ޝަންގްރިއްލާ ރިސޯޓް އަލުން ހުޅުވަން ޓޫރިޒަމް މިނިސްޓަރާއި އައްޑޫ މެމްބަރުން ބާރުއަޅުއްވައިފި

ޝަންގްރިއްލާ ރިސޯޓް މިހާރު ބަންދުކޮށްފައި އޮތް އޮތުމަށް ހައްލެއް ހޯދުމަށް ޓޫރިޒަމް މިނިސްޓަރު އިބްރާހިމް ފައިސަލް އާއި އައްޑޫ ސިޓީގެ ރައްޔިތުންގެ މަޖިލީހުގެ ފަސް މެމްބަރަކު މިއަދު ޝަންގްރިއްލާ ހޮޓެލްސްގެ މެނޭޖްމަންޓާ ބައްދަލުކުރައްވައިފި އެވެ.

2020 ވަނަ އަހަރުން ފެށިގެން އެ ރިސޯޓް ބަންދުކޮށްފައި އޮތުމުގެ ސަބަބުން އެރިސޯޓްގައި ވަޒީފާ އަދާކުރަމުން އައި އައްޑޫ ރައްޔިތުންގެ ވަޒީފާތައް ވަނީ ގެއްލިފަ އެވެ.

މި ބައްދަލުކުރެއްވުމުގައި މިނިސްޓަރ ފައިސަލް ވަނީ ރިސޯޓް ހިންގަމުން ނުދާތީ ކަންބޮޑުވުން ފާޅުކުރައްވައި ވަޒީފާއަށް ކުރާ ނޭދެވޭ އަސަރުތަކުގެ މައްޗަށް އަލިއަޅުއްވާލައްވާފައެވެ. ރިސޯޓް އަލުން ހުޅުވުމަކީ ރައީސް ޑރ.މުހައްމަދު މުއިއްޒުގެ ކެމްޕެއިންގެ މުހިންމު ވައުދެކެވެ.

މި ހާލަތާ ގުޅިގެން މިނިސްޓަރު ފައިސަލް ހުށަހެޅުއްވީ ޝަންގްރިއްލާ ރިސޯޓް އަލުން ހުޅުވުމަށް ހާއްސަ ޓާސްކް ފޯހެއް އުފެއްދުމަށެވެ. މި މަސައްކަތުގެ މަގްސަދަކީ އެ މަސައްކަތް އަވަސްކޮށް ރިސޯޓް އަވަހަށް އޮޕަރޭޝަނަށް އެނބުރި ގެނައުމެވެ.

މި ބައްދަލުވުމުގައި އައްޑޫ ސިޓީގެ މެމްބަރުން ވަނީ ގިނަ ކަންބޮޑުވުންތަކެއް ފާޅުކުރައްވާފައެވެ.

އެގޮތުން މެންބަރުން ފާހަގަ ކުރެއްވެވި ކަންބޮޑުވުންތަކުގެ ތެރޭގައި ރިސޯޓް އަލުން ހުޅުވާނެ ސާފު ޓައިމްލައިނެއް ނެތުން ހިމެނެއެވެ. އަދި މިހާރު ތިބި މުވައްޒަފުންގެ ހާލަތަށް ބަލާއިރު، މުދާ ބަލަހައްޓަނީ އެންމެ 60 މުވައްޒަފުން ކަމާއި އޭގެ ތެރެއިން ދިވެހިންނަކީ އެންމެ ހަތަރު މުވައްޒަފުން ކަން ވެސް މެންބަރުން ފާހަގަކުރެއްވިއެވެ. އެހެންކަމުން މިހާރުން މިހާރަށް ވެސް އިތުރު ދިވެހި މުވައްޒަފުން ހޯދުމަށް މެމްބަރުން ވަނީ އެދިވަޑައިގެންފައެވެ.

މި ބައްދަލުކުރެއްވުމުގައި ޝަންގްރިއްލާ ރިސޯޓާއި ހޮޓެލް ޖެން މާލޭގެ ޖެނެރަލް މެނޭޖަރ ބްރައިސް ލުނޯޓް އާއި ޑިރެކްޓަރ އޮފް ގަވަރމަންޓް އެންޑް ޖެނެރަލް އެފެއާޒް ސައުދު ޢަބްދުالله ބައިވެރިވެވަޑައިގެންނެވިއެވެ. ނަމަވެސް ޝަންގްރިއްލާ ގްރޫޕްގެ ވެރިންނާއި މަޝްވަރާނުކޮށް ވަކި ނިންމުމެއް ނިންމުމުގެ ބާރު އެ ފަރާތްތަކަށް ލިބިފައި ނުވާތީ އަލުން ހުޅުވުމުގެ ޓައިމްލައިން ނުވަތަ ސްޓާފުންގެ މައްސަލަތަކާއި ގުޅޭ ގޮތުން ވަކި ޖަވާބެއް ސައުދު ނުދެއްވައެވެ.

މިކަންކަން ހައްލުކުރުމަށް ސަރުކާރާއި ޝަންގްރިއްލާގެ މެނޭޖްމަންޓުން މަޝްވަރާތައް ކުރިއަށް ގެންގޮސް، އައްޑޫ ގެ ރައްޔިތުންނަށް ވެފައިވާ ވައުދެއް ފުއްދައި، ރިސޯޓް އަލުން ހުޅުވުމަށް މަސައްކަތް ކުރާނެ ކަމަށް މިއަދުގެ ބައްދަލުވުމުގައި މިނިސްޓަރ ފައިސަލް ވިދާޅުވިއެވެ.