ޗެމްޕިއަންސް ލީގުގައި އާސެނަލް ފަހު ވަގުތު ބަލިވެއްޖެ

ޔޫއެފާ ޗެމްޕިއަންސް ލީގުގެ ގަދަ 16 ގެ ފުރަތަމަ ލެގްގެ މެޗުގައި ރޭ ރަށުން ބޭރުގައި ޕޯޗުގަލްގެ ޕޯޓޯއާ ވާދަކޮށް އާސެނަލް ފަހު ވަގުތު 0-1 އިން ބަލިވެއްޖެ އެވެ.

މެޗުގައި އާސެނަލް ކޮޅަށް ޕޯޓޯގެ ގޯލު އިތުރު ވަގުތުގެ ހަތަރު ވަނަ މިނެޓުގައި ޖެހީ ބްރެޒިލްގެ ވިންގާ ގަލީނޯ އެވެ. އޭރިޔާ ބޭރުން ގަލީނޯ ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ. އެ ބޯޅަ ހުއްޓުވަން އާސެނަލްގެ ގޯލްކީޕަރު ޑޭވިޑް ރާޔާ އަށް މާބޮޑު ކަމެއް ނުކުރެވުނެވެ.

މުޅި މެޗުގައި އާސެނަލް ހުއްޓުވުމުގައި ޕޯޓޯ އިން މޮޅު ކުޅުމެއް ދެއްކި އެވެ. ޕޯޓޯގެ ގޯލްކީޕަރާ އަމާޒުކޮށް މެޗުގައި އާސެނަލް އަށް ހަމަލާއެއް ފޮނުވައެއްނުލެވުނެވެ.

އާސެނަލްގެ ދަނޑުގައި ދެ ވަނަ ލެގްގެ ކުޅުން އޮންނާނީ މާޗް 12 ވަނަ ދުވަހު އެވެ. އެ މެޗުގައި ޕޯޓޯ ދެ ގޯލުން ބަލިކޮށްގެން ނޫން ގޮތަކަށް އާސެނަލް އަށް ކުއާޓާ ފައިނަލުން ފުރުސަތެއް ނުލިބޭނެ އެވެ. އާސެނަލް ޗެމްޕިއަންސް ލީގުގެ ކުއާޓާ ފައިނަލުގައި އެންމެ ފަހުން ކުޅުނީ 2010 ވަނަ އަހަރު އެވެ.

ޗެމްޕިއަންސް ލީގުގެ ގަދަ 16 ގައި ރޭ ނަޕޯލީ ވަނީ ބާސެލޯނާއާ ވާދަކޮށް 1-1 އިން އެއްވަރުކޮށްފަ އެވެ.

މެޗުގައި ބާސެލޯނާގެ ގޯލު 60 ވަނަ މިނެޓުގައި ޖެހީ ރޮބާޓް ލެވަންޑޯސްކީ އެވެ. ނަޕޯލީ އިން ވަނީ އޭގެ ފަސް މިނެޓު ފަހުން ވިކްޓާ އޮސިމެންގެ ގޯލުން ނަތީޖާ ހަމަހަމަކޮށްފަ އެވެ.