ބާސެލޯނާ އިން ރެއާލްގެ ލީޑު ފަސް ޕޮއިންޓަށް ކުޑަކޮށްފި

ސްޕެނިޝް ލީގުގައި ރޭ ބާސެލޯނާ ހަނިގޮތަކަށް 0-1 އިން ލަސް ޕަލްމާސް ބަލިކޮށް، އެއް ވަނައިގައި އޮތް ރެއާލް މެޑްރިޑާ ފަސް ޕޮއިންޓް ގާތަށް ޖެހިލައިފި އެވެ.

ރޭ ހޯދި މުހިއްމު މޮޅާ އެކު ބާސެލޯނާ ދެ ވަނައިގައި އޮތީ 30 މެޗުން 67 ޕޮއިންޓް ހޯދައިގެންނެވެ. އެއްވަނައިގައި އޮތް ރެއާލަށް 29 މެޗުން ލިބިފައިވަނީ 72 ޕޮއިންޓެވެ. ލީގުގައި ރެއާލް މިއަދު އެތުލެޓިކް ބިލްބާއޯއާ ދެކޮޅަށް ނުކުންނާނެ އެވެ. އެ މެޗުން މޮޅުވެއްޖެ ނަމަ ރެއާލަށް އެއް ވަނައިގެ ލީޑު 8 ޕޮއިންޓަށް ފުޅާކުރެވޭނެ އެވެ.

ބާސެލޯނާގެ ދަނޑުގައި ކުޅުނު މެޗުގެ 24 ވަނަ މިނެޓުގައި ލަސް ޕަލްމާސްގެ ގޯލްކީޕަރު އަލްވާރޯ ވަޔެސް އަށް ރެފްރީ ވަނީ ސީދާ ރަތް ކާޑެއް ދައްކާފަ އެވެ. ވަޔެސް އަކީ މި ސީޒަނުގައި މޮޅު ކުޅުމެއް ދައްކަމުން އަންނަ ކީޕަރެކެވެ.

މެޗުގައި ބާސެލޯނާގެ ހަމައެކަނި ގޯލު 59 ވަނަ މިނެޓުގައި ޖެހީ ރަފީނިއާ އެވެ. އޭނާ ގޯލު ޖެހީ ޔާއޯ ފީލިކްސް ދިން ބޯޅައަކުންނެވެ. ރޭގެ ގޯލާ އެކު ރަފީނިއާ އަށް މި ސީޒަނުގެ ލީގުގައި އަދި ޖެހުނީ ފަސް ގޯލެވެ. ރޭގެ ގޯލަކީ ފެބްރުއަރީ މަހުގެ 24 ވަނަ ދުވަހުގެ ފަހުން ރަފީނިއާ ޖެހި ފުރަތަމަ ގޯލެވެ.

ލީގުގެ ތިން ވަނައިގައި އޮތީ 29 މެޗުން 62 ޕޮއިންޓް ލިބިފައިވާ ޖިރޯނާ އެވެ. ޖިރޯނާ އަކީ ސީޒަނުގެ ބޮޑު ބައެއްގައި ރެއާލާ ވާދަކުރަމުން އައި ޓީމެކެވެ. އެކަމަކު ފަހަކަށް އައިސް އެޓީމުގެ ނަތީޖާތައް ވަނީ ދަށްވެފަ އެވެ.

ސްޕެނިޝް ލީގުގައި ރޭ ގެޓާފޭ ވަނީ 1-0 އިން ސެވިއްޔާ ބަލިކޮށްފަ އެވެ. އަލްމީރިއާ ވަނީ އަމިއްލަ ދަނޑުގައި 3-0 އިން އޮސަސޫނާ އަތުން ބަލިވެފަ އެވެ. ވެލެންސިއާ އާއި މަޔޯކާ ކުޅުނު މެޗު ނިމުނީ 0-0 އިން އެއްވަރުވެގެންނެވެ.