ސްޓެލްކޯގެ ގަސް އިންދުމުގެ ޕްރޮގްރާމް: ދިއްފުށީގައި 1,000 ގަސް އިންދައިފި

ސްޓެލްކޯއިން ފަށާފައިވާ ގަސް އިންދުމުގެ ޕްރޮގްރާމުގެ ދަށުން ކ.ދިއްފުށީގައި 1,000 ގަސް އިންދައިފިއެވެ.

ރާއްޖޭގެ އެކި ކަންކޮޅުތަކުގައި ފަސް މިލިއަން ގަސްއިންދުމުގެ ޕްރޮގްރާމެއް ކުރިއަށްގެންދިއުމަކީ ސަރުކާރުގެ މެނިފެސްޓޯގައި ހިމެނޭ މުހިންމު ރިޔާސީ ވައުދެކެވެ. ދުނިޔޭގެ ތިމާވެށީގެ ދުވަހުގެ މުނާސަބަތާއި ގުޅިގެން މި މަހުގެ 5 ވަނަ ދުވަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ މި ޕްރޮގްރާމް އިފުތިތާހުކޮށްދެއްވައިފައެވެ.

ރައީސުލްޖުމްހޫރިއްޔާގެ ވައުދުފުޅާއި އެއްގޮތަށް، ރާއްޖޭގައި 5 އަހަރުން 5 މިލިއަން ގަސް އިންދުމަށް އެމަނިކުފާނު ފައްޓަވައިދެއްވި މަޝްރޫއުގައި ބައިވެރިވެ ކުރިއަށް އޮތް 5 އަހަރު ގަސް އިންދުމުގެ ހަރަކާތް ހިންގުމަށް ސްޓެލްކޯއިން އެ ދުވަހު ވަނީ އެންވަޔަރަމަންޓް މިނިސްޓްރީއާއެކު އެއްބަސްވުމެއްގައި ސޮއިކޮށްފައެވެ.

އެ އެއްބަސްވުމުގެ ދަށުން ކުރިއަށް އޮތް 5 އަހަރުގެ ތެރޭގައި ސްޓޭލްކޯއިން މަދުވެގެން 500،000 ގަސް އިންދުމަށް ވަނީ ނިންމާފައެވެ. އެގޮތުން ގަސް އިންދުމުގެ ޕްރޮގްރާމު ރަސްމީކޮށް ފެށީ ޖޫން 5 ގައި ކ.ތުލުސްދޫގައެވެ.

ސްޓެލްކޯއިން ރޭ އެކްސް އަށް ކުރި ޕޯސްޓެއްގައި ބުނެފައިވަނީ ދިއްފުށީގެ ޒަމާނީ އައު އިންޖީނުގެ އިމާރާތްކުރުމުގެ މަސައްކަތް ބަޔަކާއި ހަވާލުކޮށް، އެ އިންޖީނުގޭގެ ބިންގާ މިއަދު އަޅާފައިވާ ކަަމަށެވެ. އަދި ބިންގާ އެޅުމުގެ ރަސްމިއްޔާތަށްފަހު ރައީސުލްޖުމްހޫރިއްޔާގެ ވައުދުފުޅާއި އެއްގޮތަށް 5 އަހަރުން 5 މިލިއަން ގަސް އިންދުމަށް ހިފާފައިވާ އަމާޒަށް ވާސިލުވުމަށް އެ ކުންފުނިން ޕްލެޖް ވެފައިވާގޮތަށް ފަސްލައްކަ ގަސް އިންދުމަށް ކުރެވޭ މަސައްކަތުގެ ތެރެއިން ދިއްފުށީގައި 1,000 ގަސް އިންދާފައިވާ ކަމަށެވެ.

ރާއްޖޭގެ އެކި ކަންކޮޅުތަކުގައި ފަސް މިލިއަން ގަސްއިންދުމުގެ ޕްރޮގްރާމުން ދައްކުވައިދެނީ، ރާއްޖޭގެ ނާޒުކު ތިމާވެށީގެ ނިޒާމުތައް ހިމާޔަތްކުރުމަށާއި، މޫސުމަށް އަންނަ ބަދަލުތަކުގެ ސަބަބުން މިހާރުގެ ޖީލުތަކާއި، އަންނަން އޮތް ޖީލުތަކުގެ ލާބައާއި މަންފާއަށްޓަކައި މޫސުމަށް އަންނަ ބަދަލުތަކުންކުރާ ނޭދެވޭ އަސަރުތަކުން އަރައިގަތުމަށް ސަރުކާރުން ކުރަމުން ގެންދާ މަސައްކަތްތަކެވެ.