ގޮނޑި ގެއްލޭގޮތަށް ހުށަހެޅި ބިލާއި އިތުރު 2 ބިލެއް އަނބުރައި ގެންގޮސްފި

އެންޓި ޑިފެކްޝަން ގާނޫނުގެ ދަށުން މެންބަރުންގެ ގޮނޑި ގެއްލޭނެ ހާލަތްތައް ބަޔާންކޮށް މަޖިލީހަށް ހުށަހަޅާފައިވާ ބިލުގެ އިތުރުން 2 ބިލެއް އަނބުރާ ގެންގޮސްފިއެވެ.

މިއަދުގެ މަޖިލިސް ޖަލްސާގައި މަޖިލީހުގެ ރިޔާސަތުން އިއުލާންކޮށްފައިވާގޮތުން، ޖުމްލަ 3 ބިލެއް އަނބުރާ ގެންގޮސްފައިވެއެވެ. އެއީ، މެންބަރުންގެ ގޮނޑި ގެއްލޭ ހާލަތްތައް ބަޔާންކޮށް ގާނޫނަށް އިސްލާހު ގެނައުމަށް ހުށަހަޅާފައިވާ ބިލާއި، މެންބަރުންގެ އަދަދު ކަނޑައެޅުމަށް ހުށަހަޅާފައިވާ އިސްލާހުގެ އިތުރުން އިލެކްޝަންސް ކޮމިޝަން (އީސީ)އަށް މެންބަރުން އައްޔަންކުރުމުގެ ބާރު މަޖިލީހަށް ލިބިދޭގޮތަށް ހުށަހަޅާފައިވާ ބިލެވެ.

އެގޮތުން، މަޖިލިސް މެންބަރުންގެ ގޮނޑި ގެއްލޭނެ ހާލަތްތައް ބަޔާންކޮށް ބިލު ހުށަހަޅާފައިވަނީ، ހެންވޭރު ހުޅަނގު ދާއިރާގެ ޑިމޮކްރެޓްސްގެ މެންބަރު ހަސަން ލަތީފެވެ. އެ ބިލުގައިވާގޮތުން، އަމިއްލަ ގޮތުން މަޖިލީހަށް ކުރިމަތިލައިގެން ހޮވޭ މެންބަރަކު، ސިޔާސީ ޕާޓީއަކަށް ސޮއިކުރައްވައިފިނަމަ، އެ މެންބަރެއްގެ ގޮނޑި ގެއްލޭނެއެވެ.

އަދި މީގެ އިތުރުން، ސިޔާސި ޕާޓީއެއްގެ ފަރާތުން މަޖިލީހަށް ކުރިމަތިލާ މެންބަރަކު މަޖިލީހަށް ހޮވުމަށްފަހު، ޕާޓީގެ 3 ލައިން ވިޕަކާއި ހިލާފަށް ވޯޓު ދީފިނަމަ އެ މެންބަރެއްގެ ގޮނޑިވެސް ގެއްލޭނެއެވެ.

އަދި މެންބަރަކު މަޖިލީހަށް ހޮވާ ދާއިރާއެއްގެ ވަކި އަދަދެއްގެ ރައްޔިތުންނެއް އެ މެންބަރަކާއި ދެކޮޅަށް ޕެޓިޝަން ހުށަހަޅައިފިނަމަ، އެ މެންބަރެއްގެ ގޮނޑި ގެއްލޭނެކަމަށް ލަތީފް އަނބުރާ ގެންގޮސްފައިވާ ބިލުގައި ބަޔާންކޮށްފައިވެއެވެ.

އެންޓި ޑިފެކްޝަން ބިލަށް އަނބުރާ އަމަލުކުރަން ނިންމާފައިވަނީ ދައުރު ނިމުމަކަށް އައިސްފައިވާ މަޖިލީހުންނެވެ. އެ ގާނޫނު ފާސްކުރުމުގެ ފަހަތުގައި އެމްޑީޕީގެ މެންބަރުން ތިބި އިރު، އެ ގާނޫނަށް އަމަލުކުރަން ފެށުމުގެ މައިގަނޑު މަގްސަދަކަށްވެގެންދިޔައީ އެ ޕާޓީގެ ޓިކެޓުގައި މަޖިލީހަށް ހޮވުނު ގިނަ މެންބަރުންތަކެއް ސަރުކާރު ހިންގާ ޕާޓީ ޕީއެންސީއަށް ހޮވުމުން އެ ޕާޓީއަށް އޭރު މަޖިލީހުގައި ލިބިފައިއޮތް ސުޕާ މެޖޯރިޓީ ގެއްލުމުންނެވެ.