ޖޫން މަހުގެ ނިޔަލަށް އިތިއޮޕިއާގައި 4.5 މިލިއަން މީހުން ގެދޮރު ގެއްލިއްޖެ: އދ

އިތިއޮޕިއާގައި 4.5 މިލިއަން މީހުންގެ ގެދޮރު ގެއްލިފައިވާ ކަމަށް އދ އިން ބުނެފިއެވެ.

އދ ގެ ރިޕޯޓެއްގައި ބުނެފައިވާ ގޮތުގައި މިއަހަރުގެ ޖޫން މަހުގެ ނިޔަލަށް 4.5 މިލިއަން މީހުން ގެދޮރުން ނިކުމެގެން ގޮސްފައިވަނީ މައިގަނޑު ގޮތެއްގައި ހަމަނުޖެހުންތަކުގެ ސަބަބުންނެވެ.

މި ކާރިސާގެ އަސަރު އެންމެ ބޮޑަށް ކޮށްފައިވަނީ ސޯމާލިއާ، އޮރޮމިއާ އަދި ޓިގްރޭ ސަރަހައްދުތަކަށް ކަމަށް އދ އިން ފާހަގަކޮށްފައިވެއެވެ.

އިންޓަރނަލް ޑިސްޕްލޭސްޑް ޕާސަންސް (އައިޑީޕީ) ގެ ދެބައިކުޅަ އެއްބައި މީހުން ގެދޮރު ދޫކޮށްފައިވާތާ އަހަރަކަށްވުރެ ގިނަ ދުވަސް ވެފައިވާއިރު، 23 ޕަސެންޓް މީހުން ގެދޮރު ދޫކޮށްފައިވަނީ ދެ އަހަރާއި ހަތަރު އަހަރާއި ދެމެދުގެ މުއްދަތަކަށެވެ. އަދި 11 ޕަސެންޓް މީހުން ގެދޮރު ދޫކޮށްފައިވަނީ ފަސް އަހަރު ނުވަތަ އެއަށްވުރެ ގިނަ ދުވަހުގެ މުއްދަތަކަށެވެ.

މި ދަތިކަން ކުޑަކުރުމަށް ކުރެވުނު މަސައްކަތްތަކުގެ ސަބަބުން 2022 ވަނަ އަހަރުގެ ޖެނުއަރީ މަހުން ފެށިގެން 3.3 މިލިއަން އައިޑީޕީން އެމީހުންގެ އުފަން ސަރަހައްދުތަކަށް އެނބުރި އައުމަށް މަގުފަހިވެފައިވެއެވެ. ނަމަވެސް ހިނގަމުންދާ ހަމަނުޖެހުންތަކުގެ ސަބަބުން އެތެރޭގައި ގެދޮރު ގެއްލިފައިވާ މީހުންގެ ޖުމްލަ އަދަދު އަދިވެސް ގިނަކަމަށް އދ އިން ފާހަގަކޮށްފައިވެއެވެ.

އދ ގެ ރިޕޯޓުގައި ބުނެފައިވާ ގޮތުގައި މި ކްރައިސިސް ހައްލުކުރުމަށް ދެމެހެއްޓެނިވި އެހީތެރިކަމާއި ދިގުދެމިގެންދާ ހައްލުތަކެއް ބޭނުންވެއެވެ. މީގެ ތެރޭގައި ސަލާމަތީ ހާލަތު ހުއްދަކުރާ ތަންތަނުގައި އެނބުރި އައުމަށް މަގުފަހިކުރުމާއި، ލޯކަލް އިންޓަގްރޭޝަނަށް އެހީތެރިވުމާއި، ހަރުދަނާ މޮނިޓަރިން ސިސްޓަމްތައް ބެލެހެއްޓުން ހިމެނެއެވެ.

އިތިއޮޕިއާގެ ޑިސްޕްލޭސްމަންޓް ކްރައިސިސްއަކީ އަދިވެސް އިންސާނީ ގޮތުން ބޮޑު ކަންބޮޑުވުމެއް ކަމަށް ރިޕޯޓުގައި ފާހަގަކޮށްފައިވާއިރު، މުޅި ގައުމުގައި ނުތަނަވަސްކަމާއި ޑިސްޕްލޭސްމަންޓް އުފެދިފައިވަނީ ކޯޅުންތައް ކުރިއަށްދާތީ ކަމަށް ރިޕޯޓުގައިވެ އެވެ.