ކުރީ ސަރުކާރުން ގޯތިތައް ދޫކުރީ ޤާނޫނީ ހަމައަކުން ނޫން: މުޢިއްޒު

ފާއިތުވި ސަރުކާރުގައި މާލޭ ސަރަހައްދުން ގޯތި ދޫކޮށްފައިވަނީ އެއްވެސް ޤާނޫނީ ހަމައެއް ނެތިކަމަށް ކުރީގެ ޕްރޮސެކިއުޓާ ޖެނެރަލް އަދި ތަޖުރިބާކާރު ޤާނޫނީ ވަކީލު އަލްއުސްތާޛު އަޙްމަދު މުޢިއްޒު ވިދާޅުވެއްޖެއެވެ.

މުޢިއްޒު މިފަދައިން ވިދާޅުވީ ސަރުކާރުން ދޫކުރާ ގޯތިތައް ދޫކުރާތާ ތިން މަސްދުވަހުގެ ތެރޭގައި ގޯތި ލިބުނު ފަރާތްތަކަށް ދިނުން ލާޒިމުވާނެ ގޮތަށް ބިމާބެހޭ ޤާނޫނަށް ރައްޔިތުންގެ މަޖިލީހުން ގެނައި އިސްލާހާމެދު އަލުން ވިސްނުމަށް މަޖިލީހަށް ރައީސް ޑރ.މުޙައްމަދު މުޢިއްޒު ފޮނުއްވުމާ ގުޅިގެން އެ އިސްލާހު މަޖިލީހަށް ހުށަހެޅުއްވި ގަލޮޅު ދެކުނު ދާއިރާގެ މެންބަރު މީކާއީލް ނަސީމު އެކްސްގައި ޕޯސްޓުކުރެއްވި ވާހަކަފުޅަކަށް ރައްދުދެއްވަމުންނެވެ.

މީކާއީލު ހުށަހަޅުއްވައި އެމްޑީޕީގެ އަޣުލަބިއްޔަތު އޮތް ދައުރު ހަމަވަމުންދާ މަޖިލީހުން ފާސްކުރި ޤާނޫނުގައި ބުނެފައިވަނީ ސަރުކާރުން ގޯތި ލިބޭ މީހުންގެ ލިސްޓު އާންމުކުރާތާ ތިން މަސް ތެރޭގައި ގޯތި ހަވާލުކުރަންވާނެ ކަމަށެވެ. އަދި އެ އިސްލާހަށް އަމަލުކުރަން ފެށުމުގެ ކުރިން ގޯތި ލިބޭ މީހުންގެ ލިސްޓެއް އާންމުކޮށްފައިވާނަމަ އެ ޤާނޫނަށް އަމަލުކުރަން ފަށާ ތާރީޚުން ފެށިގެން 3 މަސް ތެރޭގައި ގޯތި ހަވާލުކުރަންވާނެ ކަމަށެވެ.

އެ ބިލު ތަސްދީގުކުރެއްވުމުގައި ބަދަލުގައި އެ ބިލާމެދު އަލުން ވިސްނުމަށް އަނބުރާ މަޖިލީހަށް ބިލު ފޮނުއްވުމަށް ރައީސް ޑރ.މުޢިއްޒު ނިންމެވުމާ ގުޅިގެން އިއްޔެ އެކްސްގައި ކުރެއްވި ޕޯސްޓެއްގައި މީކާއީލު ވިދާޅުވީ އެ ބިލު ތަސްދީގުނުކުރައްވައި އަނބުރައި ފޮނުއްވައިލެއްވުމުން ބިންވެރިޔާ ސްކީމުގެ ދަށުން ދޫކުރަން ހަމަޖެހިފައިވާ ގޯތިތައް އަވަސް މުސްތަޤުބަލެއްގައި ހަވާލުކުރުމުގެ އެއްވެސް ނިޔަތެއް ސަރުކާރުގެ ނެތްކަން ސާފުވާ ކަމަށެވެ.

އެ ޕޯސްޓަށް ރައްދުދެއްވައި ތަޖުރިބާކާރު ޤާނޫނީ ވަކީލު މުޢިއްޒު ވިދާޅުވީ "ތިޔަރީ ޤާނޫނީ ހަމައަކުން ދޫކޮށްފައިވާ ގޯތިތަކެއް ނޫން" ކަމަށެވެ.

Thiyaee gaanoonee hama akun dhookoffaavaa goathi thakeh noon! https://t.co/Ogq57nv6WS

— Ahmed Muizzu (@AhmedMuizzu) May 16, 2024

މުއިއްޒު މިފަދައިން ވިދާޅުވެފައިވާއިރު ބިންވެރިޔާގެ ނަމުގައި ގޯތި ދޫކުރަން ހިންގި ސްކީމަކީ ޤާނޫނުއަސާސީގެ 17 ވަނަ މާއްދާއާ ޚިލާފަށް ވަކި ރަށަކަށް އުފަންވީތީ ތަފާތުކުރާ އަދި ޤާނޫނުއަސާސީގެ 41 ވަނަ މާއްދާގައި ކަށަވަރުކޮށްދީފައިވާ އެމީހަކު ވަޒަންވެރިވެ ދިރިއުޅޭ ރަށަކަުން ލިބޭ ހުރިހާ އިމްތިޔާޒުތަކާއި ހައްގުތަކެއް ހަމަހަމަކަމާއެކު ލިބުމުގެ ހައްގުން މަހުރޫމުކުރާ އުސޫލެއްގެ ދަށުން ހިންގި ސްކީމެއްކަން ގިނަ ޤާނޫނީ ތަޖުރިބާކާރުން އައީ ފާހަގަކުރަމުންނެވެ.

އޭގެ އިތުރަށް އެ ސްކީމު އިއުލާނުކުރިއިރު ދޫކުރަން ކަނޑައެޅި އަދަދަށްވުރެ އިތުރަށް ގޯތި ދޫކުރަން ނިންމާފައިވަނީ ދެވަނަ ފަހަރަކަށް އިއުލާނުކުރުމަކާ ނުލައެވެ. އަދި ގޯތި ދޫކުރިއިރު އެގޯތި ދިނުމަށް ކަނޑައެޅި ބިންތައް ހިއްކައި ނިމިފައިނުވެއެވެ. އެގޮތުން ގުޅިފަޅާއި ގިރާވަރުފަޅުން ގޯތި ލިބުނު މީހުންގެ ލިސްޓެއް އެއިރުގެ ސަރުކާރުން އިއުލާނުކުރިއިރު އެ ދެ ސަރަހައްދުގައި ގޯތި ކަނޑާފައި ދޫކުރާނެ ބިމެއް ނެތެވެ.

އަދި ގޯތި ދޫކުރުމުގެ ހުރިހާ ކަމެއް ހައުސިން މިނިސްޓްރީން ކުރިއަށް ގެންގޮސްފައިވަނީ ބިމާބެހޭ ޤާނޫނުގެ 10 ވަނަ މާއްދާއާ ޚިލާފަށެވެ. އެ މާއްދާގައި ބުނެފައިވަނީ ދިރިއުޅުމަށްޓަކައި ގެދޮރު އެޅުމަށާއި، އިމާރާތްކުރުމުގެ ބޭނުމަށް ސަރުކާރުން އެކަށައަޅާ ބިމުން ބަންޑާރަ ގޯތި ދޫކުރެވޭނީ މިނިސްޓްރީއިން ކަނޑައަޅައި އާއްމުކޮށް ޝާއިއުކުރާ އުސޫލުތަކާއި ކަމާބެހޭ ގަވާއިދުތަކާ އެއްގޮތްވާ ގޮތުގެމަތިން އެ ރަށެއް ނުވަތަ ސިޓީއެއް ނިސްބަތްވާ ކައުންސިލަކުން އެކަނި ކަމަށެވެ.

ހަމަައެހެންމެ އެ ޤާނޫނުގެ 13 ވަނަ މާއްދާގެ ދަށުން ގޯތި ދޫކުރެވޭ ފަރާތްތަކަށް ގޯތީގެ ރަޖިސްޓްރީ ހަދައިދިނުމާއި، އެރަޖިސްޓްރީތައް ދޫކުރުމުގެ މަސައްކަތްވެސް މަތިކޮށްފައިވަނީ އެ ގޯތި ދޫކުރި އިދާރާއަކަށެވެ. އެހެންކަމުން ގޯތި ރަޖިސްޓްރީކުރުމާއި ރަޖިސްޓްރީތައް ދޫކުރުމަކީވެސް ސިޓީ ކައުންސިލުން ކުރަންޖެހޭ ކަމެކެވެ.

ރިޔާސީ އިންތިޚާބާ ދިމާކޮށް މާލެ ސަރަހައްދުގައި ނުހިއްކާ ހުރި ފަޅުތަކާއި ހުޅުމާލޭގެ ދެވަނަ ފިޔަވަހިން އެމްޑީޕީ ސަރުކާރުގައި ގޯތި ދޫކުރަން ހިންގާފައިވާ ބިންވެރިޔާ ސްކީމަކީ ޤާނޫނުއަސާސީއާއި ޤާނޫނުތަކުގައި އެކަށައަޅާފައިވާ އުސޫލުތަކާ ޚިލާފަށް ހިންގި ސްކީމެއްކަން އެއިރުވެސް ވަކީލުން ފާހަގަކޮށްފައިވެއެވެ.