ސައުދީ ލީގު ދޫކޮށް ރަކިޓިޗްގެ ދިރިއުޅުން އަމިއްލަ ގައުމަށް ބަދަލުކޮށްފި

ސައުދީ ޕްރޯ ލީގުގެ ކްލަބް އަލް-ޝަބާބްއާ އެކު ހަދާފައިވާ އެއްބަސްވުން އުވާލުމަށް ފަހު ކުރީގެ މަޝްހޫރު މިޑްފީލްޑަރު އިވާން ރަކިޓިޗް ކްރޮއޭޝިއާގެ ކްލަބަކަށް ބަދަލުވެއްޖެ އެވެ.

އުމުރުން 36 އަހަރުގެ ރަކިޓިޗް ބަދަލުވީ ކްރޮއޭޝިއާ ލީގުގައި ވާދަކުރާ ހެޔުކް ސްޕްލިޓް އަށެވެ.

ރަކިޓިޗް ސައުދީ ލީގަށް ބަދަލުވީ މިިދިޔަ ޖެނުއަރީ މަހު އެވެ. އެ ކްލަބާ އެކު ރަކިޓިޗް ހެދީ ހަ މަސްދުވަހުގެ އެއްބަސްވުމެކެވެ. އެ ކްލަބް ދޫކޮށްލީ ދެފަރާތުން ވާހަކަދައްކައިގެން އެއްބަސްވެގެންނެވެ.

އަލް ޝަބާބަށް ކުޅުނު އަށް މެޗުގައި ރަކިޓިޗް އެއް ގޯލު ޖެހި އެވެ. ލީގުގައި އެޓީމު ނިންމާލީ އަށް ވަނައިގަ އެވެ.

އުފަން ގައުމުގެ ކްލަބަށް ރަކިޓިޗް ބަދަލުވީ އެއް އަހަރު ދުވަހުގެ އެއްބަސްވުމެއްގަ އެވެ. އެ ކްލަބުން އިއްޔެ ވަނީ ރަކިޓިޗްގެ ޓްރާންސްފާ ހާމަކޮށްފަ އެވެ.

ރަކިޓިޗަކީ ކުރިން ސްޕެއިންގެ ސެވިއްޔާ އާއި ބާސެލޯނާގައި މޮޅު ކުޅުމެއް ދެއްކި ކުޅުންތެރިއެކެވެ. މިއީ އޭނާ ކްރޮއޭޝިއާ ލީގުގެ ޓީމަކަށް ބަދަލުވި ފުރަތަމަ ފަހަރެވެ.

ރަކިޓިޗް އުފަންވީ ސްވިޒަލެންޑަށެވެ. އެހެންވެ ކްލަބް ކެރިއަރު ރަކިޓިޗް 2004 ވަނަ އަހަރު ފެށީ ސްވިޒަލެންޑުގެ ކްލަބް ނޯޑްސްޓާން ބަސެލް އިންނެވެ. އޭގެފަހުން ބަސެލް އަދި ޖަރުމަނުގެ ޝާލްކޭ އަށް ކުޅުނެވެ.

ކްރޮއޭޝިއާގެ ގައުމީ ޓީމުގައި ރަކިޓިޗަކީ މޮޅު ކުޅުމެއް ދައްކާފައިވާ ކުޅުންތެރިއެކެވެ. އެގައުމަށް ކުޅުނު 106 މެޗުގައި 15 ގޯލު ޖެހި އެވެ.

ވޯލްޑް ކަޕް 2018 ގެ ފައިނަލަށް ކްރޮއޭޝިއާ ދަތުރުކުރި ފަހަރު ރަކިޓިޗް މޮޅު ކުޅުމެއް ދެއްކި އެވެ.