މިސްކިތްތަކުގައި ގާރީ ކްލާސް ހިންގުމަށް މިހަފްތާގައި ހުއްދަ ދެނީ

މިސްކިތްތަކުގައި ގާރީ ކްލާސް ހިންގުމަށް މިހަފްތާގައި ހުއްދަ ދެއްވާނެކަމަށް އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވީ މިއަދު އެކްސްއަށް ޝާއިއުކުރި ޕޯސްޓެއްގައެވެ.

ކީރިތި ޤުރުއާނަކީ އިސްލާމް ދީނުގައި އެންމެ މުހިންމު އެއް ވަސީލަތްކަމުގައި ވާއިރު، ގުރުއާން ރާއްޖޭގައި ކުރިއަރުވައި ފަސޭހައިން އުނގެނެވޭނެ މަގު ފަހިކޮށްދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ.

އެހެންކަމުން ރރާއްޖޭގެ ރައްޔިތުންނަށް ކީރިތި ގުރުއާނުގެ އިލްމު ފަސޭހައިން ފޯރުކޮށްދެވޭނެ މަގު ފަހިކޮށްދިނުމަށްޓަކައި ދެ ނަމާދު ދޭތެރޭ މިސްކިއްތަކުގައި ގާރީ ކޯސް ނެގުމަށް ބޭނުންވާ ހުއްދަ ދެއްވާނެކަމަށް ވަޒީރު ޑރ.ޝަހީމް ވިދާޅުވިއެވެ.

ރައީސް ޑރ. މުޢިއްޒު ގުރުއާނަށް ދެއްވަވާ އަހައްމިއްޔަތަކީ، ބޮޑު ހިތްހަމަޖެހުމެއްކަމަށް ރޭގެ ޖަލްސާގައި ވަޒީރު ވިދާޅުވިއިރު، ރޭގެ ޖަލްސާގައި ވާހަކަފުޅުދައްކަވަމުން ރައީސް ޑރ. މުޢިއްޒު ވިދާޅުވީ، ކީރިތި ގުރުއާން ކިޔެވުމުގެ ގައުމީ މުބާރާތަކީ ރާއްޖޭގައި އެންމެ ގިނަ އިނާމުދޭ އެންމެ އަގު ބޮޑު މުބާރާތްކަމުގައި ހައްދަވާދެއްވާނެކަމަށެވެ.