ޣައްޒާ ހަނގުރާމައާ ދެކޮޅަށް އެމެރިކާގެ ކޮންގްރެސް ގޯތިތެރޭގައި ޔަހޫދީ އެކްޓިވިސްޓުން ހިންގި މުޒާހަރާއަކުން ގިނަޢަދަދެއްގެ މީހުން ހައްޔަރުކޮށްފިއެވެ.
ވޮޝިންގްޓަން ޑީސީގައި ހުންނަ އެމެރިކާގެ ކޮންގްރެސް އިމާރާތުގައި އިއްޔެ އަންގާރަ ދުވަހު ހިންގުނު މުޒާހަރާއެއްގައި ބައިވެރިވި ސަތޭކަ އެތައް ޔަހޫދީ އެކްޓިވިސްޓުންނެއް ވަނީ ހައްޔަރުކޮށްފައެވެ. މި މުޒާހަރާ ކުރިއަށް ގެންދިޔައީ އިސްރާއީލުގެ ބޮޑުވަޒީރު ނެތަންޔާހޫ މިއަދު ކޮންގްރެސްގައި ދައްކަން ހަމަޖެހިފައިވާ ވާހަކަފުޅުގެ ކުރިން ދުވަހެވެ.
މި މުޒާހަރާއާ ގުޅޭގޮތުން ޖޫވިޝް ވޮއިސް ފޮރ ޕީސްގެ ކޮމިއުނިކޭޝަންސް ޑިރެކްޓަރ ސޯނިޔާ މެއަރސަން-ނޮކްސް ވަނީ އަލްޖަޒީރާއަށް ބަޔާނެއް ދެއްވާފައެވެ. އިސްރާއީލުގެ ސިޔާސަތުތަކާ ދެކޮޅަށް ފާޅުގައި އަޑުއުފުލާ ޖޫވިޝް ވޮއިސް ފޮރ ޕީސް މި މުޒާހަރާގައި ބައިވެރިވުމުން ދައްކުވައިދެނީ ޣައްޒާގެ ހަނގުރާމައާ ގުޅޭގޮތުން ޔަހޫދީ މުޖުތަމަޢުގެ ތެރޭގައި ހުރި ތަފާތު ޚިޔާލުތަކެވެ.
މި މުޒާހަރާއާއި ހައްޔަރުކުރުންތަކުގެ ސަބަބުން ނެތަންޔާހޫ މިއަދު ކޮންގްރެސްގައި ދައްކަވާ ވާހަކަފުޅާ ގުޅިގެން އޮތް މާހައުލު އިތުރަށް ހޫނުވެ، އެމެރިކާ-އިސްރާއީލު ގުޅުމާއި ޣައްޒާގެ ހާލަތާ ގުޅޭ ސިޔާސީ ވާހަކަތަކަށް އަސަރުކުރުމަކީ އެކަށީގެންވާ ކަމެކެވެ.