ލެވަންޑޯސްކީ ހެޓްރިކް ހަދައި ވެލެންސިއާ ބަލިކޮށްފި

ރޮބާޓް ލެވަންޑޯސްކީގެ ހެޓްރިކާ އެކު ސްޕެނިޝް ލީގުގައި ރޭ ބާސެލޯނާ އިން 2-4 އިން ވެލެންސިއާ ބަލިކޮށްފި އެވެ.

މެޗުގައި ލެވަންޑޯސްކީ ހެޓްރިކް ހެދީ 49، 82 އަދި 93 ވަނަ މިނެޓުގަ އެވެ. ބާސެލޯނާގެ ފުރަތަމަ ގޯލު 22 ވަނަ މިނެޓުގައި ޖެހީ ފާމިން ލޮޕޭޒް އެވެ.

މެޗުގައި ވެލެންސިއާގެ ފުރަތަމަ ގޯލު 27 ވަނަ މިނެޓުގައި ޖެހީ ހޫޑޯ ޑޫރޯ އެވެ. ވެލެންސިއާ މެޗުގައި ލީޑު ނަގައިދިނީ 38 ވަނަ މިނެޓުގައި ލިބުނު ޕެނަލްޓީއަކުން ޕެޕެލޫ އެވެ.

ވެލެންސިއާ އަށް މައްސަލަތައް ދިމާވީ ފުރަތަމަ ހާފުގެ އިތުރު ވަގުތުގައި އެޓީމުގެ ގޯލްކީޕަރު ޖިއޯޖީ މަމާޑާޝްވިލީ އަށް ސީދާ ރަތް ކާޑެއް ދެއްކުމުންނެވެ.

އެއް ކުޅުންތެރިއަކު މަދުކޮށް ކުޅެން ޖެހުމުން ބާސެލޯނާ ހުއްޓުވަން ވެލެންސިއާ އަށް އުނދަގޫވި އެވެ. ލެވަންޑޯސްކީ ހެޓްރިކް ހެދީ ދެ ވަނަ ހާފުގައި ލިބުނު ފުރުސަތުތަކުގެ ބޭނުން ހިފައިގެންނެވެ. އެއީ މި ސީޒަނުގައި ލެވަންޑޯސްކީގެ ފުރަތަމަ ހެޓްރިކެވެ.

މޮޅާ އެކު ބާސެލޯނާ އޮތީ އެއް ވަނައިގައި އޮތް ރެއާލް މެޑްރިޑަށް ވުރެ 11 ޕޮއިންޓް ފަހަތުގަ އެވެ.

ރެއާލް އަށް 33 މެޗުން 84 ޕޮއިންޓް ލިބިފައިވާއިރު ބާސެލޯނާ އަށް 33 މެޗުން ލިބިފައިވަނީ 73 ޕޮއިންޓެވެ. ތިން ވަނައިގައި އޮތީ 71 ޕޮއިންޓް ހޯދާފައިވާ ޖިރޯނާ އެވެ. ހަތަރު ވަނައިގައި އޮތް އެތުލެޓިކޯ މެޑްރިޑަށް ލިބިފައިވަނީ 64 ޕޮއިންޓެވެ.

ލީގު ޗެމްޕިއަންކަން ހޯދަން ބާކީ ފަސް މެޗުން ރެއާލަށް ބޭނުންވަނީ ހަތަރު ޕޮއިންޓެވެ. އެހެންވެ މި ސީޒަނުގެ ލީގު ޗެމްޕިއަންކަން ހޯދުމުގެ ފޭވަރިޓުންނަކީ ރެއާލް އެވެ.