ރައްޔިތުންގެ މަޖިލީހުގެ ޖަލްސާއެއް މާދަމާއަށް ތާވަލްކޮށްފި

ރައްޔިތުންގެ މަޖިލީހުގެ ޖަލްސާތައް ގަވާއިދުން ކުރިއަށް ނުދާތީ ބައެއް މެންބަރުން ކަންބޮޑުވުން ފާޅުކޮށްފައި ވަނިކޮށް، މަޖިލީހުގެ ޖަލްސާއެއް މާދަމާއަށް ތާވަލްކޮށްފި އެވެ.

މަޖިލިސް އިދާރާގެ ކޮމިއުނިކޭޝަންސް ޑިރެކްޓަރު ހަސަން ޒިޔާއު މިއަދު ވިދާޅުވީ މަޖިލީހުގެ ޖަލްސާއެއް މާދަމާއަށް ތަވާލްކޮށްފައިވާ ކަމަށެވެ. ނަމަވެސް، އެ ޖަލްސާގެ އެޖެންޑާ އަދި އާންމެއް ނުކުރެ އެވެ.

މަޖިލީހުގެ ޖަލްސާއެއް މާދަމާއަށް އެޖެންޑާކޮށްފައި މިވަނީ، މަޖިލީހުގެ ޖަލްސާތައް ގަވައިދުން ބާއްވަން ގޮވާލާ ގަރާރެއް ހުށަހަޅާފައި ވަނިކޮށެވެ.

ޑިމޮކްރެޓްސް އަށް ނިސްބަތްވާ ހެންވޭރު ހުޅަނގު ދާއިރާގެ މެންބަރު ހަސަން ލަތީފް މިދިޔަ ބުދަ ދުވަހު ހުށަހެޅުއްވި އެ ގަރާރުގައި ބުނެފައިވަނީ ގާނޫނުގައި ވާގޮތަށް މަޖިލީހުގެ ޖަލްސާއަށް ހަފްތާއަކު ތިން ދުވަހު ނުބޭއްވޭތީ، މަޖިލީހުގައި ނުނިމިހުރި މަސައްކަތްތައް ފުނިޖެހި، ދައުލަތުގެ ކުރިއެރުމަށް ހުރަސްއެޅިފައިވާ ކަމަށެވެ.

ފަހަކަށް އައިސް މަޖިލީހުގެ ޖަލްސާތައް ކެންސަލްވުން ވަނީ އާންމުވެފައެވެ. އަދި މަޖިލީހުގައި ކުރަންޖެހޭ މަސައްކަތްތައް ފުނި ޖެހި ކަންކަން ނިންމުމުގައި ލަސްތަކާ ކުރިމަތިވެފައިވެއެވެ.