ދެ އިންތިހާބު އެއްކޮށްލުމުން 130 މިލިއަން ރުފިޔާ ސަލާމަތްވާނެ: އީސީ

ދެ އިންތިހާބު އެއްކޮށްލުމުން 130 މިލިއަން ރުފިޔާ ސަލާމަތްވާނެ ކަމަށް އިލެކްޝަން ކޮމިޝަން (އީސީ) ގެ ރައީސް ފުއާދު ތައުފީގް ވިދާޅުވެއްޖެއެވެ.

ފުއާދު މިހެން ވިދާޅުވީ މަޖިލިހުގެ މިނިވަން މުއައްސަސާތަކާ ބެހޭ ކޮމިޓީގައެވެ. ފުއާދު ވިދާޅުވީ ދެ އިންތިހާބު އެއް ކުރުމުން 130 މިލިއަން ރުފިޔާ ސަލާމަތްކުރެވޭނެ ކަަމަށް ލަފާކުރެވޭ ކަމަށާއި ވަރަށް ގިނަ ހަރަދުތައް އެއްކޮށް ކުރުމުގެ ސަބަބުން ކުރަންޖެހޭ ހަރަދުތައް ކުޑަވެގެންދާނެ ކަމަށެވެ.

މިކަމުގެ ސަބަބުން ރައްޔިތުންނަށް ވެސް ފަސޭހަ ވާނެ ކަމަށާއި އެކަމުގެ ސަބަބުން އުނދަގުލަކަށްވާ ނަމަ ވާނީ ވޯޓު ލާ ދުވަހު ދެ ކަރުދާސްކޮޅު ދިނުން އެކަނި ކަމަށް ފުއާދު ވިދާޅުވިއެވެ. އަދި އޭގެ އިތުރުން މިކަން ލޯކަލް ކައުންސިލް އިންތިހާބުގައި ތަޖުރިބާކޮށްފައިވާ ކަމަށާއި އެއީ އުނގަދޫ ކަމަކަށް ނުވާ ކަމަށް ވެސް ފުއާދު ވިދާޅުވިއެވެ.

އަދި އޭގެ އިތުރުން ކައުންސިލް އިންތިހާބުގައި ގިނަ ނަންތަކެއް އަންނަ ކަމަށާއި ނަމަވެސް މަޖިލިސް އަދި ރިޔާސީ އިންތިހާބުގައި ފާހަގަ ޖަހަންޖެހޭނީ ދެ ނަމެއްގައި އެކަނި ކަން ފާހަގަކުރައްވައި ފުއާދު ވިދާޅުވީ ވުމާއެކު ވޯޓުލާ މީހުން ގެ އިތުރުން އީސީއަށް މިކަމުގެ ސަބަބުން އުނދަގޫ ނުވާނެކަމަށެވެ.

މީގެ އިތުރުން ފުއާދު ވިދާޅުވީ މަޖިލިސް އިންތިހާބުގައި ވޯޓުލާފައި ރިޔާސީ އިންތިހާބުގައި ވޯޓުލާން ނުދާ މީހުން ހިމެނޭކަމަށާއި ރިޔާސީ އިންތިހާބުގައި ވޯޓުލާފައި މަޖިލިސް އިންތިހާބުގައި ވޯޓުލާން ނުނިކުންނަ މީހުން ވެސް ތިބޭ ކަމަށެވެ. ވުމާއެކު ދެ އިންތިހާބު އެއްކޮށްލުމުން މަޖިލިސް އަދި ރިޔާސީ އިންތިހާބަށް ވޯޓުލާ މީހުންގެ އަދަދު އިތުރުވެގެންދާނެ ކަމަށެވެ.

އެ ކޮމިޝަން ގެ ތަފާސްހިސާބުތަކުން މަޖިލިހުގެ އިންތިހާބުތަކުގައި އެވްރެޖްކޮށް 80 އިންސައްތަ މީހުން ވޯޓުލާން ނުކުންނަ އިރު، ރިޔާސީ އިންތިހާބުތަކުގައި އެވްރެޖްކޮށް 90 އިންސައްތަ މީހުން ދާކަމަށާއި ވުމާއެކު ދެ އިންތިހާބު އެއްކޮށްލުމުން 90 އިންސައްތަ އަށްވުރެ ގިނަ މީހުން ވޯޓުލާންދާނެ ކަމަށް ބެލެވޭ ކަމަށް ވެސް ފުއާދު ވިދާޅުވިއެވެ.