ހުކުމާ އެއްގޮތަށް ވެންޓިލޭޓަރުގެ ބަދަލު ލިބުން ނާދިރު: އޭޖީ

ހުކުމާ އެއްގޮތަށް ވެންޓިލޭޓަރުގެ ބަދަލު ލިބުން ނާދިރުކަމަށް އެޓާނީ ޖެނެރަލް (އޭޖީ) އަހުމަދު އުޝާމް ބިދާޅުވެއްޖެއެވެ.

އުޝާމް މިފަދައިން ވިދާޅުވެފައިވަނީ، އޭޖީ އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއެއް ކުރިމަތިކުރުވި ސުވާލަކަށް ޖަވާބުދެއްވަމުންނެވެ.

ކުރީ ސަރުކާރުން ދުބާއީގެ ކުންފުންޏެއްކަމަށްވާ "އެގްޒެކިއުޓާޒް ޖެނެރަލް ޓްރޭޑިންގް" އާ ހަވާލުކޮށްގެން ކޮވިޑު ދުވަސްވަރު ރާއްޖެއަށް 75 ވެންޓިލޭޓަރު ގެންނަން ނިންމާފައިވެއެވެ. ނަމަވެސް އޭގެ ތެރެއިން ދުވަސް ހަމަވީއިރުވެސް ރާއްޖެއަށް ގެނެވިފައިވަނީ 15 ވެންޓިލޭޓަރެވެ. ބާކީހުރި ވެންޓީލޭޓަރުތަށް ރާއްޖެ ގެނެސްފައެއް ނުވެއެވެ.

އެ މައްސަލައާއި ގުޅިގެން އާބިޓްރޭޝަން ސެންޓަރުން ކުރި ހުކުމުގައި 2 މިލިއަން ޑޮލަރު ދެއްކުމަށް އެގްޒިކިއުޓާސްއަށް ހުކުމްކޮށްފައިވެއެވެ. ނަމަވެސް، އެ މައްސަލާއި ގުޅިގެން ޝަރީއަތުގެ އެއްވެސް އަޑުއެހުމަކަށް އެ ކުންފުނީގެ ފަރާތުން އެއްވެސް މެންބަރެއް ހާޒިރުވެފައިނުވާކަމަށް އޭޖީ މައުލޫމާތުދެއްވިއެވެ.

އެ މައްސަލައާއި ގުޅިގެން ޝަރީއަތް ކުރިއަށް ގެންދިއުމަށް ދައްކަންޖެހޭ ފައިސާ ދައްކަން ޖެހޭނީ ސަރުކާރަށްކަމަށް އޭޖީ މައުލޫމާތުދެއްވިއެވެ.

މިދިޔަ ސަރުން އޯޑަރުޖެހި ވެންޓިލޭޓަރުގެ މައްސަލައިގައި ދައުލަތަށް ބޮޑެތި ގެއްލުންތަކެއް ވެފައިވާކަމަށް އުޝާމް ވިދާޅުވިއެވެ. އަދި އެ މައްސަލާގައި ކުރެވެންހުރި ހުރިހާކަމެއް ކުރަމުންދާކަމަށްވެސް އެބޭފުޅާ ވިދާޅުވިއެވެ. ނަމަވެސް އެ މައްސަލާގައި ލިބިފައިވާ ކުރިއެރުންތަކަށް ބަލާފައި، އެ މައްސަލާގައި ދައުލަތަށް ލިބެންޖެހޭ ފައިސާ ލިބުން ނާދިރުކަން އުޝާމް ފާހަގަކުރެއްވިއެވެ.

އެހެންކަމުން އެ މައްސަލާގައި، ދުބާއީގެ ކޯޓުތަކުން ފަރުވާ ލިބޭތޯ މަސައްކަތް ކުރަމުންދާނެކަމަށް އުޝާމް ވިދާޅުވިއެވެ.