ބާސެލޯނާ އިން ޒަވީ ކޯޗުކަމުން ވަކިކުރަން ވިސްނަނީ

ބާސެލޯނާގެ ކޯޗުކަމުން ޒަވީ ހެނާންޑޭޒް ވަކިކުރަން ކްލަބުން ވިސްނާކަމަށް ރިޕޯޓްތައް ބުނެފި އެވެ.

ޒަވީ، 44، ވަނީ މިދިޔަ ޖެނުއަރީ މަހު އޭނާ މި ސީޒަނަށް ފަހު ބާސެލޯނާގެ ކޯޗުކަން ދޫކޮށްލާނެކަން ހާމަކޮށްފަ އެވެ. އެކަމަކު އޭގެފަހުން ނަތީޖާތައް ރަނގަޅުކޮށް، ކްލަބުގެ ހުށަހެޅުމާއި އެއްގޮތަށް ޒަވީ ބާސެލޯނާގައި މަޑުކުރާކަން ހާމަކުރި އެވެ.

ކްލަބުގައި މަޑުކުރަން ނިންމައި ޒަވީ ބުނީ، އެ ނިންމުމަކީ ކްލަބުގެ އިސްވެރިންނާއި ވާހަކަ ދައްކައި ކްލަބުން އެގޮތް ބޭނުންވެގެން ނިންމި ނިންމުމެއް ކަމަށެވެ. އަދި، ބާސެލޯނާގެ ޓީމުގައި ތިބި ޒުވާން ކުޅުންތެރިންނާއި އެކު އެ ޓީމުގައި އޮތީ ރަނގަޅު ކުރިމަގެއް ކަމަށް ޒަވީ ފާހަގަކުރި އެވެ.

ޒަވީއާ މެދު ބާސެލޯނާ އިން ހިތްހަމަނުޖެހުނީ މިދިޔަ ބުރާސްފަތި ދުވަހު ސްޕެނިޝް ލީގުގައި އަލްމީރިއާ އަތުން އެޓީމު މޮޅުވި މެޗަށް ފަހު ދެއްކި ވާހަކަތަކާއި ގުޅިގެންނެވެ.

އެ މެޗަށް ފަހު ޒަވީ ބުނީ ކުރިއަށް އޮތް ތަނުގައި މާލީ ގޮތުން ރެއާލް މެޑްރިޑްގެ އިތުރުން ޔޫރަޕްގެ އެހެން ޓީމުތަކާއި ވާދަކުރުމަކީ ބާސެލޯނާ އަށް ފަސޭހަ ކަމަކަށް ނުވާނެ ކަމަށެވެ.

"އަހަރެންނަށް ހީވަނީ ބާސެލޯނާ ސަޕޯޓަރުން މި ހާލަތު ގަބޫލުކުރަން ޖެހޭނެހެން. ފައިސާގެ ގޮތުން ބަލާއިރު ރެއާލް މެޑްރިޑް އަދި ޔޫރަޕްގެ އެހެން ބައެއް ޓީމުތަކާ ބާސެލޯނާ ވާދަކުރުމަކީ އުނދަގޫ ކަމަކަށް ވާނެ" ހަގީގަތް އޮތްގޮތް ސާފުކޮށްދިނުމުގެ ގޮތުން ޒަވީ ބުންޏެވެ.

ޒަވީ ވަނީ 1998 އިން 2015 އަށް ބާސެލޯނާ އަށް ކުޅެ އެތައް ކާމިޔާބީއެއް ހޯދައިފަ އެވެ. ޒަވީ އެ ކްލަބުގެ ކޯޗުކަމާ ހަވާލުވީ 2021 ވަނަ އަހަރު އެވެ.

"އަހަރެމެން މިކަމަށް ހޭނޭނެ. މީގެ މާނައެއް ނޫން ބާސެލޯނާއިން ތަށިތަކަށް ވާދަނުކުރާނަމޭ. މިވަގުތު ބާސެލޯނާގެ ހާލަތު އޮތީ މިހެން. މިކަންކަމަށް ރަނގަޅު ގޮތްތަކެއް ބޭނުންވޭ" ޒަވީ ބުންޏެވެ.

ޒަވީ ވަކިކުރަން ވިސްނަނީ ކްލަބާއި ގުޅޭގޮތުން ދެއްކި ވާހަކަތަކާއި ގުޅިގެން ކަމަށް ބެލެވެ އެވެ.

ރިޕޯޓްތައް ބުނާގޮތުން ބާސެލޯނާ އިން ޒަވީގެ ބަދަލުގައި ގެންނަން ވިސްނަނީ އެޓީމުގެ ރިސާވް ޓީމުގެ ކޯޗު ރަފައެލް މާކޭޒް އެވެ.

ސްޕެނިޝް ލީގުގެ ޗެމްޕިއަންކަން މި ސީޒަނުގައި ހޯދި ރެއާލް މެޑްރިޑާއި ބާސެލޯނާއާ ދެމެދު 14 ޕޮއިންޓުގެ ފަރަގެއް އެބައޮތެވެ.

ބާސެލޯނާއާ ހަވާލުވުމަށް ފަހު ފުރަތަމަ ފުލް ސީޒަނުގައި ޒަވީ ވަނީ ސްޕެނިޝް ލީގު ކާމިޔާބުކޮށްފަ އެވެ. އެކަމަކު ޗެމްޕިއަންސް ލީގުގައި ކުރިއަކަށް ނުދެވުނެވެ.