވެއެވެ.

ސަރުކާރުގެ ފަނާ ބްރޯޑްކާސްޓިންގ ކޯޕަރޭޝަނަށް މަޢުލޫމާތު ދެމުން އެހެން އޮފިޝަލެއް ކަމަށްވާ މިސިކިރު މިތިކު ބުނެފައިވަނީ ސަލާމަތްކުރުމުގެ މަސައްކަތުގައި އުޅުނު މީހުންގެ ތެރެއިންވެސް ބައެއް މީހުން މަރުވެ، އަދި ބައެއް މީހުން ގެއްލިފައިވާ ކަމަށެވެ.

މި ނުރައްކާތެރި ހާދިސާއާ ގުޅިގެން ގޯފާގެ ގަވަރުނަރު ދަގްމަވީ އަޔެލެ ނެރުނު ބަޔާނެއްގައި ބުނެފައިވަނީ މުސްތަޤުބަލުގައި މިފަދަ ކާރިސާތަކާ ކުރިމަތިލުމަށް މުޖުތަމަޢު ތައްޔާރުވެފައި ތިބުމުގެ މުހިންމުކަން ފާހަގަކޮށްފައެވެ.

ޒޯނަލް ކޮމިއުނިކޭޝަންސް ޑައިރެކްޓަރޭޓްގެ އޮފިޝަލަކު ބުނެފައިވަނީ ހާދިސާ ހިނގީ މެންދުރު ކައިރިވެފައިވަނިކޮށް، އާދީއްތަ ދުވަހުގެ ރޭ ވެހުނު ބޯ ވާރޭގެ ސަބަބުން ދިމާވި ގެއްލުންތައް ބަލަން އެއްވެފައި ތިބި ބަޔަކަށް ކަމަށާއި، ބިންގަނޑު ކަނޑައިގެން ދިއުމުގެ ސަބަބުން އެ މީހުން ވަޅުލެވުނީ ކުނޑިތަކުގެ ދަށުގައި ކަމަށެވެ.

އޭނާ އިތުރަށް ބުނެފައިވަނީ ސަލާމަތްކުރުމުގެ މަސައްކަތުގައި އުޅުނު މީހުންގެ ތެރޭގައި ހިމެނޭ ސަރަޙައްދުގެ އޮފިޝަލުންނާއި، މުދައްރިސުންނާއި، ފުލުހުންގެ ތެރެއިންވެސް ބައެއް މީހުން މަރުވެފައިވާ ކަމަށެވެ. އަދި ސަލާމަތްކުރުމުގެ މަސައްކަތް އަދިވެސް ކުރިއަށްދާ ކަމަށާއި، މި ހާދިސާގެ ފުރިހަމަ އަސަރު އަދި ވަޒަންކުރެވިފައި ނުވާ ކަމަށްވެސް އޭނާ ބުނެފައިވެއެވެ.