ފެކްޓު ޗެކް: އުމްރާނީ ތަރައްޤީގެ މަޝްރޫޢުތައް ހުއްޓާލައިފިކަމަށް ވިދާޅުވެ ރައީސް އިބްރާހީމު ހެއްދެވީ އިތުރުފުޅެއް

އިދިކޮޅު އެމްޑީޕީގެ އެޑްވައިޒަރުގެ މަޤާމުގައި ހުންނެވި ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ށ.މިލަންދޫއަށް ވަޑައިގެން އެރަށުގައި ވާހަކަދައްކަވަމުން މިހާރުގެ ސަރުކާރުން ކުރިން ފަށާފައި ހުރި ތަރައްޤީގެ މަޝްރޫޢުތައް ހުއްޓާލާފައިވާކަމަށް ވިދާޅުވެފައިވެއެވެ.

އެމަނިކުފާނު ވިދާޅުވެފައިވަނީ މި ސަރުކާރު ވެރިކަމަށް އައިސް ކުރިން ކުރަން ފަށާފައި ހުރި ހުރިހާ މަސައްކަތެއްހެން ހުއްޓާލާފައިވާ ކަމަށެވެ. ފައިސާ ނެތްކަމަށް ބުނެ ސަރުކާރުން މިހާރު މަސައްކަތްތައް މަޑުޖައްސާފައިވާ ކަމަށެވެ.

ރައީސް އިބްރާހީމު މިފަދައިން ވިދާޅުވި ނަމަވެސް "ދިޔަރެސް"އިން ހޯދާފައިވާ މައުލޫމާތުތަކަށް ބަލާއިރު ކުރީ ސަރުކާރުގެ ދައުރު ނިމުނުއިރު ފެށިފައި ހުރި ގިނަ މަސައްކަތްތަކެއް މަޑުޖެހިފައިވާކަން ފާހަގަކުރެވެއެވެ. އަދި އެ މަސައްކަތްތައް މިސަރުކާރުން އަލުން ފަށާފައިވާކަން އެ މައުލޫމާތުތަކުން އެނގެއެވެ.

ރައީސް އިބްރާހީމުގެ ވެރިކަން ނިމުނުއިރު ފެނާއި ނަރުދަމާގެ 102 މަޝްރޫޢެއްގެ އަމަލީ މަސައްކަތް ކުރިއަށްދިޔައެވެ. ނަމަވެސް އެ ހުރިހާ މަޝްރޫޢެއްހެން ހުރީ އެއްބަސްވުމުގައި ކަނޑައެޅި މުއްދަތު ފަހަނައެޅިއިރުވެސް މަސައްކަތް ނުނިމިއެވެ. އެއިން 27 މަޝްރޫޢެއްގެ މަސައްކަތް އެވަގުތު މެދުކެނޑިފައި އޮތެވެ.

މެދުކެނޑިފައި ހުރި މަޝްރޫޢުތަކގެ ތެރެއިން 3 މަޝްރޫޢެއްގެ މަސައްކަތް މިހާރުގެ ސަރުކާރުންވަނީ އަލުން ފަށާފައެވެ. އަދި ހިނގަމުން އައި މަޝްރޫޢުތަކުން 8 މަޝްރޫޢެއް ޓެސްޓުކުރުމަށްފަހު ކޮމނިޝަންކޮށްފިއެވެ. އަދި 10 މަޝްރޫޢެއް ނިންމައި ޚިދުމަތް ދިނުމަށް އޮޕަރޭޓަރާ މިހާރުވަނީ ހަވާލުކޮށްފައެވެ.

ކުރީ ސަރުކާރުން އިންތިޚާބުތަކާ ދިމާކޮށް ފެށި މަގުހެދުމުގެ 17 މަޝްރޫޢެއް އޮތެވެ. ދައުރު ނިމުނުއިރު އެއިން އެއްވެސް މަޝްރޫޢެއް ނިންމައިނުލެވެއެވެ. ހުރިހާ މަޝްރޫޢެއް ހުރީ މަޑުޖެހި ހުއްޓިފައެވެ. އެ 17 މަޝްރޫޢުގެ މަސައްކަތްވެސް އައު ސަރުކާރުން މިހާރުވަނީ ފަށާފައެވެ. އެ މަޝްރޫޢުތަކާއެކު މުޅިން އަލަށް މަގުހެދުމުގެ 2 މަޝްރޫޢެއް ފަށާފައިވެއެވެ. މަގު ހެދުމުގެ ޖުމްލަ 19 މަޝްރޫޢެއްގެ އަމަލީ މަސައްކަތް މިސަރުކާރުން އަންނަނީ ހިންގަމުންނެވެ.

ކުރީ ސަރުކާރުން ފެށި އެއާޕޯޓު ހެދުމުގެ މަޝްރޫޢުތަކުގެ ތެރެއިން ރިޔާސީ އިންތިޚާބާ ދިމާކޮށް އިއުލާނުކުރި ތ.ވިލިފުށި، ބ.ތުޅާދޫ އަދި ފ.ބިލެއްފަހީ އެއާޕޯޓުތަކުގެ މަސައްކަތް އޮތީ އެކީގައި ހުއްޓިފައެވެ. ސަބަބަކީ މަޝްރޫޢުތައް ހިންގަން އިއުލާނުކުރި ނަމަވެސް އެޑްވާންސް ފައިސާގެ ގޮތުގައި ސަރުކާރުން ދޭންޖެހޭ ފައިސާ ދޫކޮށްފައިނުވާތީއެވެ.

އެ ތިން މަޝްރޫޢު އަލުން ފެށުމަށް އެޑްވާންސް ފައިސާ ދިނުމުގެ މަސައްކަތް މި ސަރުކާރުންވަނީ ފަށާފައެވެ. އަދި ބާކީ އޮތް 5 އެއާޕޯޓުގެ މަޝްރޫޢު މި ސަރުކާރުން އަންނަނީ މަޑުޖެއްސުމެއްނެތި ކުރިއަށްގެންދަމުންނެވެ.

ސަރުކާރު ބަދަލުވިއިރު 76 ރަށެއްގެ ބަނދަރު ހެދުމާއި ތޮށިލުމުގެ މަސައްކަތް ފަށާފައި އޮތް ނަމަވެސް އެއިން 35 މަޝްރޫޢެއް އޮތީ ހުއްޓިފައެވެ. ހުއްޓިފައި އޮތް 35 މަޝްރޫއުގެ ތެރެއިން 13 މަޝްރޫޢެއްގެ މަސައްކަތް މިހާރު ސަރުކާރުން އަންނަނީ ފަށައިގެ ކުރިއަށްގެންދަމުންނެވެ.

ސަރުކާރު ބަދަލުވިއިރު އުމްރާނީ ތަރައްޤީގެ ގިނަ މަޝްރޫޢުތަކެއް ހުއްޓިފައި ހުންނަތާ މަސްތަކެއްވެފައިވެއެވެ. މަސައްކަތް ހުއްޓިފައިހުރީ ފައިސާ ނުދައްކައި ހުރުމުގެ ސަބަބުންނެވެ. ސަރުކާރާއި ސަރުކާރު ހިއްސާވާ ކުންފުނިތަކުން އެކިއެކި އަމިއްލަ ވިޔަފާރިތަކަށް ދައްކަންޖެހޭ 9 ބިލިއަނެއްހައި ރުފިޔާ ނުދައްކައި ހުއްޓެވެ. ސަރުކާރުގެ އެންމެ ގިނަ މަޝްރޫޢުތައް ހިންގާ އެމްޓީސީސީއަށްވެސް 900 މިލިއަނާ ގާތްކުރާ އަދަދަކަށް ފައިސާ ސަރުކާރުން ނުދައްކައި އޮތެވެ.

ގިނައިން ފައިސާ ނުދައްކައި ހުރީ ސަރުކާރާއި ދައުލަތުގެ ކުންފުނިތަކުން އެކި މަޝްރޫޢުތައް ހަވާލުކުރުމަށްފަހު މަސައްކަތްކުރި ވިޔަފާރިތަކަށް ދައްކަންޖެހޭ ފައިސާއެވެ. އެފައިސާ ނުދެއްކުމުގެ ސަބަބުން އެއިން ވަރަށް ގިނަ މަސައްކަތް ހުރީ ހުއްޓިފައެވެ. ފެނަކައިން އެކި ކުންފުނިތަކަށް ދައްކަންޖެހޭ 2 ބިލިއަނެއްހައި ރުފިޔާ ނުދައްކައި ހުއްޓެވެ.

ރައީސް ޑރ.މުޙައްމަދު މުޢިއްޒު ވިދާޅުވެފައިވަނީ މިފަދައިން ނުދައްކައި ހުރި ފައިސާތައް ދެއްކުމުގެ މަސައްކަތް އައު ސަރުކާރުން ފަށާފައިވާ ކަމަށެވެ. ސަރުކާރުން އިޤުތިޞާދު ރަނގަޅުކުރަމުން އެ ފައިސާ ދައްކަން ފެށުމާއެކު މިފަދައިން ހުއްޓިފައިހުރި މަޝްރޫޢުތައް މިހާރު އަލުން ފެށެމުންދާކަމަށް ރައީސް ވިދާޅުވިއެވެ.