ސިކް އެކްޓިވިސްޓުގެ މަރުގެ ތުހުމަތުގައި 4 ވަނަ އިންޑިއާ މީހަކު ކެނަޑާ ފުލުހުން ހައްޔަރުކޮށްފި

ފާއިތުވި އަހަރުގެ ޖޫން މަހުގައި ސިކް އެކްޓިވިސްޓެއް މަރައިލި މައްސަލާގައި ހަތަރުވަނަ އިންޑިއާ މީހަކު ކެނަޑާ ފުލުހުން ހައްޔަރުކޮށްފިއެވެ.

ބްރިޓިޝް ކޮލަމްބިއާ ފުލުހުންގެ އިންޓެގްރޭޓެޑް ހޮމިސައިޑް އިންވެސްޓިގޭޝަން ޓީމުން ނެރުނު ބަޔާނެއްގައި ބުނެފައިވަނީ މި މައްސަލާގައި މިހާރު ފުލުހުންގެ ބެލުމުގެ ދަށަށް ގެނެސްފައިވާ 22 އަހަރުގެ އަމަންދީޕު ސިންހު ހުރީ އެ މައްސަލައާ ގުޅުމެއް ނެތް، ހަތިޔާރު ގެންގުޅުމުގެ އެހެން މައްސަލައެއްގައި އޮންޓޭރިއޯގެ ޕީލް ސަރަހައްދުގެ ފުލުހުން ހައްޔަރުކޮށްފައި ކަމަށެވެ.

އެ ޔުނިޓުން ބުނީ މި މައްސަލާާގައި މިހާތަނަށް ކުރެވުނު ތަހުގީގުތަކުން ބްރިޓިޝް ކޮލަމްބިއާގެ ޕްރޮސެކިއުޓަރުންނަށް އަމަންދީޕް ސިންހުގެ މައްޗަށް ގަސްތުގައި މީހަކު ޤަތުލުކުރުމާއި މީހަކު ޤަތުލުކުރުމަށް ރޭވުމުގެ ކުށުގެ ދައުވާ އުފުލޭނެ މިންވަރަށް ހެކި ޤަރީނާ އެއްކުރެވިފައިވާ ކަމަށެވެ.

ފުލުހުން ބުނި ގޮތުގައި އަމަންދީޕަކީ ކެނަޑާގެ އޮންޓޯރިއޯގެ ބްރެމްޕްޓަންއާއި ބްރިޓިޝް ކޮލަމްބިއާގެ ސުރޭއާއި އެބޮޓްސްފޯޑްގައި ދިރިއުޅެމުންދާ އިންޑިއާ ރައްޔިތެކެވެ. އަދި އެ ތަހުގީގަކީ މިހާރުވެސް ކުރިއަށްދާ ތަހުގީގަކަށްވެފައި، އެ މައްސަލައިގެ އިޖުރާއާތުތައް ކޯޓު މަރުހަލާގައި ހިނގަމުންދާތީ އިތުރު ތަފުސީލެއް މިވަގުތު ހާމަކުރެވެން ނެތްކަމަށް ފުލުހުން ބުނެފައިވެއެވެ.

ސިކް އެކްޓިވިސްޓު ހަރްދީޕް ސިންހު ނީޖާރުގެ މަރުގެ މައްސަލާގައި މި މަހުގެ ކުރީ ކޮޅުގައި އިންޑިއާގެ ތިން ރައްޔިތުންކަމަށް ކަރަން ބާރްއާއި ކަމަލްޕްރީޓް ސިންހާއި، ކަރަންޕްރީޓް ސިންހުގެ މައްޗަށް ދައުވާކުރުމަށް ފޮނުވުމަށް އެ ތިން މީހުން ކެނަޑާ ފުލުހުން ހައްޔަރުކޮށްފައިވެއެވެ.

ނީޖާރުގެ މަަރުގައި އިންޑިއާ ސަރުކާރުން ބައިވެރިވެފައިވާކަމަށް އެކަށީގެންވާ ބުރަދަންހުރި ތުހުމަތުތަކެއް ކުރެވޭކަމަށް ކެނަޑާގެ ބޮޑުވަޒީރު ޖަސްޓިން ޓްރޫޑޯ ފާއިތުވި ސެޕްޓެންބަރު މަހުގައި އިއުލާނުކުރެއްވުމާ ގުޅިގެން ދެ ޤައުމުގެ ގުޅުންވަނީ ވަރަށް ބޮޑަށް ހީނަރުވެފައެވެ.

އިންޑިއާއިން ތުހުމަތުކޮށްފައިވާ ގޮތުގައި ނީޖާރަކީ އިންޑިއާއިން ވަކިވެގަނެ ސިކުންގެ ވަކި ދައުލަތެއް ޤާއިމުކުރުމަށް މަސައްކަތްކުރާ ނިރުބަވެރި ޖަމާއަތްތަކާ ގުޅުން އޮންނަ މީހެކެވެ. އޭނާގެ މަރުގައި އިންޑިއާ ސަރުކާރުގެ ބައިވެރިވުމެއް އޮތްކަމަށް ޓްރޫޑޯ ތުހުމަތުކުރެއްވުމާއެކު އިންޑިއާގައި މަސައްކަތްކުރައްވާ ކެނަޑާގެ 62 ޑިޕްލޮމެޓުންގެ ތެރެއިން 41 ބޭފުޅަކު އަނބުރާ ޤައުމަށް ގެންދަން އިންޑިއާއިން ކެނަޑާއަށް އެންގިއެވެ. އަދި އޭގެފަހުން ދެ ޤައުމުގެ ގުޅުން އޮތީ ނުތަނަވަސްކަމެއްގެ ތެރޭގައެވެ.

މި މައްސަލާގައި ހައްޔަރުކުރި މީހުންގެ ތެރެއިން ބްރާރަކީ ކިޔެވުމަށް ސްޓޫޑެންޓު ވިސާގައި ކެނަޑާއަށް އެތެރެވި މީހެއްކަން ސޯޝަލް މީޑިއާގައި ދައުރުވަމުންދާ ވީޑިއޯއަކުން ހާމަވުމާއެކު ކެނަޑާއަށް ކިޔަވަން އަންނަ ދަރިވަރުންނަށް ވިސާ ދޫކުރާ ނިޒާމާމެދު އެ ޤައުމުގެ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.

މުއްތަހަމުން ކެނަޑާއަށް އެތެރެވި ގޮތާއި އެމީހުން މިހާރު ކެނަަޑާގައި ދިރިއުޅެނީ ޤާނޫނީ ގޮތުން ސައްހަ ވިސާއެއް އޮވެގެންތޯ ބެލުމަށް ނޫސްވެރިން ސުވާލުކުރުމުން ކެނަޑާގެ އިމިގްރޭޝަނާއި ރެފިއުޖީންނާއި ރަށްވެހިކަމާ ގުޅޭ އިދާރާއިން ބުނެފައިވަނީ ހިނގަމުންދާ ތަހުގީގެއްގައި ޝާމިލުވާ ފަރުދުންތަކެއްގެ ހާލަތުގެ މައުލޫމާތު އެ އިދާރާއަށް ހާމަނުކުރެވޭނެ ކަމަށެވެ.