ދުނިޔެ މިދަނީ 3 ވަނަ ބޮޑު ހަނގުރާމައަކާ ދިމާއަށް: ރައީސް ނަޝީދު

ދުނިޔޭގެ ކަންކަން ހިނގަމުންދާ ގޮތަށް ބަލާއިރު މިސްރާބު ހުރީ ތިންވަނަ ބޮޑު ހަނގުރާމައަކާ ދިމާއަށް ކަމަށް ކުރީގެ ރައީސް މުޙައްމަދު ނަޝީދު މިއަދު ވިދާޅުވެއްޖެއެވެ.

ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލުގެ މަގާމު ފުރުއްވުމަށް މިހާރު ގާނާގައި ހުންނެވި ނަޝީދު މިހެން ވިދާޅުވީ އެމަނިކުފާނުގެ ރަސްމީ އެކައުންޓު މެދުވެރިކޮށް ''އެކްސް'' ގައި ކުރެއްވި ޕޯސްޓެއްގައެވެ.

ނަޝީދު ވިދާޅުވީ ދުނިޔޭގެ ބޮޑެތި ބާރުތަކުން އަންނަނީ އާންމުން ސިފައިންގެ ވަޒީފާގައި މަސައްކަތް ކުރަން މަޖުބޫރު ކުރުވަމުން ކަމަށެވެ. އަދި ގައުމުތަކުން ދިފާއީ ކަންކަމަށް ކުރަމުންދާ ހޭދަ ވެސް ވަރަށް ބޮޑަށް އިތުރުވެފައިވާ ކަމަށާއި ހަތިޔާރު ގިނަ ކުރުމަށް ގައުމުތަކުން ވާދަކުރާކަމަށް ވެސް ނަޝީދު ވިދާޅުވިއެވެ.

ނަޝީދުގެ ޕޯސްޓުގައި ވަނީ ނަސްލީ ތަފާތުކުރުންތަކާއި ހިޖުރަކުރުމާ ދެކޮޅުވުން އިތުރުވަމުންދާކަން ފާހަގަކުރައްވައި އެކަމާ ވެސް ކަންބޮޑުވުން ފާޅުކުރައްވައިފައެވެ.

ނަޝީދު ވިދާޅުވީ ހަމަޖެހިގެން ވިސްނުންތެރިކަމާއެކު ކަންކުރާ ވެރިން ނާންނަނަމަ މިސްރާބު ހުރީ ތިންވަނަ ބޮޑު ހަނގުރާމައަކަށް ކަމުގެ ބިރު އެބައޮތް ކަމަށެވެ.

މީގެއިތުރުން ނަޝީދުގެ ޕޯސްޓުގައި ވަނީ މޫސުމަށް އަންނަ ބަދަލުތަކުގެ ކަންބޮޑުވުން ވެސް ފާޅުކުރައްވައިފައެވެ.