12 އަހަރުގެ ކުއްޖަކަށް ޖިންސީ ގޯނާކުރިކަމުގެ ތުހުމަތުގައި 61 އަހަރުގެ މީހަކު ހައްޔަރުކޮށްފި

ރާއްޖޭގެ ދެކުނުގެ ރަށެއްގައި 12 އަހަރުގެ އަންހެންކުއްޖަކަށް ޖިންސީ ގޯނާ ކުރި މައްސަލާގައި 61 އަހަރުގެ ފިރިހެނެއް ހައްޔަރުކޮށްފިއެވެ.

ފުލުހުން މަޢުލޫމާތުދެއްވާގޮތުގައި މިދިޔަ އާދީއްތަދުވަހު ފުލުހުންގެ ދެކުނު ކޮމާންޑަށް ހުށަހެޅުނު މިމައްސަލާގައި ތުހުމަތުކުރެވޭ އުމުރުން ދުވަސްވީ މީހަކު ކޯޓުއަމުރެއްގެ ދަށުން ހައްޔަރުކޮށްފައިވާކަމަށެވެ.

ފުލުހުން އިތުރަށް މަޢުލޫމާތުދެއްވާގޮތުގައި ހައްޔަރުކުރެވުނު މީހާގެ ބަންދާމެދު ގޮތެއް ނިންމުމަށް ކޯޓަށް ގެންދިޔުމުން ތަހުގީގު މަރުހަލާ ނިމެންދެން ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ.

މައްސަލައިގެ ބާވަތުން ކުޑަކުއްޖަކު ހިމެނޭ މައްސަލައަކަށް ވާތީވެ, ކުޑަކުއްޖާގެ ވަނަވަރު ހިމާޔަތްކުރުމުގެ ގޮތުން މިމައްސަލަ ހިނގި ރަށް އަދި މީހާ ހައްޔަރުކުރެވުނު ރަށް ފުލުހުން ވަނީ ސިއްރުކޮށްފައެވެ.

ފުލުހުން މަޢުލޫމާތުދެއްވާ ގޮތުގައި މިފަދަ މައްސަލަތަކަކީ ފުލުހުންގެ އިދާރާއިން ވަރަށް ސީރިއަސް މައްސަލަތަކެއްގެ ގޮތުގައި ބަލައި ތަހުޤީޤުކުރާ މައްސަލަތަކެކެވެ.