އިންޖީނުގެތައް ހިންގާނެ ގޮތުގެ އަތްމަތީ ފޮތެއް ސްޓެލްކޯއިން ނެރެފި

އިންޖީނުގެތައް ހިންގުމުގައި ޢަމަލުކުރާނޭ އެއްހަމަ އުސޫލުތައް ބަޔާންކޮށް "ސްޓެލްކޯ އިންޖީނުގެތައް ހިންގާނެ ގޮތުގެ އަތްމަތީ ފޮތް" އެކުންފުނިން އިފްތިތާޙުކޮށްފިއެވެ.

ސްޓެލްކޯއިން ބޭއްވި އިންޖީނުގެތަކުގެ މެނޭޖަރުންގެ މަހާސިންތާ ނިންމުމުގެ ގޮތުން ބޭއްވި ހަފްލާގައި މި ފޮތް އިފްތިތާހުކޮށްދެއްވާފައިވަނީ ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީއެވެ.

351 ސަފްޙާގެ މިފޮތުގައި ސްޓެލްކޯގެ އިންޖީނުގެތަކުގެ އޮނިގަނޑާއި، އިންޖީނުގެތަކުގެ މަސައްކަތްތަކާއި، ކުންފުނީގެ އެކި ދާއިރާތަކުގެ އޮނިގަނޑާ ގުޅޭ މައުލޫމާތުގެ އިތުރުން ކުންފުނީގެ ޚިދުމަތުގެ ތާރީޙާއި، ތަސައްވުރާއި، އަމާޒުގެ މަޢުލޫމާތުތައް ވަނީ ހިމަނާފައެވެ. އަދި ސްޓެލްކޯއިން މިއަހަރު އަލަށް ޢިމާރާތްކުރުމަށް ހަމަޖެހިފައިވާ ޒަމާނީ އިންޖީނުގެތައް ހިންގުމަށް ބޭނުންތެރި ފޮތަކަށް މިފޮތް ވެގެންދާނެކަމަށްވެސް އެމްޑީ ހުސައިން ފަހުމީ ވިދާޅުވިއެވެ.

މިރަސްމިއްޔާތުގައި ވާހަކަދައްކަވަމުން ފަހުމީ ވިދާޅުވީ ސްޓެލްކޯއިން ރައްޔިތުންނަށް ފޯރުކޮށްދޭ ޚިދުމަތް އެހެން ހަރުފަތަކަށް ގެންދިއުމަށް ހުރިހާ މުވައްޒަފުންގެ ފިކުރަކީވެސް ޤައުމީ ފިކުރަކަށް ހަދަންޖެހޭކަމަށެވެ. އަދި ކުންފުނީގެ ޚަރަދުތައް ކުޑަކުރުމާއިއެކު، ކުންފުނީގެ ދުވެލި ބާރުކުރުމަށް އެންމެން ގުޅިގެން މަސައްކަތް ކުރަންޖެހޭކަމަށެވެ.

5 ދުވަހުގެ މުއްދަތަށް ބޭއްވުނު މިމަހާސިންތާގައި ސްޓެލްކޯގެ 33 ސްޓޭޝަން މެނޭޖަރުން ބައިވެރިވެލެއްވިއެވެ. އަދި އެސްޓޭޝަންތަކުގައި މަސައްކަތް ހިނގަމުންދާގޮތުގެ މަޢުލޫމާތު މަހާސިންތާގައި ހިއްސާކޮށް ރަނގަޅުކުރަންޖެހޭ ކަންތައްތައް ފާހަގަކޮށް މެނޭޖަރުންގެ މެދުގައި ވަނީ މަޝްވަރާކޮށްފައެވެ.