ބްރޯޑްކޮމްއަށް ނުޒުހާ އައްޔަންކުރިކަމުގެ ލިޔުން ގެއަށް ފޮނުވީ އަވަސްކުރުމުގެ ގޮތުން: ޚަލީލް

މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ ހުސްވެފައިވާ މަގާމަށް ރާއްޖެ ޓީވީގެ ކުރީގެ ޕްރެޒެންޓަރު އައިމިނަތު ނުޒުހާ އައްޔަންކޮށްފިއެވެ.

މީގެ ކުރިން މިނިވަން މުއައްސަސާތަކުގެ އެފަދަ މަގާމުތަކަށް މެންބަރުން އައްޔަންކުރިކަމުގެ ފަތްކޮޅު އަރުވަނީ ރައީސް އޮފީހުގައި ބާއްވާ ޚާއްސަ ރަސްމިއްޔާތެއްގައި ރައީސުލްޖުމްހޫރިއްޔާ އެވެ. އެހެން ނަމަވެސް ނުޒުހާއަށް މަގާމުގެ ފަތްކޮޅު ފޮނުވީ އޭނާގެ ގެއަށް ކަމަށް މައުލޫމާތު ލިބެއެވެ.

މަގާމުތަކަށް ބޭފުޅުން އައްޔަންކުރަން ޚާއްސަ ރަސްމިއްޔާތު ބާއްވާއިރު، ނުޒުހާއަށް މަގާމުގެ ފަތްކޮޅު އެރުވުމަށް ރަސްމިއްޔާތު ނުބޭއްވީ ކީއްވެތޯ ސުވާލުކުރެއްވުމުން ކޮމިއުނިކޭޝަން މިނިސްޓަރ އިބްރާހީމް ޚަލީލް ވިދާޅުވީ، މި މަގާމަށް މީހަކު އައްޔަނު ކުރުމަކީ ރަސްމިއްޔާތެއް ބާއްވައި، ފަތްކޮޅު އަރުވާގޮތަށް ކުރަން ޖެހޭ ކަމެއްގެ ގޮތުގައި ގާނޫނުގައި ނޯންނަ ކަމަށާއި، އެކަން އެގޮތަށް ކުރެއްވީ އެމަގާމަށް ބޭފުޅަކު އައްޔަންކުރަން ލަސްވެފައިވާތީ އަވަސް ކުރުމުގެ ގޮތުން ކަމަށެވެ.

ބްރޯޑްކޮމް އަށް ބޭފުޅަކު އައްޔަން ކުރަނީ މިދިޔަ އަހަރު ޖެނުއަރީ 8 ގައި ކޮމިޝަންގެ މެމްބަރަކަށް ހުންނެވި އަހުމަދު ގައިސް އިސްތިއުފާ ދެއްވުމާ ގުޅިގެންނެވެ. މި މަގާމަށް ނުޒުހާ އައްޔަންކުރަން ރައްޔިތުންގެ މަޖިލީހުން ފާސްކޮށްފައި ވަނީ މިދިޔަ މަހުގެ 21 ވަނަ ދުވަހުއެވެ.

ބްރޯޑްކޮމްގެ މިހާރުގެ ރައީސަކީ މަރިޔަމް ވަހީދާއެވެ. ނައިބު ރައީސަކީ މުހައްމަދު ފަޒީނެވެ. އެ ކޮމިޝަނުގައި ދެން ތިއްބަވަނީ އަލީ ޔޫސުފާއި އާމިނަތު އަމީނާއި ޝިފްލާ އިބްރާހިމްގެ އިތުރުން ސޮފާ ޝަފީގެވެ.