"ދެގައުމުގެ ގުޅުމަށް ބަދަލު ނައިސް އިންޑިއާ ސިފައިން ފޭބުމަކީ ކުރިއެރުމެއް"

އިންޑިއާއާއި ރާއްޖެއާ ދެ ގައުމުގެ ދެމެދުގައި އޮތް ޒަމާންވީ ގުޅުމަށް ބަދަލު ނައިސް، އެ ގައުމުގެ ސިފައިން ރާއްޖެއިން ފޭބުމަކީ ލިބުނު ކުރިއެރުމެއް ކަމަށް ސިޓީތަކާއި އިދާރީ ދާއިރާތައް ހިންގުމާބެހޭ މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒު ފ. އަތޮޅުގެ ރަށްތަކަށް ކުރެއްވި ދަތުރުފުޅުގެ ތެރެއިން އެ އަތޮޅު ފީއަލީގެ ރައްޔިތުންނާ ބައްދަލުކުރުމަށް ބޭއްވި ޖަލްސާގައި ވާހަކަދައްކަވަމުން މިނިސްޓަރު ވިދާޅުވީ، ރައީސްގެ ވައުދުފުޅާ އެއްގޮތަށް އިންޑިއާގެ ސިފައިން ރާއްޖެއިން ބޭލުމުގެ މަސައްކަތް ކުރެއްވީ ޑިޕްލޮމަސީގެ ރިވެތި އުސޫލުތަކުގެ ދަށުން ކަމަށެވެ.

އަދި އެކަން ކުރުމުގައި އިންޑިއާއާއި ރާއްޖެއާ ދެ ގައުމުގެ ދެމެދުގައި އޮތް ޒަމާންވީ އެކުވެރި ގުޅުމަށް އަސަރު ނުކުރުމަކީ ރައީސް މުއިއްޒަށް ޝުކުރު ދަންނަވަންޖެހޭ ކަމެއް ކަމަށެވެ.

"މީގެ ކުރީގެ ތަޖުރިބާއާ ހިލާފަށް އަދި ބައިނަލްއަގުވާމީ ދުނިޔޭގައިވެސް މިކަންކަން ހިނގާފައިވާ ގޮތާ ހިލާފަށް، އަޅުގަނޑުމެން މިއަދު އެންމެ އުފާކުރަންޖެހޭ އެއްކަމަކީ ޑިޕްލޮމަސީގެ ރިވެތި އުސޫލުތަކާ އެކީގަ އެއްވެސް ނުތަނަވަސްކަމެއް، ކަންބޮޑުވުމެއް ނެތި އިރާދަކުރެއްވީތީ އިންޑިއާއާއި ރާއްޖެއާ އޮތް ޒަމާންވީ އެކުވެރިކަމުގެ ގުޅުން އެ އޮތްގޮތަށް އޮވެމެ އެކަމަކު އިންޑިއާ ސިފައިން މިއަދު ރާއްޖެއިން ފައިބައިގެން ދާ ދިޔުން،" މިނިސްޓަރު ވިދާޅުވި އެވެ.

ރައީސް މުއިއްޒުގެ ރިޔާސީ ވައުދުފުޅާ އެއްގޮތަށް، އިންޑިއާ ސިފައިން ރާއްޖެއިން ބޭލުމުގެ މަސައްތަށް ދެ ގައުމުގެ ދެމެދުގައި އެއްބަސްވުމުގައި ސޮއިކޮށްފައިވަނީ އަންނަ މެއި މަހުގެ 10 ވަނަ ދުވަހުގެ ކުރިން ރާއްޖޭގައި ތިބި ހުރިހާ އިންޑިއާ ސިފައިން ފޭބުމަށެވެ.

އެ އެއްބަސްވުމުގެ ދަށުން، އައްޑޫ ސިޓީގައި އޮތް އިންޑިއާގެ ހެލިކޮޕްޓަރާއެކު އެސިޓީގައި ތިބި އިންޑިއާ ސިފައިން (އިންޑިއާ ސިފައިންގެ ފުރަތަަމަ ބެޗު) ރާއްޖެއިން ފޮނުވާލީ މިދިޔަ މާޗު މަހުގެ 10 ވަނަ ދުވަހު އެވެ. އެއީ އިންޑިއާ އިން ރާއްޖެއަށް ހަދިޔާކުރި ހެލިކޮޕްޓަރު ދުއްވަން އައްޑޫ ސިޓީ ގަމުގައި ތިބި 26 ސިފައިންނެވެ.

އަދި ރާއްޖޭގައި ތިބި އެ ގައުމުގެ ސިފައިންގެ ދެވަނަ ބެޗު މި މަހު ނުވަވަނަ ދުވަހު ފޮނުވާލާފައިވާ ކަން ރައީސް ޑރ. މުއިއްޒު ވަނީ މިދިޔަ ހުކުރު ދުވަހުގެރޭ އައްޑޫ ސިޓީގައި ބޭއްވި ޖަލްސާއެއްގައި އިއުލާން ކުރައްވާފަ އެވެ. އެއާއެކު ދެން ބާކީ ތިބި އިންޑިއާ ސިފައިން ރާއްޖެއިން ފައިބާނީ އަންނަ މެއި މަހުގެ 10 ގެ ކުރިންނެވެ.