ސްކޮލަޝިޕް ލިބުނު ދަރިވަރުންނަށް ރައީސް: ފަރުޟް ފަސް ނަމާދު އޮޕްޝަނަކަށް ވެގެން ނުވާނެ

ފަރުޟް ފަސް ނަމާދު ކުރުމަކީ އޮޕްޝަނަކަށް ނުހެދުމަށް ރައީސުލްޖުމުހުރިއްޔާ ޑރ. މުހައްމަދު މުއިއްޒު ނަސޭހަތްތެރިވެވަޑައިގެންފިއެވެ.

ރައިސް މިފަދައިން ނަސޭހަތްތެރިވެވަޑައިގަތީ ރައީސުލްޖުމުހުރިއްޔާ ދެއްވާ ހާއްސަ ސްކޮލަޝިޕާއި ހައި އެޗީވާސް ސްކޮލަޝިޕްގެ ލިޔުން ހަވާލުކުރުމަށް ރޭ ބޭއްވި ޖަލްސާގައި ދަރިވަރުންނާ މޚާތަބްކުރައްވާ ދެއްކެވި ވާހަކަފުޅުގައެވެ.

އެމަނިކުފާނު ވިދާޅުވީ ކޮންމެ ކުއްޖެއްގެ ވެސް ހަޔާތް ވަރަށް ކާމިޔާބީއާއެކީ ކުރިއަށް ގެންދިއުމަށް އަޒުމް ކަނޑައަޅަން ޖެހޭކަމަށާއި އަމިއްލަ ނަފްސަށް އިތުބާރުކުރަން ޖެހޭކަމަށެވެ.

އަދި އަމިއްލަ ނަފްސަށް އިތުބާރުކޮށް ކޮންމެ ކުއްޖެއްގެވެސް ދިރިއުޅުން އެ ކުއްޖަކަށްޓަކައި އެ ކުދިންގެ މައިންބަފައިންނަށްޓައި އަދި މުޖުތަމައާއި ގައުމަށްޓަކައި އެންމެ ރަނގަޅު ގޮތުގައި ބައްޓަން ކުރުމުގެ އަޒުމް މިރޭ ކަނޑައަޅުމަށް އެމަނިކުފާނު ނަސޭހަތްތެރިވެވަޑައިގަތެވެ.

އެމަނިކުފާނު ވިދާޅުވިގޮތުގައި އެ އަޒުމް ކަނޑައަޅާއިރުގައި އެންމެ ފުރަތަމަވެސް ހަނދާނަށް ގެންނަން ޖެހޭނީ ކޮންމެ ކުއްޖަކީވެސް މާތް ވެގެންވާ އިސްލާމް ދީނުގެ މަތީގައި ފައިތިލަ ސާބުތުކޮށްގެން ހުރި ފަހުރުވެރި މުސްލިމެއްކަމުގެ މަތިންނެވެ.

"ތި ފައްޓަނީ ވަރަށް ބޮޑު ޖާނީއެއް، އެކި ގައުމުތަކަށް މަތީ ތައުލީމް ހާސިލްކުރުމަށް ޑިގްރީ މާސްޓާސް ޕީއެޗްޑީ އެކި ލެވެލްތަަކަށް ކިޔެވުމަށް ފަށާ ޖާނީއެއް މާތް ވެގެންވާ އިސްލާމް ދީނުގެ މަތީގައި ފައިތިލަ ސާބިތުކޮށްގެން ތިބި ބައެއްކަން ހިނދުކޮޅަކަށްވެސް ހަނދައިނެތިގެން ނުވާނެ" ރައީސް ޑރ. މުއިއްޒު ވިދާޅުވިއެވެ.

ރައީސް ވިދާޅުވީ އެކި ގައުމުތަކަށް ކިޔަވަން ދާއިރު، އެ ގައުމުތަކުގަިއ ކަންކަން ހުންނާނީ މި ރާއްޖޭގައި ކަންކަން ހުރިގޮތަށް ނޫންކަމަށާއި ވަރަށް ފަސޭހައިން ކަންކަން ހަނދާނެތޭ ތަން އަންނާނެކަމަށެވެ.

އަދި ބައެއް ކުދިންނަށް މިކަންތައްތައް ހަނދާން ނެތޭކަން ފާހަގަކުރައްވާ ރައީސުލްޖުމުހުރިއްޔާ ޑރ. މުއިއްޒު ވިދާޅުވީ އެހެން ވެގެން ނުވާނެކަމަށްއި މިދުނިޔެއަށްފަހު މާ މުހިއްމު ދުނިޔެއެއް އަންނާނެކަމަށެވެ.

އެގޮތުން ދެން އޮތް ދުނިޔެއަކީ މި ދުނިޔޭގައި ތިބި ސަބަބުކަމަށާއި އޭގެ މަތިން ހަނދައިން ނެތިގެން ނުވާނެކަމަށްވެސް ވިދާޅުވިއެވެ.

"ފަރުޟް ފަސް ނަމާދު ކޮންމެ ތަނެއްގައި ހުއްޓަސް ބަރާބަރަށް އަދާކުރުމަށް ހަނދާން ބަހައްޓަން ޖެހޭ، ފަރުސް ފަސް ނަމާދު އެއީ އޮޕްޝަނަކަށް ވެގެން ނުވާނެ" ރައިސް ވިދާޅުވިއެވެ.

އެމަނިކުފާނު ވިދާޅުވީ ކިޔެވުމުގެ ދަތުރަކީ ވަރަށް އުނދާގޫ ވާނެ ދަތުރެއްކަމަށާއި ކިޔެވުމުގެ މަސައްކަތުގައި އުޅޭއިރުގައި އެހެން ނަމަވެސް ކޮންމެ ކުއްޖަކީވެސް ފަޚްރުވެރި މުސްލިމެއްކަން ހަނދާން ނެތިގެން ނުވާނެ ކަމަށާއި ދީނުގައިވާ ވާޖިބު އަދާ ކުރަން ޖެހޭކަމަށެވެ.