މާތް ﷲ އެއްކައުވަންތަކޮށްގެން ނޫނީ ތައުހީދުގެ މަތިވެރި އަގީދާ ހާސިލެއް ނުކުރެވޭނެ: ޚުތުބާ

މާތް ﷲ އެއްކައުވަންތަކޮށްގެން ނޫނީ ތައުހީދުގެ މަތިވެރި އަގީދާ ހާސިލެއް ނުކުރެވޭނެކަމަށް މިއަދުގެ ހުކުރު ޚުތުބާގައި ބުނެފިއެވެ.

މިއަދުގެ ހުކުރު ޚުތުބާގެ މައުޟޫއުއަކީ "ތައުހީދު" މިއެވެ.

ޚުތުބާގައި ބުނެފައިވަނީ އިސްލާމް ދީނުގެ އަސާސަކީ ތައުހީދުކަމަށާއި އެއީ އެންމެ ފުރަތަމަ ﷲ ސުބުހާނަހޫ ވަތައާލާ އެކަލާންގެ އަޅުތަކުންނަށް އެ ކަމަކަށް އީމާންވުމަށް އަމުރުކުރައްވާފައިވާ ކަންތައްކަމަށެވެ.

އަދި އެއީ އެންމެހައި ޖިންނީންނާއި އިންސީން އެ ކަމަށްޓަކައި ހެއްދެވުނު މަގްޞަދުކަމަށްވެސް ޚުތުބާގައި ބުނެފައިވެއެވެ.

ޚުތުބާގައި ބުނެފައިވަނީ ﷲ ސުބުހާނަހޫ ވަތައާލާ ފޮނުއްވި އެންމެހައި ނަބިއްޔުންނާއި ރަސޫލުން ވެސް ވަޑައިގެންނެވީ ތައުހީދުގެ މަތިވެރި އަގީދާ އާއިގެންކަމަށާއި އެކަލާނގެ ބާވައިލެއްވި އެންމެހައި ފޮތްތައް ބާވައިލެއްވުނީ މި މާތް އަސްލުގެ މަތީގައިކަމަށެވެ.

އަދި ތައުހީދަކީ މާތް ﷲސުބުހާނަހޫ ވަތައާލާގެ އެއްކައުވަންތަކަން ގަބޫލުކޮށް ޝިރުކުގެ އެންމެހައި އަމަލަކުން ދުރުހެލިވެ ރައްކައުތެރިވުންކަން ފާހަގަކޮށް ޚުތުބާގައި ބުނެފައިވަނީ މި ގޮތުން ތައުހީދުގެ ބައިތަކުގެ ތެރޭގައި ހިމެނޭ ތިން ބައިގައިވެސް އެކަލާނގެ އެއްކައުވަންތަކޮށްގެން މެނުވީ މި މަތިވެރި އަގިދާ ހާސިލެއް ނުކުރެވޭނެކަމަށް ބުނެފައިވާކަމަށެވެ.

ޚުތުބާގައި ބުނެފައިވަނީ އަޅުތަކުންގެ މައްޗަށްވާ ﷲ ސުބުހާނަހޫ ވަތައާލާގެ އެންމެ މަތިވެރި ހައްގަކީ އެކަލާނގެއަށް ޝަރީކު ނުކޮށް ހުރިހައި މާނައެއްގައި އެކަލާންގެ އެއްކައުވަންތަކުރުންކަމަށެވެ.

"ކިރިތި ޤުރުއާނާއި ކީރިތި ރަސުލާ ﷺގެ ހަދީޘްތަކުގެ އަލީގައި އިލްމުވެރިން ތައުހީދު ބައްސަވާފައިވާއިރު ފުރަތަމަ ބަޔަކީ ރުބޫބިއްޔަތުގައި އެކަލާނގެ އެއްކައުވްނަތަކުރުމެވެ. އެއީ މާތް ﷲ ސުބުހާނަހޫ ވަތައާލާއަށް ހާއްސަވެގެންވާ ކަންކަމުގައި އެކަލާނގެއަށް ޝަރީކުކުރުމުން ދުރުހެލިވުމެވެ. ހަލްގުކުރެއްވުމާއި ދިރުއްވުމާއި މަރުގެންނެވުމާއި ރިޒުގުދެއްވުމާއި ކައުނުގައިވާ ކަންކަން ތަދުބީރުކުރައްވައި ހިންގެވުމާއި މި އެންމެހައި ކަންކަން މިލްކުވެވޮޑިގެންވަނީ ހަމައެކަނި އެކަލާނގެއަށްކަމާއި މިކަންކަމުގައި އެކަލާނގެއަށް އެއްވެސް ބައިވެރިއަކު ނުވާކަމަށް ޝައްކެއް ނެތި ގަބޫލުކުރުމެވެ." ޚުތުބާގައި ބުނެފައިވެއެވެ.

ޚުތުބާގައިވާގޮތުން ތައުހީދުގެ ދެވަނަ ބަޔަކީ ހުރިހާކަމެއް ހަމައެކަނި މާތް ﷲއަށް އަދާކުރުމެވެ.

އެގޮތުން ތައުހީދުލްއުޅުހިއްޔާއަކީ އަޅުކަމުގެ ގޮތުން ކުރެވޭ ހުރިހައި ކަމެއް އެކަލާނގެއަށް ހާސިލްކުރުމާއެކު އަޅުކަމުގެ އެއްވެސް ކަމެއްގައި އެކަލާނގެ ފިޔަވައި އެހްނެ ފަރާތެއް ބައިވެރިކުރުމަކާނުލައި އަޅުކަންކުރުންކަމަށާއި ނަމާދުކުރުމާއި ރޯދަހިފުމާއި ދުއާކުރުމާއި ނަދުރުބުނުމާއި ގުރުބާންކުރުމާއި ބިރުވެރިވުމާއި ކަންކަމުގައި ބާތްގަށް އެދި ދެންނެވުމާއި އަޅުކަމުގެ ގޮތުން ކުރާ މިފަދަ ހުރިހައި އަމަލެއް ހަމައެކަނި އެކަލާނގެއަށް ހާލިސްކުރުންކަމަށް ޚުތުބާގައި ބުނެފައިވެއެވެ.

ޚުތުބާގައި ބުނެފައިވަނީ ﷲ ސުބުހާނަހޫ ވަތައާލާ ފޮނުއްވި އެންމެހައި ނަބީބޭކަލުން އެބޭކަލުންގެ ގައުމުގެ މީސްތަކުންނަށް އެންމެ ބޮޑަށް ގޮައިލައްވާން ޖެހިވަޑައިގަތީ ތައުހީދުގެ މިބައިންކަމަށެވެ.

ތައުހީދުގެ ތިން ވަނަ ބަޔަކީ ތައުހީދުލްއަސްމާއި ވައްސިފާތިކަމަށް ޚުތުބާގައި ބުނެފައިވެއެވެ. އެގޮތުން އެއީ މާތް ﷲގެ އިސްމުފުޅުތަކާއި ސިފަފުޅުތަކުގައި އެކަލާނގެ އެއްކައުވަންތަކުރުންކަމަށާއި އަދި އެންމެ ފުރިހަމަވެގެންވާ މަތިވެރި ނަންފުޅުތަކާއި ސިފަފުޅުތަކެއް ލިބިވޮޑިގެންވަނީ ހަމައެކަނި އެކަލާނގެއަށްކަން ގަބޫލުކުރުންކަމަށް ބަޔާންކޮށްފައިވެއެވެ.

ހުކުރު ޚުތުބާގައި ބުނެފައިވަނީ ތައުހީދުގެ މި ތިން ބައިގައި ވަރުގަދައަށް ހިފަހައްޓައިގެން މެނުވީ އެންމެ ފުރިހަމަ ގޮތުގައި ﷲ އެއްކައުންވަންތަކުރާ މީހަކަށް ނުވާނެކަމަށެވެ.