ވަޒީރުގެ އިލްތިމާސް: 'ފުރަތަމަ އާއިލާ'' މިއީ ކޮންމެ ކަމެއްގައިވެސް އިސްކުރާ ސިޔާސަތަށް ހެދުން

''ފުރަތަމަ އާއިލާ'' މިއީ ކޮންމެ މީހަކުވެސް ދިރިއުޅުމުގެ ކޮންމެ ކަމެއްގައިވެސް އިސްކުރާ ސިޔާސަތަށް ހެދުމަށް, އިޖުތިމާއީ އަދި އާއިލީ ތަރައްގީއާބެހޭ ވުޒާރާގެ ވަޒީރު ޑރ.ޢާއިޝަތު ޝިހާމް އިލްތިމާސް ކުރައްވައިފިއެވެ.

ވަޒީރު މި ގޮތަށް އިލްތިމާސް ކުރެއްވީ މިއަދު ފާހަގަކުރަމުންދާ ބައިނަލްއަގުވާމީ އާއިލާތަކުގެ ދުވަހުގެ މުނާސަބަތުގައި ދެއްވި މެސެޖުގައެވެ.

އެގޮތުން ވަޒީރު ދެއްވި މެސެޖުގައި ވަނީ ކޮންމެ ދުވަހަކީވެސް، ކޮންމެ ބޭފުޅަކު ވެސް އެބޭފުޅެއްގެ އާއިލާއަށް އެންމެ ބޮޑު އިސްކަމެއް ދެއްވާނެ ދުވަހަަކަށް ހެދުމަށް އެދިވަޑައިގެންފައެވެ.

މީގެއިތުރުން ކޮންމެ މީހަކީވެސް މައިންބަފައިންނަށް އަޅައިލާ މީހަކަށްވުމަށާއި އާއިލާ މެންބަރުންގެ ހާލު ބަލައި, ދަރިންނާއި އަނބިން އަދި ފިރިންނަށް ވަގުތުދޭ، އެމީހުންނާއެކު އުފާވެރި ވަގުތުތަކެއް ހޭދަކުރުމަށް އިސްކަންދޭ ބަޔަަކަށްވުމަށް ވެސް އެކަމަނާ އެދިވަޑައިގެންނެވިއެވެ.

''އަޅުގަނޑުގެ އެދުމަކީ އެކި ސަބަބުތަކާހުރެ އާއިލާ ރޫޅި، ދެމަފިރިން ވަކިވާން ޖެހޭ ހާލަތު ދިމާވެފައިވާ އާއިލާތަކުން ވެސް، އެ އާއިލާތަކުގެ ކުދިންނާއި އެ ކުދިންގެ މައިންބަފައިންނާމެދު އޮންނަ ގުޅުން ބަދަހިކުރުން.'' ކޮންމެ އާއިލާއަކީ ވެސް އެކުގައި އުޅުނަސް، ނުވަތަ ދުރުގައި އުޅެންޖެހިފައި ވީނަމަވެސް އާއިލީ ގުޅުން ދަމަހައްޓާ ބަޔަކު ކަމުގައިވުމަށް އިލްތިމާސް ކުރައްވަމުން ވަޒީރު ވިދާޅުވިއެވެ.

މި ރޮނގުން ދެއްކެވި ވާހަކަފުޅުގައި ވަޒީރު ވަނީ, އޯގާތެރި މުޖުތަމައުއެއްގެ އެންމެ މުހިންމު އެއް ސިފައަކީ ބަދަހި އާއިލާތައްކަން ވެސް ފާހަގަކުރައްވައިފައެވެ. އަދި އާއިލާތަކަކީ އަޚުވަންތަކަމާއި އެއްބަނޑު އެއްބަފާވަންތަކަން ދަމަހައްޓައި އެކަކު އަނެކަކަށް އަޅާލާ އޯގާތެެރި, އެހީތެރި، ކުލުނުވެރި، އެންމެން އެކުގައި ގުޅިގެން އުޅޭ އާއިލާތަކަކަށްވުމުގެ މުހިންމުކަމުގެ މައްޗަށް ވެސް އެކަމަނާގެ މެސެޖުގައި އަލިއަޅުވައިލައްވައިފައިވެއެވެ.

''އާއިލާގެ ހަމަޖެހުމާއި އުފާވެރިކަމަކީ މުުޖުތަމައުގެ ކުރިއެރުން. ގައުމުގެ ތަރައްގީގެ އަސްލު.'' ވަޒީރު ޑރ.ޢާއިޝަތު ޝިހާމް ވިދާޅުވިއެވެ.