މިވެރިކަމުގައި ސިޔާސީވެގެން މީހަކު ހައްޔަރުކޮށް ސުވާލުކުރާތަނެއް ނުފެންނާނެ: ރައީސް

މި ވެރިކަމުގައި މީހަކު ސިޔާސީވެގެން ނުވަތަ ކުރީގެ ސިޔާސީ ލީޑަރަކަށްވީތީ ހިފައި ހައްޔަރުކޮށް ސުވާލުކޮށް ބަންދުކުރާ މަންޒަރެއް ނުފެންނާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ރޭ ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ވެރިކަންކުރާ ޕީއެންސީގެ ޓިކެޓުގައި އިހަވަންދޫ ދާއިރާގެ ރައްޔިތުންގެ މަޖިލީހުގެ ގޮނޑިއަށް ވާދަކުރައްވާ ކެންޑިޑޭޓު އަޙްމަދު ނަސީރުގެ ކެމްޕެއިނު ހަރަކާތެއްގައި ރޭ ދެއްކެވި ވާހަކަފުޅުގައެވެ. އެމަނިކުފާނު ވިދާޅުވި ގޮތުގައި ފާއިތުވި ތަނުގައި އަބަދުވެސް ފެންނަނީ ސަރުކާރު ބަދަލުވުމުން އައު ސަރުކާރުން ކޮންމެވެސް ކޮމިޝަނެއް ނުވަތަ ކޮމިޓީއެއް ހަދައިގެން ކުރީގެ ސިޔާސީ ލީޑަރުންނާއި ސިޔާސީ މީހުން ފަހަތުން ދުވާ މަންޒަރު ކަމަށެވެ.

"މިދިޔަ ޒަމާންތަކުގައި ވެރިކަންތައް ބަދަލުވެގެން އަބަދުވެސް ކޮންމެވެސް ކަހަލަ ރިޔާސީ ކޮމިޝަނެއް ހަދައިގެން ނޫނިއްޔާ ކޮންމެވެސް އެކަހަލަ ކަމެއްގެ ތެރެއިން ކުރީގެ ސިޔާސީ ލީޑަރުން ހިފާ ހައްޔަރުކުރުމާއި، ނޫނީ ސިޔާސީވީތީ ހިފައި ހައްޔަރުކުރުމާއި، އަބަދުވެސް އެކަހަލަ ބިރުވެރިކަމެއްގެ ތެރޭގައި ނޫންތޯ ދުވަސްތައް ދިޔައީ؟ މިހާރަކު ނުފެންނާނެ އެކަމެއް. ސިޔާސީ މީހަކަށްވީތީ އެއްވެސް މީހަކު ހައްޔަރުނުކުރާނެ މި ސަރުކާރުން،" ރައީސް ވިދާޅުވިއެވެ.

އިތުރަށް އެމަނިކުފާނު ވިދާޅުވީ އެމަނިކުފާނު ހުވައިކުރައްވައިގެން ހުންނެވީ ޤާނޫނީ ވެރިކަމެއް ހިންގަވަން ޤާނޫނުއަސާސީއަށް ހުރުމަތްތެރިކޮށް ހިއްތެވުމަށް ކަމަށެވެ. އެހެންކަމުން ޤާނޫނާ ޚިލާފުވެގެން ޤާނޫނުގެ އިމުގެ ތެރެއިން އަޅަންޖެހޭ ފިޔަވަޅުތައް އެޅުއްވުމަކީ އެމަނިކުފާނު ކުރައްވަންޖެހިވަޑައިގަންނަވާނެ ކަމެއް ކަމަށެވެ. ނަމަވެސް އެއްވެސް މީހަކު ސިޔާސީވެގެން ނުވަތަ ސިޔާސީ މަސައްކަތެއްކޮށްގެން ހައްޔަރުކޮށް ސުވާލުކޮށް ނުހައްދަވާނެ ކަމަށެވެ.

"ޤާނޫނީ ވެރިކަމެއް ކުރުމަކީ އަޅުގަނޑުގެ މައްޗަށްވެސް ލާޒިމުކަމެއް. ޤާނޫނުއަސާސީއަށް ހުރުމަތްތެރިކޮށް ހިތަން ﷲ ގަންދީ ހުވާކޮށްގެން އަޅުގަނޑު މިހުރީ. އެހެންވީމާ ޤާނޫނީ ވެރިކަމެއް ކުރުމުގައި ޤާނޫނުގައި އޮންނަ ގޮތުން އެމީހަކު ކުށެއްކޮށްފިއްޔާ، އެކަމެއް ބެލުމަކީ އަޅުގަނޑު ކުރަންޖެހޭނެ ކަމެއް. އެވާހަކައެއް ނޫން. ސިޔާސީވެގެން އެމީހަކު ގެންގޮސް ހިފައި ހައްޔަރުކޮށް ސުވާލެއްނުކުރާނެ. އެކަމެއް ނުކުރާނެ،" ސިޔާސީ މަސައްކަތުގައި އުޅޭތީ މީހަކު ހައްޔަރުކޮށް ސުވާލުކޮށް ނުހައްދަވާނެކަމުގެ ޔަގީންކަން ދެއްވަމުން ރައީސް ވިދާޅުވިއެވެ.

ރައީސް ވިދާޅުވީ ވަރަށް ފަހުން ފުލުހުންނާއި ބައްދަލުކުރެއްވިކަމަށާއި، އެ ބައްދަލުވުމުގައި އެމަނިކުފާނު ފުލުހުންނަށް ދެއްވި ޔަގީންކަމަކީ ފުލުހުންގެ މައްޗަށް ސިޔާސީ ނުފޫޒެއް ނުހިނގާނެކަމުގެ ޔަގީންކަމަށާއި، އެމަނިކުފާނާއި ހިސާބުން އަދި މިނިސްޓަރުގެ ފެންވަރުން އަދި އެއަށްވުރެ ދަށް ފައްތިންވެސް ސިޔާސީ ފައިދާ ހޯދުމަށް ކޮމިޝަނާ އޮފް ޕޮލިސް ނުވަތަ އެހެން އޮފިސަރުންނަށް ގުޅައިގެން ނުފޫޒު ނުފޯރުވާނެކަމަށް ވިދާޅުވި ކަމަށެވެ.

"ކުރީގައި ވެފައި އޮތް ގޮތަށް އެސްއޯ ފުލުހުން ގޮސް ރައްޔިތުންނަށް އަނިޔާކުރާ މުއައްސަސާއެއްގެ ގޮތުގައި ލޭބަލްވެފައި އޮތް އޮތުން ބޭނުމެއް ނޫނޭ އެހެންވާކަށް.،" ރައީސް ވިދާޅުވިއެވެ. އަދި އެ ސިޔާސަތުގެ މިސާލެއްގެ ގޮތުގައި ވަރަށް ފަހުން ކޫއްޑޫގައި، ފައިސާ ނުލިބިގެން މަސްވެރިންކުރި އިހުތިޖާޖުގައި މަސްވެރިންނާ ދެކޮޅަށް ފުލުހުން ފޮނުވުމަށް ވަރަށް ގިނަ ބޭފުޅުން މަޝްވަރާއެރުވި ނަމަވެސް އެގޮތަށް އަމަލުނުކުރައްވައި މަޝްވަރާކޮށްގެން އެކަމަށް ހައްލު ހޯއްދެވުމަށް ނިންމެވިކަމަށް ރައީސް ވިދާޅުވިއެވެ.

"ކުރިއަށް އޮތް ތާނގައިވެސް އެނޫން ގޮތެއް ނެތިގެން، ހަމަ ޤައުމުގެ މަސްލަހަތު އެއްކޮށް ގެއްލި، ރަށުގެ މަސްލަހަތު އެއްކޮށް ގެއްލިގެން ނޫން ގޮތަށް ނުފެންނާނެ ކުރީގައި ފެނުނު ކަންކަމެއް. ހަމަ ފުލް ރެސްޓްރެއިންޓް [ފުރިަހަމަ ހިފަހެއްޓުން] އަޅުގަނޑުމެންގެ ޕޮލިސީއަކަށްވާނީ.،" ރައީސް ވިދާޅުވިއެވެ.