އެމްޑީޕީގެ އަހަރީ ދުވަހުގެ މުނާސަބާގައި ނަޝީދު ތަހުނިޔާ ވިދާޅުވެއްޖެ

އެމްޑީޕީގެ 19 ވަނަ އަހަރީ ދުވަހުގެ މުނާސަބާގައި ކުރީގެ ރައީސް މުޙައްމަދު ނަޝީދު ތަހުނިޔާ ވިދާޅުވެއްޖެއެވެ.

ކުރީގެ ރައީސް ނަޝީދު އެމްޑީޕީގެ 19 ވަނަ އަހަރީ ދުވަހުގެ މުނާސަބާގައި އެ ޕާޓީގެ މެންބަރުންނާއި ސަޕޯޓަރުންނަށް ތަހުނިޔާ ވިދާޅުވީ އެކްސްގައި ރޭ ކުރެއްވި ޕޯސްޓެއްގައެވެ.

އެމްޑީޕީގެ ކުރީގެ ރައީސް ނަޝީދު ވިދާޅުވީ އެ ޕާޓީގެ އެންމެ އަސާސީ އެއް އުސޫލަކީ ރައްޔިތުންނަށް ފައިދާހުރި ވެރިކަމެއް ހިންގޭނީ ޕާލަމެންޓްރީ (މަޖިލީހުގެ ވެރިކަން) ނިޒާމަކުން ކަމަށް ދެކޭ ދެކުން ކަމަށެވެ.

ޕާޓީގެ އޮނިގަނޑު ރޭވިފައިވަނީ އެ ހަމައަށް ކަމަށާއި އަދިވެސް އެނބުރެެންވީ އެ މިސްރާބަށް ކަމަށް ސިޔާސީ ދާއިރާއިން ވަގުތީ ގޮތުން މިވަގުތު ދުރަށްޖެހިވަޑައިގެން ހުންނެވި ނަޝީދު ވިދާޅުވިއެވެ.

ރާއްޖޭގައި މިވަގުތު ކަންކަން ހިނގަމުންދާ ގޮތަށް ބަލައި އެމްޑީޕީގައި ހުންނެވުން އެއީ އެންމެ ރަނގަޅު ގޮތް ކަމަށް ދެކެވަޑައިނުގަންނަވާ ކަމަށް ވިދާޅުވެ ނަޝީދު އެމްޑީޕީއިން ވަކިވެވަޑައިގަތީ މިދިޔަ އަހަރުގެ ޖޫން 21 ގައެވެ.

ނަޝީދު އެމްޑީޕީއިން ވަކިވެވަޑައިގަތުމުގެ ކުރިން މިދިޔަ ދައުރުގެ މެދުތެރެއިން ފެށިގެން އެ ޕާޓީ އޮތީ ދެބައިވެފައެވެ. ޕާޓީގައި ހައިޖާނު ބޮޑުވެ ދެބައިވީ އެމްޑީޕީގެ ރިޔާސީ ޕްރައިމަރީއާ ހިސާބުންނެވެ. ޕްރައިމަރީއިން ފެއިލްވުމާއެކު ތާއީދުކުރައްވާ ބޭފުޅުންނާއެކު ނަޝީދު ''ފިކުރެއްގެ ދިރުން“ ގެ ނަމުގައި ފެކްޝަނެއް ހެއްދެވިއެވެ. އެއަށްފަހު އެމްޑީޕީގައި ހުންނަވައި ''ދަ ޑިމޮކްރެޓްސް'' އުފެއްދެވުމުގެ މަސައްކަތް ފެށްޓެވިއެވެ.

އެމްޑީޕީން ވަކިވެވަޑައިގަތުމަށްފަހު ޑިމޮކްރެޓްސްއަށް ސޮއިކުރައްވައި އެމަނިކުފާނު ވިދާޅުވީ އެމްޑީޕީ ''ރޫޅައިލާނެ'' ކަމަށެވެ. އަދި އެމްޑީޕީ އަލުން ”އަތުލާނެ“ ކަމަށް ވެސް ވިދާޅުވެފައިވެއެވެ.