އިމްރާން ޚާން ވަގުތުން މިނިވަން ކުރުމަށް އދ އިން ގޮވާލައިފި

ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ހައްޔަރުކޮށްފައި ބެހެއްޓުމަކީ ޤާނޫނާ ޚިލާފު ކަމެއް ކަމަށާއި، އޭނާ ވަގުތުން ދޫކޮށްލަންޖެހޭ ކަމަށް ޔޫއެންގެ ވޯކިންގ ގްރޫޕަކުން ހޯމަ ދުވަހު ބުނެފިއެވެ.

ޔޫއެންގެ ވޯކިންގ ގްރޫޕް އޮން އާބިޓްރަރީ ޑިޓެންޝަން އިން ނެރުނު ލިޔުމެއްގައި ބުނެފައިވަނީ އިމްރާން ޚާންގެ މައްސަލަ އަވަހަށް ހައްލުކުރުމަށް ފިޔަވަޅު އަޅަންޖެހޭ ކަމަށެވެ. އެގޮތުން އޭނާ ވަގުތުން ދޫކޮށްލައި، ބައިނަލްއަޤްވާމީ ޤާނޫނާ އެއްގޮތްވާ ގޮތުގެ މަތިން ބަދަލު ދިނުމަށް ގޮވާލާފައިވެއެވެ.

އިމްރާން ޚާން ވެރިކަމަށް އައީ 2018 ވަނަ އަހަރުއެވެ. އަދި 2022 ވަނަ އަހަރު އިތުބާރު ނެތްކަމުގެ ވޯޓަކުން އޭނާ ވަނީ ވެރިކަމުން ވައްޓާލާފައެވެ. އޭގެ ފަހުން ކޮރަޕްޝަނާއި ޓެރަރިޒަމްގެ އެތައް މައްސަލައެއް އޭނާގެ މައްޗަށް ހުށަހަޅާފައިވެއެވެ.

އިމްރާން ޚާން ހުންނަވަނީ މިދިޔަ އޯގަސްޓް މަހުން ފެށިގެން ޖަލުގައެވެ. އަދި މިއަހަރުގެ ފެބްރުއަރީ މަހު ބޭއްވުނު އާންމު އިންތިޚާބުގެ ކުރިން އޭނާގެ މައްޗަށް ތިން މައްސަލައެއްގައި ޙުކުމް ކޮށްފައިވެއެވެ.

އެ އިންތިޚާބުގައި އޭނާގެ ޕާޓީން ތާއީދުކުރި ކެންޑިޑޭޓުން އެންމެ ގިނަ ގޮނޑި ކާމިޔާބުކުރި ނަމަވެސް، ސަރުކާރެއް އެކުލަވާލުމަށް ނުކުޅެދުނެވެ.

އިމްރާން ޚާނާއި އޭނާގެ ޕާޓީން ބުނަނީ މި މައްސަލަތަކަކީ އޭނާ ވެރިކަމުން ދުރުކުރުމަށް ސިޔާސީ ބޭނުމަށް ހުށަހަޅާފައިވާ މައްސަލަތަކެއް ކަމަށެވެ.

ޔޫއެންގެ ވޯކިންގ ގްރޫޕުން ބުނެފައިވަނީ އިމްރާން ޚާން ހައްޔަރުކޮށް، ބަންދުކޮށް، އަދި ޝަރީއަތް ކުރުމަކީ ޤާނޫނީ އަސާސެއް ނެތް ކަމެއް ކަމަށެވެ. އަދި މިއީ އިންތިޚާބުގައި އޭނާ ބައިވެރިވިޔަ ނުދިނުމަށް ސިޔާސީ ބޭނުމަށް ކޮށްފައިވާ ކަމެއް ކަމަށް ފެންނަ ކަމަށް ބުނެފައިވެއެވެ.