ޣައްޒާއަށް ސްޓާލިންކް އިންޓަނެޓްގެ ޚިދުމަތް ދިނުމަށް މަޝްވަރާކުރަނީ

އިޒްރޭލުގެ ހަމަލާތަކުގައި ސުންނާފަތިވެފައިވާ ޣައްޒާ އަށް އެލަން މަސްކުގެ ސުޓާލިންކް އިންޓަނެޓްގެ ހިދުމަތް ތައާރަފް ކުރުމަށް އިސްރާއީލާއި އެކީ މަޝްވަރާ ކުރަމުންދާ ކަމަށް އދ އިން ބުނެފިއެވެ.

އދ އިން ބުނެފައިވާ ގޮތުގައި ހަމަލާތަކުގެ ސަބަބުން އިންޓަނެޓް ފޯރުކޮށްދޭ ކުންފުނިތަކުގެ ހިދުމަތްތަކަށް ބުރޫ އަރައި މިހާރު ފަލަސްތީނުގެ ޣައްޒާގައި އިންޓަނެޓްގެ ހިދުމަތް މުޅިން މެދު ކެނޑިފައިވާ ކަމަށެވެ. މި ކަމުގެ ސަބަބުން އދ ގެ އެކި ޖަމިއްޔާތަކުން ފަލަސްތީނުގެ ޣައްޒާގައި ހިންގާ އިންސާނީ އެހީ ފޯރުކޮށްދިނުމުގެ ހިދުމަތްތަކަށް ވަރަށް ބޮޑަށް ދަތިވާ ކަމަށާއި އެންމެ ބޮޑަށް ކަންބޮޑުވަނީ ކާނާ ބެހުމުގެ މަސައްކަތް ހުއްޓިފައިވާތީ ކަމަށެވެ.

އދ އިން އިސްރާއީލްގެ ސަރުކާރާއި އެކީ ޣައްޒާ އަށް މަސްކު ސުޓާލިންކު އިންޓަނެޓް ހިދުމަތް ދޭން މަޝްވަރާ ކުރަމުންދަނީ އިސްރާއީލުގެ ހަމަލާތަކުން ސުޓާލިންކުގެ ރިސީވިން ސިސްޓަމްތައް ހަލާކުކޮށްލަފާނެތީ އެވެ.

އދ ގެ އިސް އޮފިޝަލަކު އެޒިއޮން ނިއުސްއަށް ދެއްވި އިންޓަވިއުއެއްގައި ވިދާޅުވި ގޮތުގައި، އިސްރާއީލް ސަރުކާރުން އެމީހުންގެ ބައެއް ކަންބޮޑުވުންތައް އދ އާ ހިއްސާކޮށްފައިވެއެވެ. މީގެ ތެރޭގައި އިސްރާއީލްގެ އަސްކަރިއްޔާގެ މައިގަނޑު ކަންބޮޑުވުމެއް ހިމެނެއެވެ. އެއީ ޣައްޒާގައި އިންޓަނެޓް ޚިދުމަތް ފޯރުކޮށްދިނުމުން، ހަމާސް ޖަމާޢަތުން އޭގެ ނަހަމަ ބޭނުން ހިފައި، ހަމަލާތައް ރާވަން މެދުވެރިއެއްގެ ގޮތުގައި ބޭނުންކުރުމުގެ ފުރުސަތު އޮތުމެވެ. ނަމަވެސް، އދ އިން މިކަމަށް ހައްލެއް ހޯދައި، އެކަން އިސްރާއީލްގެ އަސްކަރިއްޔާއާ ހިއްސާކޮށްފައިވާ ކަމަށް އެ އޮފިޝަލް ވިދާޅުވިއެވެ.