އިސްރަށްވެހިން ކެންސަރަށް ހޭލުންތެރިކޮށްފި

އިސްރަށްވެހިންގެ ނާދީގައި މައުލޫމާތު ދިނުމުގެ ސެޝަނެއް މިނިސްޓްރީ އޮފް ޖެންޑާ، ފެމިލީ އެންޑް ސޯޝަލް ސާވިސަސް އިން އިސްރަށްވެހިންގެ ނާދީގައި ކުރިއަށް ގެންގޮސްފިއެވެ.

މި ސެޝަންގައި މައުލޫމާތު ދީފައިވަނީ އިއްދައިގައި ދިމާވާ މައްސަލަތަކާއި، އުރަމަތި އަދި ރަހިމުގެ ކެންސަރާއި ގުޅޭ ގޮތުންނެވެ. މި ސެޝަން ނަންގަވައިދެއްވީ ހުޅުމާލެ ހޮސްޕިޓަލްގެ ވެލް ވިމެން ކްލިނިކްގެ ފަރާތުން ކަމަށް އެ މިނިސްޓްރީ އިން ބުނެއެވެ.

އެ މިނިސްޓްރީ އިން ހާމަ ކުރާ ގޮތުގައި މި ސެޝަން ގެ ބައިވެރިންނަށް އުރަމަތީގެ ކެންސަރު ދެނެގަތުމަށް ކުރާ ތަފާތު ޓެސްޓުތަކާއި، އުރަމަތީގެ ކެންސަރު އަމިއްލައަށް ދެނެގަންނާނެ ގޮތުގެ އިތުރުން މި ބައްޔާމެދު ހޭލުންތެރިވުމުގެ މުހިންމު ކަން ކިޔާދީފައިވެއެވެ.

މީގެ އިތުރުން އުރަމަތީ ކެންސަރުގެ އިތުރުން ރަހިމާއި، ރަހިމުގެ ދޮރަށް ޖެހޭ ކެންސަރުގައި ދެވޭ ތަފާތު ފަރުވާތަކާއި، އެ ބަލިތަކުން ރައްކާތެރިވުމަށް އެޅޭނެ ފިޔަވަޅުތަކުގެ އިތުރުން، ބަލީގެ އަލާމާތްތަށް ވެސް މި ސެޝަންގައި ކިޔާދީފައިވާކަމަށް އެ މިނިސްޓްރީ އިން ބުނެއެވެ.

އެ މިނިސްޓްރީ އިން ބުނާ ގޮތުގައި އުމުރުން ދުވަސްވާއިރު ދުޅަހެޔޮ ޞިއްޙަތެއްގައި ހުރުމަކީ ނުހަނު މުހިންމު ކަމެކެވެ. އަދި މި ނާދީގައި ކުރިއަށް ގެންދާ ކޮންމެ ހަރަކާތަކީ ވެސް އިސްރަށްވެހިންގެ ނަފްސާނީ، ޖިސްމާނީ އަދި އިޖުތިމާޢީ ދުޅަހެޔޮކަން ކަށަވަރުކުރުމަށް ކުރިއަށްގެންދާ ހަރަކާތްތަކެއް ކަމަށެވެ.

އިސްރަށްވެހިންގެ ނާދީ އިން ފާހަގަ ކުރާ ގޮތުގައި އަންހެނުންނަށް ދިމާވާ ތަފާތު މައްސަލަތަކާއި ގުޅޭގޮތުން ކުރިއަށް ގެންދެވުނު މިސެޝަންގައި ގިނަ ފަރާތްތަކެއް ބައިވެރިވެފައިވެއެވެ.