ބޮޑު މޮޅަކާ އެކު ބާސެލޯނާ ދެ ވަނަ އަށް އަރައިފި

ސްޕެނިޝް ލީގުގައި ރޭ ގެޓަފޭ އަތުން އަމިއްލަ ދަނޑުގައި 0-4 އިން ހޯދި ބޮޑު މޮޅާ އެކު ބާސެލޯނާ ލީގުގެ ދެ ވަނަ އަށް ކުރިއަށް ޖެހިލައިފި އެވެ.

ލީގުގައި ފަހަކަށް އައިސް ބާސެލޯނާ އޮތީ ރަނގަޅު ފޯމެއްގަ އެވެ. އެންމެ ފަހުން ލީގުގައި ކުޅުނު ފަސް މެޗުގެ ތެރެއިން އެޓީމުން ވަނީ ހަތަރު މެޗު ކާމިޔާބުކޮށްފަ އެވެ. އަނެއް މެޗު ވީ އެއްވަރެވެ.

ރޭގެ މެޗުގެ ފުރަތަމަ ހާފު ބާސެލޯނާ އިން ނިންމާލީ ރަފީނިއާގެ ގޯލުން ލީޑު ނަގައިގެންނެވެ. ބާސެލޯނާގެ އަނެއް ތިން ގޯލު ޖެހީ ދެ ވަނަ ހާފުގަ އެވެ. އެޓީމުގެ ދެ ވަނަ ގޯލު ޔާއޯ ފީލިކްސް ޖެހިއިރު ތިން ވަނަ ގޯލު ޖެހީ ފްރޭންކީ ޑި ޔޮން އެވެ. ފަހު ގޯލު ކާމިޔާބުކޮށްދިނީ ފާމިން ލޮޕޭޒް އެވެ.

ލީގުގެ އެއް ވަނައިގައި އުޅޭ ރެއާލް މެޑްރިޑް މިރޭ އަމިއްލަ ދަނޑުގައި ނުކުންނާނީ ސެވިއްޔާއާ ދެކޮޅަށެވެ. އަދި، މިވަގުތު ތިން ވަނައިގައި އޮތް ޖިރޯނާ މި ހަފްތާ ކުޅޭނީ ރަޔޯ ވަޔެކާނޯއާ އެވެ.

ލީގުގައި ރޭ އެތުލެޓިކޯ މެޑްރިޑް ވަނީ ރަށުން ބޭރުގައި އަލްމީރިއާއާ ވާދަކޮށް 2-2 އިން އެއްވަރުވެފަ އެވެ. އަލަވެސް އާއި މަޔޯކާ ކުޅުނު މެޗު ނިމުނީ 1-1 އިން އެއްވަރުވެގެންނެވެ.

ބާސެލޯނާ ލީގުގެ ދެ ވަނައިގައި އޮތީ 26 މެޗުން 57 ޕޮއިންޓް ހޯދައިގެންނެވެ. އެއް ވަނައިގައި އޮތް ރެއާލް މެޑްރިޑް ވަނީ 25 މެޗުން 62 ޕޮއިންޓް ހޯދާފަ އެވެ. ޖިރޯނާ މިހާރު ތިން ވަނައިގައި އޮތީ 25 މެޗުން ލިބިފައިވާ 56 ޕޮއިންޓާ އެކު އެވެ. އެކަމަކު މިރޭ ލީގުގައި މޮޅުވެގެން ޖިރޯނާ އަށް އަލުން ދެ ވަނަ މަގާމް ލިބޭނެ އެވެ.

ރޭ އެއްވަރުވި އެތުލެޓިކޯ މެޑްރިޑް އޮތީ 52 ޕޮއިންޓާ އެކު ހަތަރު ވަނައިގަ އެވެ.