ކައުންސިލްތަކުގައި ތިއްބަވާ ކައުންސިލަރުންގެ އަދަދު މަދުކޮށް ޚިދުމަތް ފުރިހަމަކުރުމަށް ރައީސުލްޖުމުހުރިއްޔާ ޑރ. މުހައްމަދު މުއިއްޒު އެދިވަޑައިގެންފިއެވެ.
އެމަނިކުފާނު މިފަދައިން ވިދާޅުވީ ނާރެސް އިފްތިތާހުކުރުމާއި، އޮޕަރޭޝަން "ކުރަނގި": ދެވަނަ ފިޔަވަހި އިފްތިތާހުކުރުމަށް މިރޭ ބޭއްވި ޖަލްސާގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
ކުރިއަށް އޮތް ކައުންސިލްތަކާއި ބެހޭ އިންތިހާބު އަންނަން ވާއިރަށް ރައްޔިތުންނަށް އެންމެ އެކަށީގެންވާކަހަލަ ގޮތަކަށް ކަންކަން ބައްޓަން ކުރުމަށް ގާނުނު ތަކާއި ގެނެވޭ ބަދަލުތައް ގެނެސް އެކަން ކުރިއަށް ގެންދަވާނެކަމަށް ރައީސް ވިދާޅުވިއެވެ.
"މިގޮތަށް އާބާދީ ކިތަންމެ ކުޑަ ރަށެއްގައިވެސް ވަރަށް ގިނަ އަދަދެއްގެ މީހުން އިންތިހާބުކޮށްގެން ވަރަށް ގިނަ ޚަރަދުތަކެއް ކޮންމެ ދުވަހަކު ކޮންމެ މަހަކު ކުރަން ޖެހޭ ގޮތަށް ނިޒާމް ބައްޓަންކޮށްފައި އޮތީމައި އޭގެއިން ނިކުންނަން ޖެހޭ ނަތީޖާ އެންމެ ރަނގަޅަކަށް ނުނިކުމޭ" ރައީސް ދރ. މުއިއްޒު ވިދާޅުވިއެވެ.
"އެއަށްވުރެ ރަނގަޅު ޚިދުމަތެއް އަދަދު މަދުކޮށްގެން ކުރިއަށް ގެންދެވޭނެ"ރައީސުލްޖުމުހުރިއްޔާ ޑރ. މުހައްމަދު މުއިއްޒު
"އަޅުގަނޑު ހިތުން 3000 މީހުންނަށްވުރެ ގިނަ ނޫން އާބާދީ އޮންނަ ރަށްރަށުގައި ތިން މީހަކު އިންތިހާބު ކުރީމާ ފުދޭނެ. ކައުންސިލްގެ ރައިސް އަކާއި އިތުރު ދެ ބޭފުޅަކު، އޭގެ ތެރެއިން އެއް ބޭފުޅަކީ އަންހެނުންގެ ފަރާތުން އިންތިހާބު ކުރާ އަންހެނުންގެ ރައީސާއަކަށް ވުމާއި އަދި އެއްބޭފުޅަކީ ޒުވާނުންގެ ފަރާތުން އިންތިހާބު ކުރެވޭ ޒުވާނުންގެ ރައިސް" ރައީސް ޑރ. މުއިއްޒު ވިދާޅުވިއެވެ.
ރައީސް ޑރ. މުއިއްޒު ވިދާޅުވީ އަދަދު މަދުކުރުމަށްފަހު ދެން އެ ލިބޭ ބަޖެޓުގެ ބޮޑު ބައެއް އެކައުންސިލްގައި މަސައްކަތް ކުރާ ސިވިލް ސާވެންޓުންގެ ގިންތި ރަނގަޅުކޮށް ރަނގަޅު މުސާރައެއް ދެވޭގޮތަށް ބައްޓަންކޮށްގެން ހިންގީމައި މުޅި ކައުންސިލްގެ ހުރިހާ މުވައްޒަފުންވެސް އުފާވެރިކަމާއެކީގައި ރަނގަޅު ޚިދުމަތެއް ދޭނެކަމަށެވެ.
"އަދަދު ކުޑަކުރެވިދާނެ، އަދަދު ކުޑަކޮށްގެން ދޭ ޚިދުމަތް އަދި އެއަށްވުރެ މާ ރަނގަޅަށްވެސް ދެވޭނެ،" ރައީސް ޑރ. މުއިއްޒު ވިދާޅުވިއެވެ.
އެމަނިކުފާނު ވިދާޅުވީ ކަންކަން ރަނގަޅު ކުރުމަކީ އަދަދަކުންވާކަމެއް ނޫން ކަމަށާއި ޚިދުމަތް ދެވޭ ގޮތް ފުރިހަމަކުރުމަށް ކަންކަން ރަނގަޅުވާނެކަމަށެވެ. އަދި ކުރަން ޖެހޭ ކަމަކީ ޚިދުމަތް ދިނުމުގައި އިހްލާސްތެރިވެ ހީވާގިވުންކަމަށާއި އެކަން ކުރާކަށް ބައިބޯކުރަން ނުޖެހޭކަމަށެވެ.