ބާސެލޯނާއިން ވިލިއަމްސް ގެންނަން އެހީވާން ސަޕޯޓަރުން ޓިކްޓޮކްގައި ފަންޑްރެއިޒް ކުރަނީ

ޔޫރޯ ޗެމްޕިއަންކަން ހޯދި ސްޕެއިން ޓީމުގައި ވިދާލި ނިކޯ ވިލިއަމްސް ބާސެލޯނާ އަށް ގެންނަން ބޭނުންވާލެއް ބޮޑުކަމުން، އެ ކްލަބުގެ ސަޕޯޓަރުން ޓިކްޓޮކްގައި ފަންޑްރައިޒްކުރަން ފަށައިފި އެވެ.

ރިޕޯޓްތައް ބުނާގޮތުން ބާސެލޯނާގެ ސަޕޯޓަރުން މިހާރު އަންނަނީ އެ ކްލަބުގެ އޮފިޝަލް ޓިކްޓޮކް އެކައުންޓަށް ފައިސާ ހޯދައިދެމުންނެވެ.

އުމުރުން 22 އަހަރުގެ ވިލިއަމްސް މިހާރު ކުޅެނީ ސްޕެއިންގެ އެތުލެޓިކް ބިލްބާއޯ އަށެވެ. ވިލިއަމްސްގެ މަގުބޫލުކަން ބޮޑުވީ ޔޫރޯގައި ދެއްކި މޮޅު ކުޅުމާ އެކު އެވެ. ވިލިއަމްސް ވަނީ ޔޫރޯގައި ޖޯޖިއާ ކޮޅަށް އަދި ފައިނަލް މެޗުގައި އިންގްލެންޑް ކޮޅަށް ގޯލު ޖަހައިފަ އެވެ.

ވިލިއަމްސްއާ އެކު މުބާރާތުގައި މޮޅު ކުޅުމެއް ދެއްކި އަނެއް ކުޅުންތެރިއަކީ ބާސެލޯނާގެ ލަމީން ޔަމާލް އެވެ. ސަޕޯޓަރުން ބޭނުންވަނީ، ޔަމާލްއާ އެކު ވިލިއަމްސް ސްޕެއިން ޓީމުގައި ދެއްކި ކުޅުން ބާސެލޯނާގައި ތަކުރާރު ކުރާށެވެ.

"ސައިން ނިކޯ". "ވީ %100 ނީޑް ނިކޯ"، "ފޯ ނިކޯ ވިލިއަމްސް" ގެ ޓެގުގައި ސަޕޯޓަރުން އަންނަނީ ފަންޑްރައިޒް ކުރުމުގެ ކެމްޕޭނެއް ކުރަމުންނެވެ.

މިދިޔަ އަހަރުތަކުގައި މާލީ ހާލަތު ގޯސްވުމުގެ ސަބަބުން ބޮޑު އަގުގައި ބާސެލޯނާއިން ކުޅުންތެރިން ނުގެނެ އެވެ. މީގެކުރިން އެ ކްލަބަށް ގެނައި ބައެއް ކުޅުންތެރިން ރަޖިސްޓްރީ ކުރުމުގައި ލަސްތަކެއް އައީވެސް ކްލަބުގެ މާލީ ހާލަތު ގޯސްވުމުންނެވެ.

ޓްރާންސްފާމާކެޓުގައި ވިލިއަމްސްގެ އަގު އުޅެނީ 77 މިލިއަން ޑޮލަރަށެވެ. ސަޕޯޓަރުން ޓިކްޓޮކްގައި ފައިސާ ހޯދައިދިނަސް އެއީ ވިލިއަމްސް ގެންނަން ލިބޭނެ ބާރެއް ނޫނެވެ.

މިދިޔަ ސީޒަނުގެ ސްޕެނިޝް ލީގުގައި ބާސެލޯނާ ނިންމާލީ ދެ ވަނައިގަ އެވެ. ލީގު ޗެމްޕިއަންކަން ހޯދި ރެއާލް މެޑްރިޑުން މިހާރު ވަނީ ކިލިއަން އެމްބާޕޭގެ ސޮއި ހޯދާފަ އެވެ. އެމްބާޕޭއާ އެކު ރެއާލް އަންނަ ސީޒަނުގައި ނިކުންނާނީ ވަރަށް ވަރުގަދަކޮށެވެ.

އާ ސީޒަނާ ކުރިމަތިލާއިރު ރެއާލުން އަދި އެއްވެސް ކުޅުންތެރިއެއްގެ ސޮއި ހޯދާފައެއްނުވެ އެވެ. ވިލިއަމްސް އަކީ އެޓީމުން ގެންނަން ބޭނުންވާ ލިސްޓުގައި ހިމެނޭ މުހިއްމު ކުޅުންތެރިއެކެވެ.